00:00:00 IGIHE NETWORK KN KINYARWANDA EN ENGLISH FR FRANCAIS

CSP Kayumba na bagenzi be basabiwe gufungwa imyaka itanu

Yanditswe na Nkundineza Jean Paul
Kuya 12 Ugushyingo 2021 saa 03:31
Yasuwe :
0 0

Uwahoze ari umuyobozi wa Gereza ya Nyarugenge, CSP Kayumba Innocent na bagenzi be basabiwe igihano cy’igifungo cy’imyaka itanu n’ihazabu ya miliyoni ebyiri z’amafaranga y’u Rwanda.

Ibi bihano ubushinjacyaha bwabisabye kuri uyu wa Gatanu mu Rukiko rw’Ibanze rwa Nyarugenge.

Abaregwa bose bari bararangije kwiregura ku byaha byose bacyekwagaho mu iburanisha ryabaye ku wa 29 Ukwakira 2021.

Ubushinjacyaha bwabwiye urukiko ko ababuranyi bose bubasabira ibihano bimwe kuko bose ari abafatanyacyaha ku gikorwa cy’ubujura cyakorewe umufungwa Kassem Ayman Mohamed.

Ubushinjacyaha bwavuze ko nubwo SP Eric Ntakirutimana na Mutamaniwa Ephraim bubafata n’ibyitso mu gikorwa cy’ubujura, umugambi wakozwe bari bawuhuriyeho.

Ubushinjacyaha bwasabye urukiko ko CSP Kayumba Innocent rwazamuhanya ibyaha byose akekwaho birimo ubujura, icyaha cyo kwinjira mu makuru abitse muri mudasobwa n’icyo kwiyitirira umwirondoro utari uwe.

Bwakomeje buti "Turasabira CSP Kayumba Innocent igihano cy’igifungo cy’imyaka itanu n’ihazabu ya miliyoni ebyiri z’amagfaranga y’u Rwanda. Ibi bihano ni na byo dusabiye SP Eric Ntakirutimana ndetse na Mutamaniwa Ephraim.”

Twizere Amani Olivier we bwasabye ko atahabwa ibihano kuko yafashije ubushinjacyaha kumenya amakuru menshi ku baregwa.

Mutamaniwa Epharaim usanzwe wunganirwa na Me Idahemuka Tharcisse yabwiye urukiko ko kuva yatangira kubazwa mu bugenzacyaha no mu bushinjacyaha yewe no mu rukiko ubwo yatangiraga kuburana mu mizi atigeze yemera ibyaha byose bumukekaho ko kandi n’ubu ari wo murongo agihagazeho.

Yavuze ko ibyamubayeho byose bituruka ku kagambane yakorewe na CSP James Mugisha, Umuyobozi Mukuru w’Urwego rw’Ubutasi muri RCS kuko atigeze acana uwaka na we kuva yahabwa inshingano zo gukurira iperereza muri Gereza ya Nyarugenge.

SP Eric Ntakirutimana wunganirwa na Me Gasominari Jean Baptiste yabwiye urukiko ko ibyavuzwe n’ubushinjacyaha byose bidakwiye guhabwa ishingiro kuko ibyo buvuga butabitangira ibimenyetso.

Ati “Ndasaba urukiko ko rwakwemeza ko ndi umwere nkahita ndekurwa nkasanga umuryango wanjye kuko uwavuze ko yibye Kassem Ayman Mohamed yabyemereye urukiko muri kamena uyu mwaka ubwo yazaga gusobanurira urukiko uko yakoze ibyo bikorwa byose. Ntabwo najya gukora ibihano by’ibyaha byakozwe na Twizere Amani Olivier.”

CSP Kayumba Innocent wunganirwa na Me Ngirinshuti Jean Bosco avuga ku bihano yasabiwe, yasabye urukiko ko rwamugira umwere kuko ibyo Amani yamushinje byose ari ibihimbano.

Yavuze ko yatunguwe no kumva ubushinjacyaha bwasabye ko Twizere Olivier Amani yagirwa umwere ku byaha yemereye urukiko ko ari we wabikoze.

CSP Kayumba Innocent yavuze ko atari umuntu wakagombye kuba afungiye ibisuguti na telefone. Ati “Akazi kose nakoze usibye no mu magereza no mu gisirikare nabaga nshinzwe gukumira ibyaha bikorwa nk’ibi ntabwo nari gusubira inyuma ngo mbe ari njye ubikora kandi nshinzwe kubikumira.

“Ndasaba ko mu gihe muzaba mwiherereye mwanzagira umwere kuri ibi byaha byose kuko nta n’aho nigeze mbyemera no mu miburanire yanjye. Nimundekura nyakubahwa perezida, muzaba mumpaye ubutabera.”

Urukiko rwavuze ko uru rubanza ruzakomeza ku wa 19 Ugushyingo 2021.

Aba bagabo bahoze bayobora Gereza ya Nyarugenge basabiwe gufungwa imyaka itanu n'ihazabu ya miliyoni ebyiri
Abaregwa baburaniye mu cyumba cy'urukiko rw'ubucuruzi kubera ikibazo cy'umuriro
CSP Kayumba Innocent yasabye urukiko ko rukwiye kumurekura kuko atari umuntu wo kwiba ibisuguti na telefone
Mu cyumba cy'urukiko harimo abantu bacye baje kumva ibihano ubushinjacyaha bwasabiraga abaregwa
Twizere Amani Olivier ubwo Ubushinjacyaha bwamusabiraga kudakurikiranwa ku byaha byakozwe
Ubushinjacyaha bwasabiye CSP Kayumba Innocent na bagenzi be igihano cy'igifungo cy'imyaka itanu n'ihazabu ya miliyoni ebyiri z'amafaranga y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .