Kwamamaza

Abaganga bashya 168 boherejwe mu mirimo mu bitaro bitandukanye

Yanditswe kuya 31-08-2016 saa 10:04' na Tombola Felicie


COMMENTS: 2

Abaganga 168 barimo n’abagiye kwimenyereza umwuga mu gihe cy’umwaka wose, boherejwe mu bitaro bitandukanye mu gihugu, aho mu mpanuro bahawe basabwe kuzarangwa n’ubunyamwuga ndetse no gutega amatwi abarwayi kugira ngo babashe kubafasha uko bikwiye.

Muri aba baganga boherejwe mu bitaro binyuranye, barimo 94 bagiye gutangira akazi ndetse n’abandi 74 bagiye kumara umwaka bimenyereza kuvura no kwita cyane ku kumva ibyifuzo by’abarwayi.

Hirya no hino mu bitaro n’ibigo nderabuzima bitandukanye, hakunze kumvikana amajwi y’abaturage bagenda binubira serivisi bahabwa ahanini zabaga zishingiye ku mubare udahagije w’abaganga, aho wasangaga bamwe bavuga ko baza kwivuza bagataha batavuwe.

Mu nama yahuje abaganga 168 bagiye gutangira imirimo yabo mu bitaro bitandukanye kuri uyu wa kabiri tariki 30 Kanama 2016, Minisiteri y’Ubuzima, yahaye impanuro abaganga bagiye koherezwa mu mirimo kugira ngo bazakore kinyamwuga baba abagaragu b’abarwayi kandi babafasha uko bashoboye kose.

Umunyamabanga wa Leta muri Minisiteri y’Ubuzima , Dr Patrick Ndimubanzi yasabye abaganga baba abagiye gutangira akazi n’abandi bagiye kumara umwaka bimenyereza kuvura nyuma yo kurangiza kaminuza kwita cyane ku kumva abarwayi.

Ati “Umurwayi yishimira gusanga umuganga umwumva kuruta uko yasanga wa wundi bavuga ko ari kabuhariwe mu kuvura utamwumva. Mwibuke ko buri murwayi agira umwihariko we, mumutege amatwi ni bwo azabona ko mwamwubashye hanyuma mumusobanurire ibyo mugiye kumukorera n’impamvu zabyo”.

Mu mpanuro ze, Dr Ndimubanzi yashimangiye ko buri kazi kose kagira amahame akagenga bityo ko n’abaganga bakwiye kwitwararika ku mahame n’indangagaciro zigenga umwuga wabo.

Dr Mugabe Fiacre Byiringiro wari uhagarariye abaganga bagiye koherezwa mu kazi ni ukuvuga abasoje umwaka wo kwimenyereza, yatangaje ko uyu mwaka bamaze bimenyereza wabagiriye akamaro kandi ko bituma umuganga arushaho kwigirira icyizere.

Yagize ati "Uyu mwaka dusoje wadufashije kurushaho kwiyungura mu byo twize ,usanga mu ishuri umuntu yiga ibintu byinshi akabyigira rimwe hakaba n’ibyo aba atashyize mu ngiro,ubu rero tugiye gukora ibyo tuzi neza .”

Ku kijyanye no kumva abarwayi, Dr Fiacre yavuze ko ibyo hari igihe biterwa n’umubare muke w’abaganga bityo ko babaye benshi n’umwanya umuganga amara ku murwayi wakwiyongera.

Dr Magnifique Irakoze, umwe mu baganga basoje imyaka itandatu ya kaminuza bakaba bagiye kumara umwaka bimenyereza mu bitaro bitandukanye, yemeza ko abarwayi bazabafata nk’abakiriya babo b’imena kuko badahari ibyo bize baba barabyigiye ubusa.

Agira ati "Abaganga twiteguye kwita ku barwayi no kubumva tutitaye ko ubushakashatsi buvuga ko umuganga yumva umurwayi amasengonda icyenda ubundi agafata umwanzuro,ahubwo tuzaba abagaragu babo kuko badahari ibyo twize twaba twarabyigiye ubusa”.

Abaganga 74 basoje amasomo ya kaminuza bagiye kwimenyereza umwuga, bakwirakwijwe mu bitaro 46 byo mu gihugu hagendewe ku bibakeneye cyane kurusha ibindi.

Umunyamabanga wa Leta muri Minisiteri y’Ubuzima , Dr Patrick Ndimubanzi

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 15 Ukuboza 2016
Copyright © 2009 -2014 - IGIHE Ltd - All Rights Reserved