00:00:00 IGIHE NETWORK KN KINYARWANDA EN ENGLISH FR FRANCAIS

Ubushinjacyaha bwajuririye igifungo cyahawe Dr Gahakwa Daphrose

Yanditswe na Nkundineza Jean Paul
Kuya 1 Ukwakira 2021 saa 03:30
Yasuwe :
0 0

Muri Gicurasi 2021, Urukiko Rwisumbuye rwa Gasabo rwakatiye Dr Daphrose Gahakwa igihano cy’igifungo cy’amezi 15, runategeka ko atanga ihazabu y’ibihumbi 500 Frw nyuma yo guhamywa icyaha cyo gutanga amasoko mu buryo bunyuranyije n’amategeko.

Icyo gihe Umucamanza yavuze ko uruhande rutishimira imikirize y’urubanza rufite iminsi 30 yo kujururira icyemezo cy’urukiko. Muri Kamena 2021, Ubushinjacyaha bwajuririye icyemezo cy’Urukiko Rwisumbuye rwa Gasabo mu Rukiko Rukuru.

Amakuru aturuka mu bwanditsi bw’Urukiko Rukuru avuga ko igihe ubujurire buzaburanishirizwa kitaragenwa kuko urukiko rutanga itariki bitewe n’uko ibirego byarugezemo.

Umuvugizi w’Ubushinjacyaha, Nkusi Faustin, yemereye IGIHE ko Ubushinjacyaha bwajuririye icyemezo cyo gufunga Dr Daphrose Gahakwa ariko yirinda kuvuga ishingiro z’ubujurire bwabo.

Abajijwe impamvu z’ubwo bujurire, Nkusi yavuze ko “zizamenyekanira mu rukiko.’’

Yakomeje ati “Nimutegereze azahabwe itariki yo kuburana hanyuma impamvu z’ubujurire bwacu tuzisobanure mu rukiko, ubwo namwe muzaba muhari muzumve.’’

Dr Gahakwa Daphrose yatawe muri yombi n’Ubushinjacyaha mu Ukwakira 2020. Icyo gihe bwavuze ko bwamutaye muri yombi nyuma y’igihe bumukurikirana ku makosa yakozwe mu mitangire y’isoko ryatanzwe ryo kuhira rifite agaciro ka miliyari 1 Frw aho iryo soko ryahawe umukwe we maze umugabo we ari we Gahakwa agahita agirwa umuyobozi Mukuru w’ishyirwa mu bikorwa ry’uwo mushinga.

Uyu mugore wigeze kuba Minisitiri w’Uburezi akaba n’Umunyamabanga wa Leta muri Minisiteri y’Ubuhinzi n’Ubworozi, Ubushinjacyaha bwamukurikiranyeho ibyaha bimunga ubukungu bw’igihugu birimo icyaha cyo kunyereza umutungo wa Leta n’icyo guha isoko umuntu utabifitiye Ububasha.

Ubushinjacyaha bwajuririye icyemezo urukiko rwafatiye Dr Daphrose Gahakwa mu gihe abura amezi atatu ngo arangize igihano yakatiwe; mu gihe yasoza igihano cy’amezi 15 yahawe, yarekurwa akazaburana ubujurire adafunze.

Dr Gahakwa Daphrose yahanishijwe igifungo cy’umwaka umwe n'amezi atatu ahamijwe icyaha cyo gutanga amasoko mu buryo bunyuranyije n’amategeko. Ni icyemezo Ubushinjacyaha bwahise bujuririra

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .