00:00:00 IGIHE NETWORK KN KINYARWANDA EN ENGLISH FR FRANCAIS

Pauline Nyiramasuhuko yangiwe gufungurwa atarangije ibihano

Yanditswe na IGIHE
Kuya 18 Ugushyingo 2021 saa 12:51
Yasuwe :
0 0

Urwego rwasigaranye imirimo y’Urukiko Mpuzamahanga rwashyiriweho u Rwanda i Arusha muri Tanzania (IRMCT) rwatesheje agaciro ubusabe bwa Pauline Nyiramasuhuko bwo kurekurwa atarangije ibihano yakatiwe nyuma yo guhamywa ibyaha birimo ibya Jenoside yakorewe Abatutsi.

Pauline Nyiramasuhuko yafatiwe muri Kenya muri Nyakanga 1997 ashyikirizwa Urukiko Mpuzamahanga rwashyiriweho u Rwanda (ICTR).

Ku wa 24 Kamena 2011 yahamwe n’ibyaha bya jeonside ahanishwa igifungo cya burundu hamwe n’umuhungu we Arsène Shalom Ntahobari.

Mu Ukuboza 2015 Urugereko rw’Ubujurire rwagabanyije igihano cya burundu cyari cyarakatiwe abo bombi, Nyiramasuhuko ahabwa imyaka 47 n’umuhungu we biba bityo.

Muri Nyakanga 2018 Nyiramasuhuko yajyanwe muri Sénégal kuba ari ho asoreza igihano cy’igifungo yari asigaje.

Uyu mugore yatanze ubusabe bwe ku wa 24 Nzeri 2021 nk’uko byatangajwe na Perezida wa IRMCT, Carmel Agius.

Carmel yavuze ko impamvu Nyiramasuhuko yatanze zishingiye ku kuba ubuzima bwe butameze neza.

Nyuma y’ubusabe bwe, Carmel avuga ko yasabye raporo y’inzego z’ubuzima muri Sénégal zirayimushyikiriza asanga nta kimenyetso na kimwe kigaragaza ko ubuzima bwa Nyiramasuhuko butameze neza ku buryo byamuhesha kurekurwa nk’uko yabigaragaje.

Akomeza avuga ko yagishije inama abacamanza barimo William H. Sekule na Liu Daqun bose bari mu rugereko rwaciriye urubanza Nyiramasuhuko agasanga bahuje imyumvire kuri ubu busabe.

Yongeyeho ko nubwo IRMCT yemerewe kurekura abarangije 2/3 by’igifungo cyabo kuri Nyiramasuhuko iki gihe kizagera mu 2027.

Ikindi ngo ntabwo Sénégal yigeze igaragaza niba Nyiramasuhuko yemerewe kurekurwa atarangije igihano hashingiwe ku mategeko y’iki gihugu.

IRMCT ivuga ko haramutse habayeho impamvu zidasanzwe kurekurwa mbere byakwemerwa nubwo umuntu yaba ataramara 2/3 by’igihano cye muri gereza.

Nyiramasuhuko yahoze ari Minisitiri w’Umuryango kuva mu 1992 kugeza mu 1994 muri Guverinoma yayoborwaga na Jean Kambanda. Yavukiye mu yahoze ari Komini Ndora muri Perefegitura ya Butare muri Mata 1946.

Pauline Nyiramasuhuko wahoze ari Minisitiri w'Umuryango yangiwe kurekurwa atarangije ibihano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .