Abantu 80 ni bo bamaze guhabwa impyiko mu myaka 14

Yanditswe na Thamimu Hakizimana
Kuya 11 Werurwe 2017 saa 08:35
Yasuwe :
0 0

Imyaka ibaye 14 mu Rwanda hatangijwe uburyo bwo guhindurira umurwayi impyiko ifite ikibazo igasimbuzwa inzima ariko bigakorerwa mu mahanga. Kuva icyo gikorwa cyatangira, abantu 80 mu Rwanda nibo bamaze guhabwa iyo serivise ituma uyihawe yongererwa amahirwe yo kubaho igihe kirekire.

Impyiko ni imwe mu ndwara zitandura ariko ikomeje kwibasira abantu benshi, akenshi ugasanga ntibanazi ko bayirwaye kuko baba batayisuzumishije, n’ababigerageje bakabikora yaramaze kubarenga ndetse bikaba ngombwa ko bajya kwivuriza hanze y’igihugu.

Umunsi mpuzamahanga wo kurwanya indwara z’impyiko, uba buri mwaka tariki 9 Werurwe, ni undi mwanya ukoreshwa mu gukangurira abantu kuyirinda no kuyisuzumisha kenshi.

Muri uyu mwaka, mu Rwanda uyu munsi wizihijwe kuri uyu wa Gatandatu, tariki ya 11 Werurwe, aho abawitabiriye babanje gukora urugendo rwatangiriye Camp Kigali, banyura CHUK barusoreza ahazwi nka Car Free zone.

Nyuma abaturage batandukanye bigishijwe uburyo bwo kwirinda indwara zifata impyiko harimo kunywa amazi menshi, gukora siporo no kwirinda kurya umunyu mwinshi, ari nako bakangukira kwipimisha. Uretse ibyo, abitabiriye uyu munsi banapimwe indwara y’impyiko, Diabete n’umuvuduko w’amaraso ku buntu.

Umuyobozi Mukuru w’Umuryango w’abarwayi b’impyiko, Nambaje Elias yabwiye IGIHE ko kuva mu 2003 ubwo hatangizwaga gahunda yo gufasha abafite impyiko zifite ibibazo gusimbuzwa, abantu 80 mu Rwanda ari bo bamaze kuzihabwa.

Yagize ati “ Icyo navuga ku bijyanye n’uburyo uburwayi bw’impyiko buhagaze mu Rwanda, ni uko kuva iyi gahunda yo guha abantu impyiko yatangira, abantu 80 ari bo bamaze kuzihabwa ndetse abandi bagera ku 157 bari ku mashini ziyungurura amaraso.”

Umuturage witwa Manishimwa Jean de la Croix, wapimwe impyiko kuri uyu munsi, yavuze ko yishimiye kuba yapimwe iyo ndwara, Diabete n’umuvuduko w’amaraso ku buntu ndetse agasanga ari muzima.

Yagize ati “ Biranshimishije kuba nsanze nta kibazo cy’impyiko cyangwa diabete mfite, gusa ikinshimishije cyane ni uko napimwe ku buntu nta giceri na kimwe ntanze.”

Kugeza ubu kwivuza impyiko mu Rwanda biracyahenze cyane bitewe n’uko kunyura mu mashini iyungurura amaraso inshuro imwe gusa ari ibihumbi 120 Frw mu gihe biba bisaba ko umuntu nibura ayinyuramo inshuro eshatu mu cyumweru bigakorwa mu gihe cy’amezi atandatu, ibigora benshi kuyabona.

Ni ukuvuga ko mu cyumweru umurwayi ugeze kuri uru rwego asabwa ibihumbi 360 by’amafaranga y’u Rwanda mu cyumweru bikaba byamutwara 1 440 000 ku kwezi na ho mu mezi atandatu aya mafaranga akaba yagera kuri 8 640 000.

Abafite ubu burwayi hirya no hino mu gihugu, basaba ko byibura bafashwa bakajya bavurirwa ku ikarita y’ubwisungane mu kwivuza (Mituelle de Santé), bitewe n’uko ubushobozi bwo kwiyishyurira iyo serivisi buhanitse.

Mu bagana ibitaro bya Gisenyi biherereye mu Karere ka Rubavu bakeneye serivise yo kwivuza impyiko, 95% baba bakoresha ubwisungane mu kwivuza bituma abenshi batabasha kwakirwa.

Ku Isi yose umuntu umwe mu bantu 10 aba afite ikibazo cy’impyiko, bivuze ko miliyoni 600 bafite iki kibazo. Ishami ry’Umuryango w’Abibumbye ryita ku buzima OMS/WHO, rigaragaza ko Afurika yo munsi y’ubutayu bwa Sahara mu baturage bangana na miliyoni imwe haba harimo abantu 100 bafite ikibazo cy’impyiko.

Mu Rwanda imibare igaragazwa na Minisiteri y’Ubuzima yerekana ko kuva mu 2013 kugeza mu 2015, hari abarwayi 3650 bafite ikibazo cy’impyiko zidashobora gukira.

Bimwe mu bimenyetso by’indwara y’impyiko ni: kwihagarika inkari nkeya cyangwa ukazibura, kwihagarika amaraso, kubyimba umubiri wose, kugabanuka k’umuvuduko w’amaraso, kugabanuka kw’imyunyu ngugu mu maraso, kuribwa ahagana inyuma mu mugongo cyangwa mu maguru no kugira isesemi ishobora gutuma uruka.

Abaturage benshi bishimiye gusuzumwa impyiko n'izindi ndwara nta mafaranga batanze
Ababyifuza kandi banapimwaga umuvuduko w'amaraso nk'imwe mu ndwara ifata benshi
Kuri uyu munsi ababyifuza bapimwe Diabete ku buntu
Ni igikorwa cyitabiriwe n'abantu benshi bashakaga kureba uko ubuzima bwabo buhagaze
Manishimwe avuga ko yishimiye kuba yasanze nta mpyiko cyangwa Diabete arwaye
Nambaje Elias avuga ko mu myaka 14 ishize abantu 80 bahawe impyiko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244