Abajyanama b’ubuzima bagorwaga no gukora nijoro bagiye gusubizwa

Yanditswe na Umurerwa Emma Marie
Kuya 19 Mata 2017 saa 08:08
Yasuwe :
0 0

Minisiteri y’Ubuzima(Minisante) ivuga ko igiye gukemura ikibazo cy’abajyanama b’ubuzima bagorwa no kwakira ababagana mu masaha y’ijoro bitewe n’uko nta muriro bafite, bikaba byabaviramo gutanga serivisi zitanoze.

Abajyanama b’ubuzima by’umwihariko abakorera mu bice bitarageramo umuriro w’amashanayarazi, bavuga ko iyo hagize umurwayi ubagana mu masaha y’ijoro bagorwa no kumwakira kuko hari igihe baba badafite icyo kumurikisha.

Umwe mu bajyanama b’ubuzima wo mu Murenge wa Mwiri, mu Karere ka Kayonza, yatangarije IGIHE ko kutagira umuriro bibangamira serivisi atanga nijoro.

Ati “Iyo umubyeyi akuzaniye umwana urwaye maraliya mu gicuku hari igihe ubura uko umwakira cyane iyo asanze nka peterori yashize mu itara. Turasaba Leta ko yazadufasha kubona urumuri ruhoraho kugira ngo tujye tubasha guha serivisi nziza abatugana.”

Abajyanama b’ubuzima bo mu Karere ka Nyanza, mu Murenge wa Cyabakamyi nabo bafite ikibazo cyo gutanga serivisi nijoro bitewe n’uko nta mashanyarazi bafite.

Bagize bati “Inaha nta mashanyarazi ahari, iyo umurwayi aje nko mu masaha y’ijoro biba ikibazo, hari nk’igihe aba ari umugore ushaka imiti yo kuboneza urubyaro cyangwa se ari abarwaye marariya. Kugira ngo ubakire udafite urumuri biba ari ikibazo gikomeye. Minisante ikwiye kugira icyo idufasha tukabona urumuri ruhoraho.”

Ibyo abajyanama b’ubuzima bavuga birumvikana

Mu kiganiro na IGIHE, Umuvugizi wa Minisiteri y’Ubuzima, Malick Kayumba yavuze ko ibyo abajyanama b’ubuzima bavuga byumvikana, bityo ko hari icyo bazafashwa.

Ati “Ibyo bavuga bifite ishingiro kandi turabizi ko bakora akazi gakomeye gasaba ubwitange no gukora amasaha yose nk’abakorerabushake. Kuba rero hari ababura urumuri mu masaha y’ijoro nabyo turabizi kandi hari icyo Leta izabikoraho nubwo ntakubwira ngo ni igihe iki niki.”

Yakomeje avuga ko abajyanama b’ubuzima bakora akazi ko kubungabunga ubuzima bw’abanyarwanda umunsi ku munsi, bityo ko nta wabona amafaranga abahemba ku buryo bakuramo ibyo bakeneye byose.

Ati “Baritanga cyane ntacyo umuntu yabona abahemba ariko Minisiteri y’Ubuzima nta na rimwe iticara ngo itekereze uburyo bakora akazi kabo ku buryo buboroheye. Leta irimo kwiga uburyo yabongerera ubushobozi haba mu bikoresho ndetse n’icyo kibazo cyo kubura uko bakora mu masaha y’ijoro n’ibindi bikaba byakemuka.”

Mu Rwanda habarurwa abajyanama b’ubuzima basaga ibihumbi 45, bakora nk’abakorerabushake umunsi ku munsi guhera ku rwego rw’umudugudu.

Minisante yijeje ubufasha Abajyanama b'ubuzima bagorwaga no gutanga serivisi mu masaha y'ijoro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244