00:00:00 IGIHE NETWORK KN KINYARWANDA EN ENGLISH FR FRANCAIS

U Bufaransa: Urukiko ruri kumva abatangabuhamya ku byaha Muhayimana Claude ashinjwa

Yanditswe na Karirima A. Ngarambe
Kuya 25 Ugushyingo 2021 saa 04:47
Yasuwe :
0 0

Urukiko rwo mu Bufaransa ruri kumva abatangabuhamya barimo n’abavuye mu Rwanda boherejwe n’ubushinjacyaha mu gushaka amakuru yerekeye ibyaha Muhayimana Claude ukekwaho Jenoside ashinjwa.

Muhayimana akurikiranyweho ibyaha bya Jenoside byabereye mu misozi ya Bisesero no ku ishuri ry’i Nyamishaba (Ecole Agro-forestière) mu yahoze ari Kibuye.

Urubanza rwe mu Bufaransa rwatangiye ku wa Mbere w’iki cyumweru nimugoroba ariko ntiruratangira mu mizi.

Kumuburanisha byaje nyuma y’aho Ihuriro rya sosiyete sivile riharanira ko abakurikiranyweho bagezwa imbere y’ubutabera (CPCR) risabye ko yoherezwa mu Rwanda ngo akurikiranwe n’inkiko zo mu gihugu ariko u Bufaransa bukabyanga.

Umunyamategeko w’iri huriro Me Gisagara Richard, yabwiye IGIHE ko ubu hari kumvwa abatangabuhamya basobanurira inteko iburanisha kuko irimo n’abacamanza batari ab’umwuga bakeneye kumenya Jenoside n’u Rwanda kugira ngo bazabone uko bafata umwanzuro niba ibyaha Muhayimana ashinjwa bimuhama.

Ati "Urukiko nk’urwo rugizwe n’abacamanza batatu b’umwuga n’abandi baturage batandatu umuntu yagareranya n’inyangamugayo batandatu bakaba ari bo bazafata icyemezo niba koko ibyaha ashinjwa bimuhama. Usibye abacamanza b’umwuga bashobora kuba basobanukiwe neza n’icyaha cya Jenoside n’amateka y’u Rwanda, abo baturage bandi nta cyemeza ko babizi.”

"Niyo mpamvu rero mu minsi ya mbere twibanda ku kubasobanurira, kubabwira u Rwanda aho ruri, uko Jenoside yakozwe, ubwoko hutu, tutsi, twa, byose kugira ngo babashe kubyumva.”

Mu batangabuhamya harimo abashakashatsi bazi neza Jenoside yakorewe Abatutsi n’amateka y’u Rwanda barimo nka Patrick de Saint Exupéry n’abandi.

CPCR ni yo yatanze ikirego kimaze kwakirwa ubushinjacyaha butangira akazi kabwo igihe kigeze urwego rushinzwe kugenza ibyaha rwohereje abajandarume mu Rwanda gukora iperereza ku byaha Muhayimana akekwaho.

Icyemezo cyo kumujyana mu rukiko cyafashwe bimaze kugaragara ko hari ibimenyetso byerekana ko ibyo byaha ashobora kuba yarabikoze. Me Gisagara avuga ko iki cyemezo uregwa yabanje kukijuririra ariko biranga.

Biteganyijwe ko uru rubanza ruzasozwa ku wa 17 Ukuboza 2021 rukaba rutegerejwemo abatangabuhamya bagera kuri 50.

Muhayimana yari umushoferi wa hotel yari mu nkengero z’ikiyaga cya Kivu ku Kibuye. Ashinjwa ko yatwaraga abantu bagiye mu bikorwa byo kwica Abatutsi ku misozi yo hirya no hino muri Kibuye ahakana ibyaha byose aregwa akavuga ko atari ku Kibuye ubwo ubwicanyi bwakorwaga.

Uyu mugabo yabonye ubwenegihugu bw’u Bufaransa mu 2010 nyuma y’igihe kinini abayo nk’impunzi. Yatawe muri yombi mu 2014 afatiwe ahitwa Rouen aho yari asanzwe atuye.

Urubanza rwa Muhayimana Claude rwatangiye ku wa Mbere w'iki cyumweru mu Bufaransa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .