00:00:00 IGIHE NETWORK KN KINYARWANDA EN ENGLISH FR FRANCAIS

Urubanza ruregwamo CSP Kayumba rwasubitswe, humvwa inzitizi za Mutamaniwa Ephraim

Yanditswe na Nkundineza Jean Paul
Kuya 17 Nzeri 2021 saa 10:21
Yasuwe :
0 0

Urukiko rw’Ibanze rwa Nyarugenge rwasubitse gutangira kuburanisha mu mizi urubanza ruregwamo CSP Kayumba Innocent wahoze ari Umuyobozi wa Gereza ya Nyarugenge; SP Ntakirutimana Eric wari Umuyobozi wungirije na Mutamaniwa Ephraim wari ushinzwe Iperereza.

Uru rubanza rwagombaga gutangira kuburanishwa kuri uyu wa Gatanu, tariki ya 17 Nzeri 2021. Rwatangiye saa Tatu n’igice, Inteko y’umucamanza umwe n’umwanditsi w’urukiko iruburanisha, itangira ihabwa inzitizi n’umwe mu baburanyi.

CSP Kayumba Innocent yunganiwe na Me Ngirinshuti Jean Bosco; Mutamaniwa Ephraim yunganiwe na Udahemuka Tharcise mu gihe SP Eric Ntakirutimana we yagaragaye mu rukiko nta mwunganizi afite.

Abaregwa bose bakurikiranyweho ibyaha birimo kwinjira mu makuru abitse muri mudasobwa n’icyaha cy’ubujura. Bose barahakana ndetse bagasaba urukiko kurekurwa bagasanga imiryango yabo kuko muri gereza ari habi.

Mu iburanisha rya none, Umucamanza yategetse ko humvwa inzitizi zatanzwe na Mutamaniwa Ephraim wasabye Urukiko rw’Ibanze rwa Nyarugenge kumurekura akaburana ari hanze.

Yavuze ko muri uru rubanza atakiri gatozi ahubwo asigaye ari umufatanyacyaha kuko hari uwiyemereye ubwe uko yibye umunyamahanga bari bafunganywe muri Gereza ya Nyarugenge.

Mutamaniwa yasabye kurekurwa by’agateganyo kuko ubwo yafatwaga bwa mbere no mu mabazwa yose yabajijwe nka gatozi muri uru rubanza.

Yagize ati “Urubanza rugeze mu rukiko dutangiye kuburana mu mizi haboneka gatozi witwa Amani Olivier nk’uko yabyiyemereye ubwe mu rukiko atanga ubuhamya bw’uko yibye akoresheje ikoranabuhanga; ko ariwe mucurabwenge mu bujura bwakorewe Kassem Ayman Mohamed ufungiye muri Gereza ya Nyarugenge wibwe miliyoni zisaga 9 Frw.’’

Nyuma yo kwiyemerera ko yibye uwo munyamahanga, urukiko rwafashe icyemezo ko Amani Olivier abaye umuburanyi nk’abandi aho kuba umutangabuhamya w’Ubushinjacyaha.

Mutamaniwa wahoze ashinzwe Ubutasi muri Gereza ya Nyarugenge yabwiye urukiko ko yatunguwe no kubona muri dosiye yarabaye icyitso.

Ati “Nyakubahwa mucamanza ndasaba ko narekurwa by’agateganyo, hariya hantu dufungiye ni habi cyane kandi ndanababaye.’’

Me Udahemuka Tharcisse wunganira Mutamaniwa Ephraim yasabye urukiko gufungura umukiliya we agakurikiranwa ari hanze.

Yabwiye urukiko ko Mutamaniwa ariwe watanze amakuru bwa mbere ko muri Gereza hari gukorerwa ubujura bukoresheje ikoranabuhanga.

Yabibwiye Komiseri Mukuru wa RCS kandi icyo gihe abivuga byafashweho icyemezo. Ati “Ayo makuru yatanzwe ku wa 14 Nzeri 2020.’’

Yavuze ko uwo yunganira yateye akamo abayobozi be, ababwira ko CSP Kayumba Innocent afitanye imikoranire ya hafi na Amani Olivier yari igamije kwiba.

Yagize ati “Ntabwo yari gutanga ayo makuru ngo agaruke akorane nabo. Nyakubahwa mucamanza, ndasaba ko Mutamaniwa yarekurwa by’agateganyo.’’

Urukiko rwahaye umwanya Ubushinjacyaha ngo buvuge icyo butekereza ku busabe bwa Mutamaniwa, busaba ko yaguma gufungwa kugeza rufashe icyemezo ku rubanza akarekurwa cyangwa agakatirwa.

Nyuma y’impaka ndende zamaze amasaha abiri, Urukiko rwanzuye ko ubusabe bwo kurekuwa by’agateganyo kwa Mutamaniwa Ephraim bugiye gusuzumwa icyemezo kikazafatwa ku wa 21 Nzeri 2021.

Ingingo ya 97 mu gitabo cy’amategeko ahana y’u Rwanda ivuga ko iyo hatanzwe inzitizi mu rubanza runaka, inteko y’abacamanza iba isubitse iburanisha ikabanza gusuzumwa rugakomeza nyuma.

Umucamanza yavuze ko nyuma yo gusuzuma inzitizi za Mutamaniwa Ephraim iburanisha mu mizi rizakomeza ku wa 24 Nzeri 2021.

CSP Kayumba Innocent na bagenzi be ubwo bageraga ku rukiko aho bagombaga gutangira kuburana mu mizi
Aba bagabo bari abakozi ba RCS baba barinzwe bikomeye n'abacungagerza kugera no mu rukiko
Abaregwa bose bafungiye muri Gereza ya Nyanza. Bakurikiranyweho ibyaha birimo kwinjira mu makuru abitse muri mudasobwa n’icyaha cy’ubujura
Mutamaniwa Ephraim na Me Udahemuka Tharcisse bamanika amaboko bashaka kuvuguruza ibyasabwe n'Ubushinjacyaha ko akomeza gufungwa
Mutamaniwa Ephraim yangiwe kurekurwa by'agateganyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .