Abagore 70% barwaye kanseri y’ibere bashobora kuvurwa badahawe imiti yihariye

Yanditswe na Mukaneza M.Ange
Kuya 4 Kamena 2018 saa 03:21
Yasuwe :
0 0

Ubushakashatsi bwagaragaje ko 70% by’abagore barwaye kanseri y’ibere ariko itarakwira henshi, bashobora kuvurwa bitabaye ngombwa ko bahabwa imiti ibarinda gutuma ikwirakwira (chemotherapy).

Chemotherapy ni imiti ikoreshwa mu gutuma kanseri y’ibere idakwirakwira ahandi cyangwa ngo ibe yagaruka. Nubwo itabara ubuzima bwa benshi ariko, inakurura ibindi bibazo birimo kuruka, umunaniro udashira, ubugumba no kubabara bimwe mu bice by’ubwonko (nerve pain).

Rimwe na rimwe kandi ishobora gutuma umutima udakora neza cyangwa ugahagarara, ndetse ikaba yatera uyihabwa kanseri ifata mu maraso (leukaemia).

Ubu bushakashatsi bwakozwe n’abaganga ba kanseri nyuma y’ibizamini ku miterere y’iyi ndwara (genetic test), bwagaragaje ko abo itarakwira henshi bashobora kuvurwa binyuze mu kubagwa ndetse no guhabwa imisemburo (hormone therapy) gusa. Bwakorewe ku bagore bagera ku 10273.

Ubusanzwe abagore bigaragaye ko ikiri ku gipimo cyo hasi ntibahabwa uyu muti, nyamara ariko imibare yagaragarijwe mu nama yahuje abaganga ba kanseri ndetse n’abahanga muri siyansi yabereye i Chicago amahirwe yo kubaho ku bayihabwa n’abatayihabwa ajya kungana.
Nk’uko BBC dukesha iyi nkuru yabyanditse, byagaragaye ko amahirwe yo kubaho imyaka icyenda yanganaga na 93.9% ku batarahawe iyi miti, na 93.8% ku bari muri chemotherapy.

Ubu bushakashatsi bwakozwe n’itsinda ryo muri Albert Einstein Cancer Center i New York muri Leta Zunze Ubumwe za Amerika, ni imwe mu ntambwe ikomeye itewe mu buvuzi bwa kanseri aho bwitezweho gutanga umusanzu mu guhindura uko iyi ndwara yavurwaga ndetse no kugabanya amafaranga byatwaraga.

Ibyavuye muri ubu bushakashatsi kuri uyu muti wagiraga ingaruka ku bagore basaga 3000 buri mwaka mu Bwongereza byakiriwe neza n’imiryango y’abagiraneza, ndetse n’amavuriro avura kanseri muri iki gihugu, aho bateganya guhita batangira kubikurikiza.

Imiti itangwa muri Chemotherapy ishobora guteza ibibazo birimo ubugumba no guhagarara k'umutima

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza