00:00:00 IGIHE NETWORK KN KINYARWANDA EN ENGLISH FR FRANCAIS

Abayobozi bo mu Karere ka Burera barimo Visi Meya basabiwe gufungwa imyaka irindwi

Yanditswe na Claude Bazatsinda
Kuya 30 Nzeri 2021 saa 10:51
Yasuwe :
0 0

Ubushinjacyaha bwasabiye Visi Meya ushinzwe Imibereho Myiza y’Abaturage mu Karere ka Burera, Manirafasha Jean de la Paix na bagenzi be b’abayobozi bane bareganwa, gufungwa imyaka irindwi no gutanga ihazabu ya miliyoni 5 Frw.

Mu iburanisha ryabaye kuri uyu wa Kane, tariki 30 Nzeri 2021, ku Rukiko Rwisumbuye rwa Musanze, Ubushinjacyaha bwasabiye Visi Meya Manirafasha na bagenzi be bane ari bo Habimana Fidèle, Dusengemungu Emmanuel, Mbatezimana Anastase na Kwizera Emmanuel bafite inshingano zitandukanye mu Karere ka Burera humvwa ubuhamya bwa Meya Uwanyirigira Marie Chantal na Gitifu Ibingira Frank ba Burera.

Muri iri buranisha ryamaze amasaha abiri, Urukiko rwabanje kumva ubuhamya bwa Meya na Gitifu ba Burera nk’uko bari batumijwe ku wa 17 Kamena 2021 bakitaba ku wa 21 Nzeri ariko abo batangabuhamya bakagaragaza ko ibyo babajijwe batari babifitiye ibimenyetso rugasubikwa bakemererwa kwitaba kuri uyu munsi bazanye ibyo basabwaga.

Abatangabuhamya bahamagajwe muri uru rubanza bagaragarije Urukiko kandi ko n’ubwo hari impapuro babonye zerekana ko Akarere kari gafite iyo mishinga bivugwa ko yakozwemo amakosa mu ishyirwa mu bikorwa ryayo ariko ko ibyo Umugenzuzi Mukuru w’Imari ya Leta yagaragaje bitubahirije amategeko aribyo bigomba gukurikizwa kuko bo batabona ibisobanuro byabyo kuko icyo gihe batari abayobozi.

Kuri uyu munsi, Urukiko rwahaye umwanya abo bayobozi ngo bagaragaze ibimenyetso byerekana ko ibyo abo baregwa bavuga ko babikoze bahawe uburenganzira n’Akarere.

Bagaragaje ko amasoko avugwa yatanzwe mu buryo bunyuranyije n’amategeko yari yarizwe n’Akarere ariko kuyashyira mu bikorwa batazi niba koko abaregwa barabisabwe nako cyangwa ngo babitegekwe kuko icyo gihe bo batari mu nshingano z’ubuyobozi bityo ko kubitangaho ibisobanuro byabagora kuko batabizi.

Ubushinjacyaha kuri iyi ngingo, bwerekanye inyandiko yo ku wa 18 Ukwakira 2018 yandikiwe abayobozi b’imirenge n’abashinzwe amasoko mu mirenge ibereka ko bohererejwe amafaranga yagombaga kubafasha mu ishyirwa mu bikorwa by’imirimo yari ikenewe ariko ko byose bigomba gukorwa hubahirizwa amategeko asanzwe agenga itangwa ry’amasoko ya Leta.

Abaregwa bo bakomeje kugaragariza Urukiko ko ibyo baregwa babikoze babisabwe n’Akarere kandi ko ibyo bakoze badakwiye kuba babibazwa kuko Akarere ariko katangaga amafaranga agacishwa kuri konti z’imirenge basaba ko bakurwaho ibyaha bakurikiranyweho bakagirwa abere.

Ubushinjacyaha bwongeye kugaragariza Urukiko ko kuba abo baregwa, nta gahato katigobotorwa bashyizweho ku buryo batari gukurikiza amategeko cyangwa ngo bareke kubikora bibagireho ingaruka bityo ko bakwiye kuba babiryozwa kuko ntawe ubura guhanwa n’itegeko kuko atarizi.

Bwasabiye abaregwa kubihanirwa haba hari abandi babigaragaramo nabo bakazabihanirwa ariko bidakuyeho kuba bo babazwa ibyo bakoze.

Ubushinjacyaha bwasoje busabira abo baregwa bose igihano cy’igifungo cy’imyaka irindwi n’ihazabu y’amafaranga y’u Rwanda miliyoni eshanu ku cyaha cyo gutanga amasoko ya Leta mu buryo bunyuranyije n’amategeko, naho Visi Meya Manirafasha Jean de la Paix we hakiyongeraho ibyaha byo gufata icyemezo cy’itonesha, ubucuti, icyenewabo na ruswa n’icyaha cyo gukoresha umutungo wa Leta icyo utateganyirijwe gukoreshwa asabirwa guhanwa n’ingingo ya 62 y’igitabo cy’amategeko No 68/08/2018 ryo kuwa 30 Kanama 2018 cy’amategeko agena ibyaha n’ibihano mu Rwanda kubera impurirane z’ibyo byaha.

Visi Meya Manirafasha Jean de la Paix yabaye Umunyamabanga Nshingwabikorwa mu Mirenge ya Butaro, Bungwe yo mu Karere ka Burera mbere y’uko aba Umuyobozi w’Akarere wungirije ushinzwe Imibereho Myiza y’Abaturage.

Ingingo ya 10 mu Itegeko ryerekeye kurwanya ruswa, ivuga ko umuntu wese ukoresha mu nyungu ze cyangwa iz’undi, umutungo, amafaranga cyangwa inyandiko z’agaciro, yahawe cyangwa yashyikirijwe kubera imirimo akora cyangwa ukoresha mu nyungu ze abakozi ashinzwe ku bw’umurimo aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka irindwi ariko kitarenze imyaka icumi n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’umutungo yanyereje.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .