Abamotari n’abashoferi mu bantu 5000 bagiye gupimwa COVID-19 mu minsi ibiri i Kigali

Yanditswe na Uwimana Abraham
Kuya 5 Gashyantare 2021 saa 08:39
Yasuwe :
0 0

Ikigo cy’Igihugu cy’Ubuzima (RBC), cyatangaje ko kigiye gupima COVID-19 abantu 5.000 bakora imyuga itandukanye muri Kigali, mu rwego rwo gusuzuma uko ubwandu buhagaze mu nzego zitandukanye z’abantu, kikaba ari igikorwa kizamara iminsi ibiri.

Ibinyujije ku rubuga rwa Twitter, RBC, yatangaje ko guhera kuri uyu wa 5 kugeza ku wa 6 Gashyantare 2021, izakora igikorwa cyo gupima abamotari, abashoferi batwara imodoka rusange (bus), hamwe n’abakora imirimo yari yakomeje gukora mu gihe cya Guma mu Rugo i Kigali.

Iryo tangazo rikomeza rigira riti “Tuzapimira kuri Stade Amahoro, Stade Regional no kuri IPRC Kicukiro. Abazatoranywa ngo bapimwe, bazabimenyeshwa binyuze mu mashyirahamwe basanzwe bakoreramo.”

Ibi RBC ibitangaje mu gihe habura iminsi mike ngo Kigali ive muri gahunda ya Guma mu rugo nyuma y’ibyumweru bigera kuri bitatu nk’uko byemejwe n’Inama y’Abaminisitiri yateranye ku wa 2 Gashyantare 2021.

Muri imwe mu myanzuro y’iyo nama harimo ko guhera ku wa 8 Gashyantare 2021, Umujyi wa Kigali uzava muri gahunda ya Guma mu Rugo, ibikorwa bimwe bikongera kwemererwa gukora, ariko bikajya bifunga saa moya z’umugoroba nk’uko bizaba bimeze n’ahandi hose mu gihugu.

Mu bikorwa bizaba byemerewe gukora, harimo imodoka zitwara abantu mu buryo bwa rusange n’iz’abantu ku giti cyabo, zizaba zemerewe gutwara 50% by’ubushobozi bwazo; moto n’amagare bizaba byemerewe gutwara abagenzi hubahirizwa amabwiriza yose y’isuku; ndetse amasoko n’amadoka nabyo bizafungura ariko hajye hasimburana umubare utarenze 50%, n’ibindi.

Iki gikorwa cyo gupima bamwe mu bazaba bemerewe gutangira imirimo yabo ku wa 8 Gashyantare 2021, kiratuma bamenya uko bahagaze bityo bamenye uburyo bazitwara mu gihe ibikorwa bizaba byongeye gufungura mu Mujyi wa Kigali.

Minisitiri w’Ubuzima, Dr Ngamije Daniel, aherutse gutangaza ko ibyumweru bibiri bya Guma mu Rugo i Kigali byatanze umusaruro ufatika, kuko byatumye umubare w’abandura ndetse n’uwabahitanwa n’icyorezo ugabanuka cyane, akaba ari nayo mpamvu bongeyeho ikindi cyumweru kugira ngo umusaruro nibura ugera ku kigero cya 9/10.

Ati “Twari dukeneye iki cyumweru kugira ngo dushimangire ibyiza bya Guma mu Rugo, navuze igabanuka ry’abarwayi twakiraga ariko hari n’igabanuka ry’abahitanwa n’icyorezo. Iki cyumweru rero kiraza gufasha kugira ngo ingamba zubahirizwe ariko n’abantu babone ko iki cyorezo gikomeye.”

Kuri ubu muri rusange mu Rwanda, imibare ya Minisiteri y’Ubuzima igaragaza ko kugeza ku wa 4 Gashyantare 2021, abamaze kwandura COVID-19 ari 15.988, muri bo abakirwaye ni 4.426, muri bo 17 bakaba barembye cyane, naho abo cyahitanye bamaze kugera kuri 210.

RBC igiye gupima abantu 5000 mu Mujyi wa Kigali, mu rwego rwo kureba uko ubwandu buhagaze mu nzego z'abantu zitandukaye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .