00:00:00 IGIHE NETWORK KN KINYARWANDA EN ENGLISH FR FRANCAIS

Nsengiyumva François “Igisupusupu” yajuririye icyemezo cyo gufungwa by’agateganyo

Yanditswe na Nkundineza Jean Paul
Kuya 1 Kanama 2021 saa 09:19
Yasuwe :
0 0

Umuhanzi Nsengiyumva François uzwi nk’Igisupusupu ufunzwe akekwaho gusambanya umwana w’imyaka 13 yajuririye icyemezo aherutse gufatirwa n’Urukiko rw’Ibanze rwa Kiramuruzi cyo gufungwa by’agateganyo iminsi 30.

Urukiko rwafashe uwo mwanzuro rushingiye ku kuba iperereza rigikomeje kandi ibyaha akurikiranyweho bihanishwa igifungo kiri hejuru y’imyaka ibiri ku muntu wabihamijwe.

Nsengiyumva w’imyaka 44 uhakana icyaha ashinjwa, yahise ajuririra uwo mwanzuro.

Me Boniface Nizeyimana wunganira Nsengiyumva, yabwiye IGIHE ko bahise bajurira kuko batemera umwanzuro wafashwe.

Yagize ati “Twahise tujuririra mu Rukiko Rwisumbuye rwa Nyagatare, dutegereje guhabwa itariki yo kuburana ubujurire bwacu”.

Nizeyimana yavuze ko bajuriye kuko uwo yunganira icyo cyaha cyo gusambanya umwana ntacyo yakoze. Yavuze ko bizeye ko mu bushishozi bw’urukiko, nirushingira ku bimenyetso batanze byose ruzahita rumugira umwere akarekurwa.

Yavuze ko uwo yunganira afite abatangabuhamya bamushinjura bazagaragarizwa Urukiko Rwisumbuye rwa Nyagatare.

Umuhanzi Nsengiyumva François yatawe muri yombi ku wa 30 Kamena 2021 akekwaho icyaha cyo gusambanya umwana utarageza imyaka y’ubukure w’imyaka 13.

Ku wa 22 Nyakanga 2021 ni bwo bwa mbere Nsengiyumva yagejejwe imbere y’urukiko aburana ku ifunga n’ifungurwa ry’agateganyo.

Umwana Nsengiyumva ashinjwa gusambanya, umuryango we ugaragaza ko yavutse mu 2008. Icyaha cyo gusambanya uwo mwana bivugwa ko cyakozwe ku matariki ya 17 na 18 Kamena 2021.

Uwo mwana ngo yageze kwa Nsengiyumva agiye gukora akazi ko mu rugo, nubwo Nsengiyumva we avuga ko yari yamuhawe n’ababyeyi be kuko aho yabaga mbere batamufataga neza.

Ubushinjacyaha buvuga ko Nsengiyumva yasambanyije uwo mwana ahamaze iminsi ibiri, akabikora umugore we adahari yagiye guhinga.

Ubushinjacyaha kandi buvuga ko uregwa yakoze icyaha, bushingiye kuri raporo ya muganga igaragaza ko umwana mu gitsina cye hinjiyemo intoki ebyiri kandi akaba arwaye imwe mu ndwara zandurira mu mibonano mpuzabitsina basanganye na Nsengiyumva.

Nsengiyumva we yaburanye ahakana icyaha, akavuga ko ibyakozwe ari ibyahimbwe n’umuryango w’uwo mwana kugira ngo bamufungishe.

Yavuze ko uwo mwana koko yari yaje kuba iwe kuko aho yabaga yafatwaga nabi, kandi ko ajya kuhaza umuryango wari ubizi.

Nsengiyumva aramutse ahamijwe n’urukiko icyaha cyo gusambanya umwana utarageza imyaka y’ubukure yahanishwa igihano cy’igifungo cya burundu.

Nsengiyumva yajuririye umwanzuro w'urukiko ku cyaha akurikiranyweho cyo gusambanya umwana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .