00:00:00 IGIHE NETWORK KN KINYARWANDA EN ENGLISH FR FRANCAIS

Urukiko rwategetse ko Karasira Aimable akomeza gufungwa iminsi 30

Yanditswe na Nkundineza Jean Paul
Kuya 26 Kanama 2021 saa 03:43
Yasuwe :
0 0

Urukiko Rwisumbuye rwa Nyarugenge rwategetse ko Karasira Uzaramba Aimable akomeza gufungwa iminsi 30 y’agateganyo mu gihe hategerejwe ko aburana mu mizi ku byaha akurikiranyweho.

Karasira yari yakatiwe gufungwa by’agateganyo n’Urukiko rw’Ibanze rwa Nyarugenge ariko arajurira.

Abamwunganira mu mategeko bavugaga ko afite ibibazo by’uburwayi bwo mu mutwe bityo akwiye kurekurwa akabanza akavuzwa.

Kuri uyu wa 26 Kanama, saa cyenda z’igicamunsi, Urukiko Rwisumbuye rwa Nyarugenge rwemeje ko iyi minsi 30 y’igifungo kuri Karasira igumaho, hashingiwe ku buremere bw’ibyaha akekwaho kuko bihanishwa igihano kirengeje imyaka ibiri mu gihe yaba agihamijwe n’urukiko.

Impamvu abamwunganira bashingiragaho basaba ko akwiye kurekurwa akajya kuvuzwa, urukiko rwavuze ko nta shingiro bifite ko nta n’ibimenyetso babitangira.

Karasira akurikiranweho ibyaha byo guhakana Jenoside yakorewe Abatutsi mu 1994, guha ishingiro Jenoside, gukurura amacakubiri ndetse n’icyaha cyo kudasobanura inkomoko y’umutungo.

Bimwe bikekwa ko yabikoze binyuze mu biganiro yagiye akora ku miyoboro ya YouTube irimo uwe bwite yari yarashinze aho yagaragazaga ko ihanurwa ry’indege yarimo Perezida Habyarimana yabaye imbarutso ya Jenoside kandi ko Jenoside yakorewe abatutsi mu 1994 itateguwe.

Akurikiranyweho no kudasobanura inkomoko ya 3.142.000 z’amafaranga y’u Rwanda; 10,981 USD , ama euro 520 na 11. 004.574 Frw yasanzwe iwe mu rugo harimo amanyarwanda n’andi yari kuri mobile money ndetse n’ayo yagiye yoherezwa kuri konti ya Ecobank ya Youtube Channel ye.

Urukiko rwategetse ko Karasira Aimable akomeza gufungwa iminsi 30 y'agateganyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .