00:00:00 IGIHE NETWORK KN KINYARWANDA EN ENGLISH FR FRANCAIS

Dr Sebaganwa yahamagajwe nk’umutangabuhamya, ashinja Dr Munyakazi wahoze ari umukoresha we

Yanditswe na Nkundineza Jean Paul
Kuya 29 Nzeri 2021 saa 08:38
Yasuwe :
0 0

Umuyobozi Mukuru w’Ishami rishinzwe Ibizamini n’Isuzumabumenyi mu Kigo cy’Igihugu gishinzwe Uburezi (REB), Dr Sebaganwa Alphonse yitabye urukiko asobanura uko Dr Isaac Munyakazi wahoze ari Umunyamabanga wa Leta muri Minisiteri y’Uburezi na nyiri Good Harvest School, Gahima Abdul bamuhaye ruswa kugira ngo iki kigo kize imbere mu bizamini bya Leta.

Kuza mu rubanza kwa Dr Sebaganwa Alphonse nk’umutangabuhamya kwategetswe n’Inteko Iburanisha mu Rukiko Rukuru kugira ngo asobanure uburyo yahawe ruswa na Gahima Abdul.

Ubushinjacyaha buvuga ko Dr Munyakazi Isaac yahamagaye Dr Sebaganwa Alphonse, bahurira mu Mujyi wa Kigali ahazwi nka Camp Kigali.

Icyo gihe ngo Munyakazi yakiriye Sebaganwa mu modoka ye hanyuma amubwira ko afite inshuti ye yitwa Gahima Abdul ufite ikigo, akaba akeneye ubufasha ngo kizaze mu bigo icumi byatsinze neza mu Rwanda n’abanyeshuri be bakaza imbere.

Ngo Dr Sebaganwa yaje kubyanga, amwereka ingaruka byamugiraho ariko undi akomeza kumuhatiriza amwumvisha ko namufashiriza Gahima, na we azamufasha mu gihe cyose akiri Umunyamabanga wa Leta Ushinzwe Amashuri Abanza n’Ayisumbuye muri Mineduc.

Sebaganwa yaje kumwemerera, baratandukana barataha. Ngo hashize iminsi Dr Sebaganwa, Dr Munyakazi na Gahima bahuriye kuri hoteli imwe ku Kimironko, bicara mu modoka. Gahima na Munyakazi ngo bijeje Sebaganwa ko nabafasha ikigo kikaza mu myanya ya mbere, bazamushimira.

Ibi koko ngo ni ko byaje kugenda kuko tariki 31 Ukuboza 2019, amanota yarasohotse, Good Harvest iza ku mwanya wa cyenda mu gihugu, ndetse abanyeshuri bayo babiri bashyirwa mu icumi ba mbere.

Nyuma y’igihe gito aya manota asohotse bikagaragara ko iki kigo cyashyizwe mu myanya y’imbere ngo Munyakazi yahamagaye Gahima na Sebaganwa, bahurira muri restaurant i Nyarutarama, basangira ibyo kurya bya saa Sita. Ngo bari gusangira, Gahima yatse Dr Sebaganwa urufunguzo rw’imodoka ye, aragenda arafungura ashyiramo ibihumbi 500 Frw.

Mu kuburana Gahima ahakana iki cyaha cya ruswa agasaba ko apimwa intoki cyangwa hakifashishwa camera z’aho Dr Sebaganwa avuga ko yayamuhereye ari nabyo byatumye uyu mugabo ahamagazwa muri uru rubanza nk’umutangabuhamya.

Mu iburanisha ryo ku wa 10 Nzeri 2021, ubwo umucamanza yahaga umwanya Dr Sebaganwa Alphonse ngo asobanurire uko yahawe ruswa na Gahima Abdul na Dr Isaac Munyakazi, yavuze ko ari umugambi watangiye mu 2020.

Yavuze ko yasabwe na Dr Isaac Munyakazi gushyira mu myanya ya hafi ishuri rya Gahima ryitwa Good Harvest, ngo icyo gihe yamwijeje ko nta kintu azamuburana akiri mu buyobozi.

Dr Sebaganwa yakomeje avuga ko inshuro zose yagiye ahura na Dr Munyakazi yabaga ari kumwe na Gahima kugira ngo bategure uwo mugambi neza wo gushyira iri shuri mu myanya ya hafi.

Yavuze ko ibyo yakoraga byose yabaga yabanje kubimenyesha Urwego rw’Igihugu rw’Ubugenzacyaha (RIB). Yahise abwira urukiko ko RIB yahise imuha igikoresho gifata amajwi kugira ngo ibiganiro byose azajya agirana na bo ajye abifata amajwi.

Dr Sebaganwa yavuze ko amajwi yafashe hatumvikanamo Dr Isaac Munyakazi ko ahubwo humvikana neza amajwi ya Gahima Abdul.

Umucamanza yahise amubaza impamvu humvikana amajwi y’umuntu umwe gusa, amusubiza ko byatewe n’uko bari bicaye.

Dr Sebaganwa yavuze ko umugambi wo guhabwa ruswa wabereye muri imwe muri hotel iherereye Kimironko.

Ati “Twageze muri iyo hoteli turi gusangira, Gahima afata urufunguzo rw’imodoka yanjye mbanza kugira impungenge z’ukuntu anyatse urufunguzo.”

“Dr Munyakazi yahise ambwira ko nta kibazo ko ahubwo yareka Gahima akajya kunshyiriramo akantu k’ishimwe mu modoka yanjye kuko umugambi wo gushyira ishuri rye mu myanya y’imbere wari waramaze gukorwa.”

Yakomeje agira ati “Gahima yahise ava aho twari turi afata urufunguzo rw’imodoka yanjye ashyiramo ibihumbi 500 Frw. Ayashyira munsi y’intebe ya shoferi. Ayo mafaranga nasanze ari inoti za 2000 Frw, zose nsanga ni ibihumbi 500Frw.”

Yavuze ko akimara guhabwa ayo mafaranga yahise ayashyikiriza RIB. Ati “Maze gutandukana na bo nanjye nahise njya kureba Umugenzacyaha nk’uko nari nabisabwe mbaha amakuru y’uko ibintu byose byagenze amafaranga nyasiga kuri RIB urugendo rwo gutangira gukurikirana aba bagabo rutangira ubwo.”

Umucamanza yabajije Dr Sebaganwa icyamuteye gukora ibyo bikorwa byose; asubiza ko ibyo yakoze byose yabikoze yirengera mu mpamvu z’umutekano we kuko ibyo yasabwaga gukora yabisabwaga na Minisitiri kandi ari n’umuyobozi we.

“Gahima yahakanye ibyo ashinjwa, ati "Ibyo si byo”

Urukiko rwahise ruha umwanya Gahima Abdul ngo asobanure uko yashyize ibihumbi 500 Frw mu modoka ya Dr Sebaganwa Alphonse. Yasobanuye ko ibyavuzwe na Dr Sebaganwa atari byo kuko ibyo yavuze byose nta bimenyetso yabitangiye.

Yakomeje avuga ko niba ayo mafaranga Dr Sebaganwa yarayahaye RIB ikibazo gihise cyoroha.

Ati “Ndasaba ko napimwa intoki zanjye nk’uko nakomeje kubisaba mu bihe bitandukanye hagapimwa ayo mafaranga urukiko rugasuzuma koko niba ari amafaranga yanjye koko.”

Gahima yakomeje abaza impamvu niba RIB yarahaye Dr Sebaganwa icyuma gifata amajwi itanabaye hafi y’aho icyo cyaha cya ruswa cyakorewe kugira ngo ibafatire mu cyuho.

Nyuma yo kumva Gahima Abdul, urukiko rwahaye umwanya Dr Isaac Munyakazi ngo agire icyo avuga ku byavuzwe na Dr Sebaganwa Alphonse.

Uyu mugabo yabwiye urukiko ko nta mfunguzo yatse Dr Sebaganwa ko ahubwo izo mfunguzo yazatswe na Gahima ubwe aho yamubwiye ko ari akantu agiye gushyira mu modoka ye.

Dr Munyakazi yakomeje avuga ko Dr Sebaganwa yemereye urukiko ko nta majwi ye yumvikana bategura umugambi wa ruswa, yemeza ko ibyo ubwabyo byerekana ko mu byo yavuze harimo n’ibyo yabeshye ku mpamvu ze zo kujijisha urukiko.

Ati “Waba wicaranye n’abantu muri mu biganiro hakumvikana amajwi y’umuntu umwe gusa mwe murumva byumvikana.”

Me Munyeshema wunganira Dr Isaac Munyakazi yasabye urukiko kubaza Dr Sebaganwa niba ubwo yahuraga bwa mbere n’umukiliya we muri Camp Kigali bategura umugambi wo gushyira Good Harvest mu myanya ya hafi hari undi muyobozi yabimenyesheje wo muri REB.

Ubushinjacyaha bwahawe umwanya ngo bugire icyo buvuga ku byavuzwe byose. Bwavuze ko kuba umutangabuhamya yaje mu rukiko byakuyeho igihu cy’ibyavugwaga n’ubushinjacyaha.

Buti “Namwe mwumvishe ko yasobanuye neza cyane uko yahawe iyo ruswa.”

Ubushinjacyaha bwabwiye urukiko ko impamvu RIB itafatiye mu cyuho abaregwa ari uko Dr Isaac Munyakazi yari Umunyamabanga uhoraho muri Minisiteri y’Uburezi, umwanya watumaga bitoroha ko RIB yaza ngo ifate umuntu nk’uwo idafite ibimenyetso byuzuye.

Ubushinjacyaha bwasabye urukiko ko ibyavuzwe na Dr Sebaganwa Alphonse byose byafatwa nk’ukuri.

Nyuma y’amasaha ane urukiko rwumva impande zombi n’ubuhamya bwatanzwe na Dr Sebaganwa Alphonse rwategetse ko ayo majwi yafashe yanagendeweho Ubushinjacyaha bukurikirana abaregwa yabanza akumvwa n’impande zombi ziregwa muri uru rubanza.

Rwategetse ko Dr Isaac Munyakazi n’umwunganizi we na Gahima Abdu n’umwunganizi we, ayo majwi bazayisobanuraho mu iburanisha ritaha.

Ubwo byari byitezwe ko abaregwa basobanurira urukiko iby’amajwi bafashwe na Dr Sebaganwa Alphonse ahabwa ruswa y’ibihumbi 500 Frw, Gahima Abdul yatanze inzitizi z’uko arwaye, urubanza umucamanza ararwimurira ku wa 1 Ukwakira 2021 Saa Mbiri za mu gitondo.

Dr Sebaganwa Alphonse ubwo yasohokaga mu Rukiko Rukuru nyuma yo gutanga ubuhamya bw'uko yahawe ruswa ngo ishuri rya Good Harvest rize imbere mu bizamini bya Leta

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .