Kwamamaza

Abaganga bize barihiwe na Minisante bayireze kwa Minisitiri w’Intebe

Yanditswe kuya 8-11-2016 saa 19:04' na Philbert Hagengimana


Abaganga bagera ku 162 bize barihirwa na Minisiteri y’Ubuzima barangiza amasomo ntibashyirwe mu mbonerahamwe y’imirimo y’ubuvuzi mu Rwanda, biyambaje Minisitiri w’Intebe ngo abarenganure.

Komisiyo y’Uburezi, Ikoranabuhanga, Umuco n’Urubyiruko mu Nteko Ishinga Amategeko Umutwe w’Abadepite, yateraniye kwiga ku kibazo Depite Bazatoha Adolphe yagejeje ku Nteko Rusange, cy’abaganga bavuga ko bize ubuvuzi barihiwe akayabo na Minisante, bakagirana amasezerano ariko ntiyubahirizwe none bikaba bigikomeje guhombya Leta kandi n’ubuzima bwabo bukarushaho kuba bubi.

Minisante yihaye umupira muremure

Hashingiwe ku kibazo cy’umubare muto w’abaganga n’intego yo kugabanya impfu zitari ngombwa zikunze kwibasira Abanyarwanda cyane abari kure y’ibitaro by’uturere, Minisante yatekereje gukemura icyo kibazo ishyiraho urundi rwego rw’abaganga bitwa “Clinical Officers”.

Abo baganga bwari ubwa mbere bagiye kubaho mu Rwanda, ariko basanzwe bariho mu bindi bihugu byo muri aka Karere nka Uganda, Tanzania, Kenya, Malawi ndetse n’ahandi.

Minisante yashyizeho urwo rwego rw’abaganga ifatanyije n’Ishami ry’Ubuvuzi muri Kaminuza y’u Rwanda (iyahoze ari KHI), ari na bwo batangiye kwigishwa ku buryo aba mbere bamaze imyaka ibiri barangije, abandi baritegura kurangiza, dore ko hari n’abakiri mu myaka yo hasi.

Igitangaje, abo baganga bize barihirwa na Minisante, iyo myaka ibiri bayimaze hanze badakora ibyo bize, bamwe muri bo bakaba ari na bo bagejeje ikibazo cyabo kuri Minisitiri w’Intebe ndetse n’Inteko Ishinga Amategeko.

Mu 2011, Inama y’Abaminisitiri yemeje ko hatangira kwigishwa abaganga (Clinical Officers), Minisante yandikiye KHI (ubu ni Koleji y’Ubuvuzi n’ubumenyi mu by’ubuzima muri Kaminuza y’u Rwanda), isaba ko hatangira kwigishwa abo baganga bagahabwa amasomo yo ku rwego rw’icyiciro cya kabiri cya kaminuza (A0), haherewe ku basanzwe mu kazi bafite impamyabumenyi y’icyiciro cya mbere (A1) mu Buforomo ndetse n’ubuvuzi.

KHI yatangiye gushyira mu bikorwa iyo gahunda, itanga ibizamini itoranya abagomba gutangira kwiga, ndetse ku wa 6 Gashyantare 2011, iryo shuri ryandikira Minisante riyimenyesha urutonde rw’abemerewe kujya kwiga, rinayisaba gusinyana na bo amasezerano kuko bari bagiye kuvanwa mu kazi.

Umwaka w’amashuri watangiye muri Nzeri 2011, maze abatoranyijwe uko ari 30 batangira amasomo, Minisitiri w’Ubuzima wariho icyo gihe, asinyana amasezerano na buri wese.

Ayo masezerano yavugaga ko Minisante izishyura amafaranga yose y’ishuri, maze umukozi na we yarangiza kwiga akayikorera nibura imyaka itatu, yaba atabyubahirije agasubiza amafaranga yose yamutanzweho yiga.

Abo banyeshuri b’abakozi bakomeje guhembwa umushahara wabo, ariko nyuma y’amezi 12 batangiye kwiga, urahagarikwa batabanje kumenyeshwa impamvu, gusa bakomeza kwiga.

Amasomo yarangiye mu 2013, ariko Minisante ntiyahita ibasubiza mu kazi nk’uko babisezeranye, maze muri Gicurasi 2014, iyo Minisiteri ibatumaho ngo baganire uko batangira akazi nka ‘Clinical Officers’. Icyo gihe bumvikanye n’aho bagomba gutangira gukorera, ndetse n’uturere tumenyeshwa ko twohererejwe abaganga bo kuyobora ibigo nderabuzima biri kure y’ibitaro, ariko amabaruwa abaha ako kazi ageze mu biro by’umunyamabanga wa leta muri iyo Minisiteri yanga kuyasinya, maze mu buryo butunguranye, abo baganga bahita bamenyeshwa ko batagihawe akazi.

Impamvu yatumye badahabwa akazi ku munota wa nyuma, ngo ni uko urwo rwego rutari ku mbonerahamwe y’imirimo muri Minisiteri y’Ubuzima.

Muri Gashyantare 2015, abo baganga barangije kwiga bose bandikiye Minisante bayisaba kubashyira ku mbonerahamwe y’imirimo, ikanabafasha kwinjira mu kazi nka ‘Clinical Officers’, ariko n’ubu ngo nta gisubizo barahabwa.

Kuba kuva barangiza kwiga nta wigeze abasha gukora ibijyanye n’urwego ariho, dore ko n’abafite akazi mu bigo nderabuzima cyangwa ibitaro babarwa nk’abaforomo bo ku rwego rwa A1 bariho mbere yo kujya kwiga ndetse n’ibindi, byatumye biyambaza Minisitiri w’Intebe ndetse n’Inteko Ishinga Amategeko kugira ngo ikibazo cyabo gisuzumwe kandi gikemurwe.

Kuri uyu wa 8 Ugushyingo 2016, ni bwo Komisiyo y’Uburezi, Ikoranabuhanga, Umuco n’Urubyiruko mu Nteko Ishinga Amategeko, Umutwe w’Abadepite yagombaga gusuzuma ikibazo cy’abo baganga, ariko icyo gikorwa kiza gusubikwa, nyuma yo gusanga bikwiye ko na bo baba bahibereye.

Nk’uko Depite Agnes Mukazibera uhagarariye iyi Komisiyo yabivuze mu mwanzuro, abahagarariye abo baganga ngo bazumvwa kuri uyu wa 9 Ugushyingo, ubundi harebwe inzego zirebwa n’icyo kibazo na zo zitumizwe, bityo haboneke umwanzuro wa nyuma kuri icyo kibazo, ari na wo uzamenyeshwa Umuyobozi w’Inteko Ishinga Amategeko, Umutwe w’Abadepite kuko ari we wategetse iyo Komisiyo gusuzuma icyo kibazo kandi mu buryo bwihuse.

Icyakora nubwo iyo Komisiyo irimo isuzuma icyo kibazo, hanategerejwe umwanzuro wa Minisitiri w’Intebe kuri icyo kibazo, kuko mu mabaruwa Inteko Ishinga Amategeko ifitiye kopi, harimo n’iyamugenewe.

Abo baganga batakiye inzego nkuru z'igihugu kugira ngo barenganurwe

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved