Abakozi ba BPR batanze amaraso yo gufasha indembe, bamwe bagaruka ku buhamya bw’ibyababayeho

Yanditswe na Muvunyi Arsène
Kuya 20 Nyakanga 2019 saa 09:03
Yasuwe :
0 0

Kuri uyu wa 19 Nyakanga 2019 abakozi ba Bank Populaire du Rwanda Atlas Mara bitabiriye igikorwa cyo gutanga amaraso ku bushake mu rwego rwo gufasha abarwayi bayakeneye.

Ni igikorwa cyitabiriwe n’abakozi benshi bafite umutima wo gutabara abafite ubuzima buri mu kaga bitewe n’amaraso make.

Bamwe muri aba bakozi baganiriye na IGIHE bagaragaje ko bitabiriye iki gikorwa mu rwego rwo gutanga umusanzu mu gukiza ubuzima bw’abanyarwanda bakeneye amaraso ariko na none hari n’indi mpamvu.

Umwe ni Mudenge Marie Gorethe wabyaye umwana igihe kitageze akaza kugira ikibazo gikomeye cyo kubura amaraso ku buryo byashobokaga ko yitaba Imana iyo adatabarwa n’amaraso yatanzwe n’abandi.

Ati “Nabyaye umwana afite amezi arindwi, amaze iminsi ibiri avutse ahita ahinduka umuhondo, hashize umwanya muto ahita ahinduka ubururu, ako kanya baramujyana baramupima basanga adafite amaraso ahagije.”

Nyuma yo kumenya ikibazo uyu mwana yari afite, abaganga bamuteye amaraso agarura ubuyanja, aronka, ibiro biriyongera yongera gusubirana ubuzima.

Ati “Bamuteye amaraso yongera guhumeka neza, ibiro biriyongera, atangira gufata ibere no kugarura umubiri mwiza.”

Undi ni Isinga Jeanine, yavuze ko ubwo yibarukaga yagize ikibazo cy’amaraso make, bikaba ngombwa ko bamwongerera amaraso. Ibi byamuteye umutima wo kuzajya ayatanga agafasha abayakeneye.

Ati “Mu 2017 mbyara umwana wanjye wa gatatu nagize ikibazo cy’amaraso make, biba ngombwa ko banshakira amaraso. Mu by’ukuri iyo uri ku bitaro harimo abarwayi noneho ari nawe bireba bagushakira amaraso nibwo umenya ko abatanga amaraso baba bafasha benshi. Nafashijwe n’uko hari umuntu watanze amaraso nanjye uyu munsi nishimiye kuyatanga.

Isinga avuga buri wese ubishoboyeyakwitabira iki gikorwa kuko ari ugukiza ubuzima bw’abandi

Ati “ Ntabwo abantu bakwiye gutegereza ko babanza kubibona bibabayeho. Ni igikorwa cyiza abantu bakwiye kwitabira kuko hari ahantu utazi mu bitaro runaka umuntu wenda wakoze impanuka cyangwa wabyaye utazi ukeneye amaraso.”

Kalisa Prossie ushinzwe Iyamamazabikorwa n’Itumanaho muri BPR yavuze ko iki gikorwa bagitekereje mu rwego rwo kwifatanya n’Isi mu munsi mpuzamahanga wo gutanga amaraso wizihijwe tariki 14 Kamena 2019.

Ati “Twaje gushyigikira umunsi mpuzamahanga wo gutanga amaraso wabaye tariki 14 Kamena uyu mwaka. Nka BPR tuzwiho kuzigama cyangwa gutanga inguzanyo ariko iki ni igikorwa gifitiye inyungu abaturage twahisemo kugira ngo dutange amaraso dufashe abarwayi bayakeneye.”

Ni ubwa mbere igikorwa cyo gutanga amaraso gikozwe n’abakozi ba BPR ariko hari gahunda y’igihe kirekire aho bazajya bayatanga binyuze mu mashami atandukanye bafite mu gihugu.

Abakozi ba BPR bitabiriye gutanga amaraso bagamije gufasha indembe ziyakeneye
Isinga Jeanine yahawe amaraso ayakeneye yiyemeza kujya ayatanga
Mbere yo gutanga amaraso babanza gupima umuvuduko wayo uko ungana
Mudenge Marie Gorethe yavuze uburyo umwana we yahawe amaraso ayakeneye
Umuganga ufashe amaraso yandikaho imyirondoro ya nyirayo
Gutanga amaraso ni ugukiza ubuzima bw'abayakeneye
Amaraso atangwa ajya gufasha indembe ziyakeneye mu bitaro
Umuyobozi Ushinzwe Iyamamazabikorwa n'Itumanaho muri BPR yavuze ko bazakomeza gutanga amaraso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza