00:00:00 IGIHE NETWORK KN KINYARWANDA EN ENGLISH FR FRANCAIS

Me Mitali Kalvin washinjwaga gukoresha inyandiko mpimbano yagizwe umwere

Yanditswe na Nkundineza Jean Paul
Kuya 5 Ukwakira 2021 saa 07:34
Yasuwe :
0 0

Urukiko Rwisumbuye rwa Nyarugenge rwagize umwere Me Mitali Kalvin wari ukurikiranyweho icyaha cyo guhimba no gukoresha inyandiko mpimbano.

Me Mitali Kalvin yarezwe muri iki kirego gikomoka mu rubanza rwabereye mu Rukiko rw’Ubucuruzi, rwahuje Dusabimana Béatrice n’Ikigo Hima Cement Uganda Ltd gicuruza sima, asanzwe yunganira mu mategeko.

Dusabimana yavuze ko yagiranye amasezerano n’iki kigo, yo guhabwa sima akishyura mu mwaka, mu gihe Hima Cement yavugaga ko impande zombi zemeranyije ko azajya yishyura mu minsi itarenze 15.

Urukiko rwafashe impapuro zombi ruzijyana kuzisuzumisha muri laboratwari ibifitiye ubushobozi, yanzura ko amasezerano yemeza ko ubwishyu buzajya bubaho nyuma y’iminsi 15 atari yo, kuko umukono na kashi bitameze nk’uko ibya Dusabimana bimeze, ndetse ko iyi nyandiko yasinyweho n’uruhande rumwe kandi bigaragara zombi zari buyasinyeho.

Me Mitali witabye urukiko yunganiwe na Me Mutangana Jean Bosco wigeze kuba Umushinjacyaha Mukuru, Me Nkundabarashi Moïse wunganiye Nsabimana Callixte “Sankara” mu rubanza rwa FLN na Me Rutabingwa Athanase wigeze kuba Perezida w’Urugaga rw’Abavoka mu Rwanda, yaburanye ahakana icyaha ashinjwa.

Yavuze ko atari azi ko iyo nyandiko ifite ibibazo kuko ngo yayishyikirijwe n’umukozi wa Hima Cement.

Ubushinjacyaha bwavuze ko ibyo Me Mitali avuga nta bimenyetso abitangira, bityo bidakwiye gufatwa nk’ukuri. Bwanasobanuye ko uwo mugambi awuzi kuko asanzwe ari mu Nama y’Ubutegetsi ya Hima Cement, akaba ari na we mwunganizi wayo mu mategeko.

Nyuma yo gutanga ibimenyetso bushingiraho bumushinja, Ubushinjacyaha bwasabiye Me Mitali Kalvin gufungwa imyaka irindwi, ndetse no gutanga ihazabu ya miliyoni 3 Frw, mu gihe Hima Cement yasabiwe gutanga ihazabu ya miliyoni 5 Frw.

Ubwo Urukiko Rwisumbuye rwa Nyarugenge rwatangazaga umwanzuro ku wa Mbere, tariki ya 4 Ukwakira 2021, umucamanza yavuze ko Me Mitali adahamwa n’icyaha cyo guhimba no gukoresha inyandiko mpimbano.

Rwahanishije Hima Cement Uganda Ltd gutanga ihazabu ya miliyoni 5 Frw nyuma yo kuyihamya icyaha cyo gukoresha gukoresha inyandiko mpimbano.

Umucamanza yibukije ko uruhande rutanyuzwe n’icyemezo cy’urukiko afite iminsi 30 yo kujuririra mu Rukiko Rukuru.

Me Mitali Kalvin washinjwaga gukoresha inyandiko mpimbano yagizwe umwere
Urukiko Rwisumbuye rwa Nyarugenge ni rwo rwaburanishije urubanza rwaregwagamo Me Mitali Kalvin

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .