00:00:00 IGIHE NETWORK KN KINYARWANDA EN ENGLISH FR FRANCAIS

Kigali: Babiri bakurikiranyweho kwica umuntu bamukubise fer-à- beton basabiwe gufungwa by’agateganyo

Yanditswe na Nkundineza Jean Paul
Kuya 11 Ugushyingo 2021 saa 08:54
Yasuwe :
0 0

Urukiko rw’Ibanze rwa Nyarugenge ku wa Gatatu rwatangiye kuburanisha abagabo babiri bakurikiranyweho icyaha cyo gukubita no gukomeretsa ku bushake uwitwa Munyankindi Emmanuel bikamuviramo urupfu.

Abaregwa ni Habimana Thomas na Bucyeye Callixte bashinjwa icyaha bakoze ku wa 25 Ukwakira 2021 mu Karere ka Nyarugenge, Umurenge wa Kimisagara mu Kagari ka Kamuhoza, aho Bucyeye Callixte na Habimana Thomas bakubise fer-à- beton Munyankindi Emmanuel mu mutwe.

Ubushinjacyaha buvuga ko Munyankindi akimara gukubitwa yajyanwe mu Bitaro bya CHUK yagera kwa muganga agahita ajya muri koma maze ku wa 1 Ugushyingo agahita ashiramo umwuka.

Habimana Thomas ni we wari ufite umunyamategeko umwunganira ari we Me Tuyisenge Tito Théogène mu gihe Bucyeye Callixte yabwiye umucamanza ko yiteguye kwiburanira kuko nta munyamategeko yashatse.

Ubushinjacyaha bwabasabiye gufungwa iminsi 30 y’agateganyo kubera uburemere bw’icyaha bakurikiranyweho cyane ko mu gihe bahamwa n’icyaha bahanishwa igihano kiri hejuru y’imyaka ibiri.

Habimana Thomas yabwiye urukiko ko ibyavuzwe n’Ubushinjacyaha atabyemera ko n’icyaha cyo gukubita Munyankindi Emmanuel fer-à- beton atabyemera ahubwo asaba urukiko kumurekura kuko adashobora gutoroka ubutabera.

Me Tuyisenge Tito Théogène wunganira Habimana Thomas yabwiye urukiko ko gukurikirana umuntu afunze atari ryo hame kuko amategeko ateganya ko umuntu ashobora gukurikiranwa adafunze, ko ahubwo urukiko rushobora gutegeka umuburanyi iminsi azajya yitaba ubushinjacyaha ariko ntafungwe.

Me Tuyisenge yahise asaba urukiko ko igihe uru rubanza ruzaba rutangiye kuburanishwa mu mizi rwazabera aho icyaha cyabereye. Yavuze ko nyakwigendera Munyankindi Emmanuel yari asanzwe afite ikibazo cy’uburwayi bwo mu mutwe ndetse n’iyo mirwano akaba ari we wayitangiye.

Ati “N’iyo fer-à- beton ni Munyankindi wayizanye aje kuyikubita Habimana Thomas nuko amurusha imbaraga arayimwaka imirwano itangira ubwo bimuviramo urupfu.”

Ibyo uyu munyamategeko yavuze byazamuye amarangamutima ya bamwe mu rukiko babifashe nko gushinyagurira uwapfuye bituma ubushinjacyaha bubaza Me Tuyisenge Tito Théogène niba abantu bose bafite ubumuga bwo mu mutwe bicwa.

Bucyeye Callixte we yemeye ko yakubise Munyankindi mu rwego rwo gukiza amagara ye kuko na we yarimo kumudiha akaba atari azi ko byamuviramo urupfu.

Iri buranisha ryamaze amasaha abiri umucamanza yumva impande zombi. Yarisoje avuga ko uru rubanza ruzasomwa ku wa 15 Ugushyingo 2021 saa Munani z’igicamunsi.

Mu gihe abaregwa bahamwa n’icyaha cyo gukubita no gukomeretsa byavuyemo urupfu, bahanishwa igihano cy’igifungo kiri hagati y’imyaka 15 itarenze imyaka 20 nk’uko biteganywa n’ingingo ya 121 y’itegeko no 68/2018 ryo ku wa 30 Kanama 2018 riteganya ibyaha n’ibihano muri rusange.

Ubwo abaregwa bari bamaze kuburana basubijwe aho bafungiye kuri Sitasiyo ya Polisi ya Rwezamenyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .