Kwamamaza

Abantu miliyari 2.6 muri Afurika no muri Aziya bafite ibyago byo kwandura Zika

Yanditswe kuya 3-09-2016 saa 15:13' na Ezechiel Mbananabo


Ubushakashatsi bwakozwe n’abahanga mu bya siyansi bandika mu kinyamakuru The Lancet cyo mu Bwongereza, bwagaragaje ko abantu babarirwa muri miliyari 2.6 ku mugabane wa Afurika na Aziya bafite ibyago byo kwandura virusi ya Zika.

U Buhinde u Bushinwa, Indonesia na Nigeria ni byo bihugu bifite ibyago byinshi kurusha ibindi nk’uko abo bashakashatsi babigaragaza.

Aba bashakashatsi baturuka mu Ishuri ry’i Londres mu Bwongereza ryigisha ibijyanye n’isuku n’ubuvuzi bw’indwara zikwirakwira, muri Kaminuza ya Oxford n’iya Toronto muri Canada.

Ubushakashatsi bwabo bwagendeye ku mubare w’abantu banyuze mu bice virusi ya Zika yagaragayemo muri Amerika y’Amajyepfo, Afurika na Aziya, igaragara ry’imibu ikwirakwiza iyi ndwara n’imiterere y’ikirere mu karere runaka mu rwego rwo kumenya ibihugu bishobora guhura n’ibyago byo kugararwamo virusi ya Zika kurusha ibindi.

Aba bashakashatsi bavuze ko ibihugu bya Philippines, Vietnam, Pakistan na Bangladesh by’umwihariko bishobora kuzahazwa na Virusi ya Zika mu gihe yaba ihagaragaye, kubera ubushobozi buke bwo kwita ku buzima.

Dr Kamran Khan uturuka mu bitaro byitiriwe mutagatifu Michael by’i Toronto akaba ari we wayoboye ubu bushakashatsi, yagize ati “Ingaruka ku baturage zizanaterwa ahanini n’ubushobozi bw’igihugu mu kuvura no guhangana n’icyorezo gishobora kwaduka.”

Yongeyeho ati “ Ibyo twabonye bishobora gutanga amakuru ya ngombwa yafasha gufata ibyemezo ku gihe bijyanye n’ubuzima, haba ku rwego rw’ibanze,ku gihugu no ku rwego mpuzamahanga.”

Ibihugu birenga 65 kugeza ubu bikomeje guhura no gukwirakwira kwa virusi ya Zika.

Iyi virusi imaze kugira ingaruka ku Banya-Brazil miliyoni 1.5, ariko ishobora gukomeza ikwirakwira ikagera no ku babarirwa kuri miliyari 2.6 babarizwa mu Majyepfo ashyira u Burasirazuba bwa Aziya no muri Afurika.

Virusi ya Zika yagaragaye bwa mbere ku nguge muri Uganda mu 1947 ariko mu 1970 nibwo yatangiye kugaragara ku bantu mu bihugu byo ku migabane ya Afurika na Aziya.

Muri 2007 nibwo icyorezo cya Zika cyagaragaye mu duce two muri Oceania.

Umwaka ushize Zika yageze muri Brazil mbere yo kugaragara mu bihugu bitari munsi ya 40 byo ku mugabane wa Amerika

Ku mugabane wa Afurika, Angola ni yo irusha ibindi bihugu kugira ibyago bya virusi ya Zika nk’uko ubu bushakashatsi bwabigaragaje, kubera ko isanzwe irimo indwara ya Fièvre Jaune.

Ikindi ni uko ngo iki gihugu gifitanye ubufatanye n’ubuhahirane mu by’ubukungu na Brazil nk’uko BBC Rfi yabitangaje.

Ibyo wamenya kuri Virusi ya Zika

Virusi ya Zika isakazwa n’imibu yo mu bwoko bwa Aedes aegypti.
Ishami ry’Umuryango w’Abibumbye ryita ku Buzima, OMS, rivuga ko umuntu ayandura nyuma yo kurumwa n’uyu mubu, gusa byavuzwe ko hari n’abayandurira mu mibonano mpuzabitsina.

Ibimenyetso ufite Zika agaragaza birimo kugira umuriro, kwishimagura, gusesa uibiheri no gufuruta umubiri wose,kubyimba ibiganza cyangwa ibirenge no kurwara umutwe.

Iyi virus itera ibibazo mu bwonko ndetse ikanatuma umwana uvutse ku mubyeyi uyirwaye ashobora kuvukana umutwe muto, urimo ubwonko budakora neza“Microcephaly”.

Imibare yo muri Gucurasi uyu mwaka igaragaza ko abana 1300 muri Brazil bamaze kuvuka batuzuye kubera iyi virusi, mu gihe abagore batwite bagera hafi kuri 300 muri Leta Zunze Ubumwe za Amerika bayibasanganywe.

Kugeza ubu ngo nta buryo ubwo aribwo bwose buzwi bwo kuvura iyi virusi cyangwa se urukingo rwayo, uretse ko uyirwaye akenshi ahabwa umuti umufasha kugabanya umuriro ndetse n’uburibwe.

Kunywa amazi menshi ndetse no kuruhuka ku buryo buhagije nazo ni inama zigirwa uwafashwe na Virusi ya Zika. Abashakashatsi bavuze ko ari indwara ihangayikishije Isi muri iki gihe.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved