00:00:00 IGIHE NETWORK KN KINYARWANDA EN ENGLISH FR FRANCAIS

Ubuhamya bw’abagore bafashijwe gusohoka mu bibazo by’akarengane k’igihe kirekire

Yanditswe na Ntabareshya Jean de Dieu
Kuya 7 Kamena 2021 saa 08:42
Yasuwe :
0 0

Ubuyobozi bw’Umuryango utari uwa leta ufasha abagore n’abana kubona ubutabera Hagaruka, buvuga ko ukomeje gutanga ubufasha mu by’amategeko ku bafite ibibazo bisa n’ibyananiranye, abahawe ubu bufasha bakaba bavuga ko nyuma yo kubona ubutabera byabahaye ubuzima bushya.

Umuryango Haguruka, usanzwe ufasha abagore bahuye n’akarengane mu buryo butandukanye, byaba ihohoterwa ribakorerwa, kwamburwa imitungo, kuriganywa n’ibindi bisaba kujya mu nkiko.

Umwe mu batanze ubuhamya utuye mu Karere ka Nyarugenge mu Murenge wa Kigali, yavuze uburyo yari yaratereranywe n’uwamuteye inda akabura ubutabera igihe kirekire ariko akaza gufashwa n’uyu muryango.

Yagize ati "Natewe inda n’umugabo ntiyagira icyo amfasha, nerekeza mu buyobozi ariko bitewe n’uko uwo mugabo yari akomeye. Bantegetse ko nkoresha ibizamini bya DNA yatsindwa nkazasubizwa amafaranga. Nagannye Haguruka maze baramfasha, nibo banyishyuriye ikiguzi cya DNA kandi byagenze neza. Nari maze imyaka 11 ndera impanga jyenyine.”

Mugenzi we utuye mu Karere ka Bugesera avuga ko yahawe umunyamategeko umufasha kugaruza ubutaka bwe yari agiye kuriganywa n’undi ikibazo cye kirakemuka.

Ati "Ubu ndishimira ko nasubijwe ubutaka bwanjye nkaba mbukoresha. Nari narihebye nayobewe aho ngana ngo bamfashe, aho ngeze hose bikanga ariko nkumva ari akarengane. Maze kubona umuntu umfasha nahise numva ntekanye.”

Umunyamabanga Nshingwabikorwa w’Umuryango Haguruka, Ninette Umurerwa, yavuze ko basanga intego yabo yo gutanga ubutabera iri gutanga umusaruro ndetse ko bifuza gukomeza kurushaho kwegera abaturage.”

Yagize ati "Muri 1991 Haguruka ishingwa, umugore ntiyitabwagaho kandi n’indi miryango yabitagaho yibandaga ku kububakira ubukungu, twabonaga ko mu mategeko ibintu bikiri imbogamizi aba ari byo twibandaho kandi ubu biri kugenda bijya mu buryo. Ubu dufite gahunda yo kwegera abantu kugira ngo bamenye ko duhari binyuze mu buryo butandukanye burimo itangazamakuru ndetse no kurushaho kubasanga aho bari mu tugari."

Nubwo ari umuryango ufite intego yo gufasha umugore n’umwana ariko mu bamaze gufashwa harimo n’abagabo dore ko kuva muri 2018, 30% by’abafashijwe ari abagabo.

Umurerwa yagize ati "Imyumvire yo gufasha abagabo na bo ni uko turi gufasha umuryango kubaka ubushobozi, kandi ni wa muryango ugizwe n’umugore n’umugabo n’umwana. Iyo dutanga amahugurwa rero ntidutoranya bityo iyo na bo bashaka ubufasha turabubaha ariko intego nyamukuru ni ugufasha abana n’abagore."

Yasabye ko buri muturarwanda yaharanira kugira urugo rw’amahoro n’ubumwe n’ubwiyunge hagati yabo ariko asaba n’uwaba yahuye n’ihohoterwa gutinyuka akegera inzego bireba aho kwicecekera kandi yarenganyijwe.

Mu bibazo bikunze kugaragara cyane ku bantu bagana Haguruka ku isonga hari iby’abaterwa inda, abazibateye bakabyihunza bashaka gukoresha ibizamini bya ADN ngo hamenyekane ukuri (Paternity search), amakimbirane ashingiye ku butaka ndetse no kuri za gatanya mu bashakanye.

Umuryango Haguruka uvuga ko mu myaka itatu ishize, imaze guha ubufasha bw’amategeko abantu 6509 bagizwe n’abagore 70% n’abagabo 30%. Kuri ubu kandi bakorera mu gihugu hose kuko muri buri Ntara bafitemo ibiro ndetse bakagira n’abafasha mu by’amategeko 416, bivuze ko bafite umwe kuri buri murenge, bakagira n’umurongo utishyurwa 4311 abantu bashobora guhamagara mu gihe barenganye.

Bamwe mu bagenerwabikorwa ba Haguruka bavuze ko ubufsha bw'uyu muryango bwabagejeje mu buzima bushya
Umunyabanga Nshingwabikorwa wa Haguruka yasabye ko Abanyarwanda baharanira kuba mu muryango urangwa n'amahoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .