00:00:00 IGIHE NETWORK KN KINYARWANDA EN ENGLISH FR FRANCAIS

Abashakashatsi bagaragaje icyuho mu guhana uwasambanyije umwana, izungura n’ibijyanye na gatanya

Yanditswe na Mukahirwa Diane
Kuya 5 Ugushyingo 2021 saa 10:03
Yasuwe :
0 0

Abanyamategeko bamuritse ubushakashatsi bugaragaza ko hari icyuho mu mategeko ahana uwasambanyije umwana, irigena izungura, irigena uko abana babaho nyuma yo gutandukana kw’ababyeyi ndetse n’irirengera ibicuruzwa byambutswa muri gasutamo ku bihangano byiganwe.

Ibi bibumbiye mu bushakashatsi butanu bwamuritswe n’abanyamategeko batandukanye, bwakozwe n’Ishuri ryigisha rikanateza imbere amategeko (ILPD) rifatanyije na Kaminuza y’u Rwanda.

Ubu bushakashatsi bwakozwe muri gahunda yashyizweho n’iri shuri mu igitabo bise ‘Rwanda Law Journal’ kizajya gishyirwamo ubushakashatsi bwakozwe n’abanyamategeko babishaka bose mu gihugu.

Iyi ni inshuro ya kabiri iki gitabo gisohotse, hakaba haratoranyijwe ubushakashatsi butanu muri 15 bwari bwatanzwe nyuma yo gusuzumwa hatoranywa ubwahize ubundi.

Mu gutoranya ubu bushakashatsi hagendewe ku bintu bitandukanye birimo ireme ry’ibyo umushakashatsi ashaka kugaragaza, imyandikire yakoreshejwe ndetse n’imyanzuro ubushakashatsi bwatanze.

Ababukoze bibanze ku bibazo bitandukanye cyane ahari icyuho mu mategeko arebana n’umuryango nka kimwe mu gice kirimo ibibazo byinshi.

Mu bagaragaje ubushakashatsi harimo Dr Tite Niyibizi wakoze ku itegeko rihana uwasambanyije umwana, aho yagarutse ku kibazo cy’abahungu bafungwa basambanyije abakobwa kandi bose bakiri bato.

Aho usanga umuhungu ufite imyaka 19 yarateye inda umukobwa y’imyaka 17 umuhungu agafungwa kandi usanga baba bamaze imyaka myinshi bakundana, habaho gutera inda akaba yafungwa.

Dr Tite yagaragaje ko mu guca urubanza hajya habamo ubushishozi kuko wasanga baba basanzwe baryamana mu myaka yo hambere, aho gufunga umuhungu hakarebwa uburyo iki kibazo cyakemurwa mu bundi buryo.

Umwarimu muri Kaminuza y’u Rwanda, Uwineza Odette, yagaragaje ubushakashatsi ku itegeko rya gatanya aho agaragaza ko ridaha abana amahirwe menshi kuko nk’ibijyanye n’uzabarera n’igihe cyo gusurwa bitabarengera neza.

Agaragaza ko iri tegeko rikwiye gusuzumwa neza hakarebwa ukwiye kurera umwana ubifitiye n’ubushobozi bwose ndetse hakanagenwa igihe nyacyo kizwi cyo gusura abana.

Hamuritswe kandi n’ubushakashatsi bugaruka ku itegeko ry’izungura aho bigaragara ko mbere ya 1999 iri tegeko ryahozeho ahubwo ari uko guverinoma itaryubahirizaga, ubu bwakozwe na Dr Yves Sezirahiga.

Ubundi bushakatsi bwibanze ku muryango kuko Dr Jean Damacsene Munderere yagaragaje ko hakiri icyuho mu itegeko ritandukanya abantu aho usanga hari abo rirengera abandi bagasigara.

Usibye ajyanye n’umuryango hanagarajwe ubushakashatsi bwakozwe ku itegeko rirengera umutungo mu by’ubwenge aho hagarutswe ku bicuruzwa bica muri gasutamo bitujuje ubuziranenge cyangwa byariganye ibirango bisanzwe mu gihugu.

Nsengumuremyi Cyridion wakoze ubu bushakashatsi yagaragaje ko mu iyubahirizwa ry’iri tegeko hakiri ibibazo nk’igihe bimara mu nkinko, icyo ibikoresho bikoreshwa ibi byose bikwiye guhinduka.

Imurikwa ry’ubu bushakashatsi ryitabiriwe n’abafite aho bahuriye n’amategeko n’ubutabera bakaba bashimye igikorwa cyakozwe ndetse basaba abandi banyamategeko kwitabira gukora ubushakashatsi.

Umunyamabanga wa Leta uhoraho muri Minisiteri y’Ubutabera, Mbonera Théophile, yashimye ILPD na UR ku bushakashatsi bwakozwe ndetse abasaba ko bakongera umubare w’ubwo bakora.

Yagize ati “Ndashimira ibigo byombi kuba byarashyize hamwe imbaraga bigakora igikorwa nk’iki cyiza, ndashimira kandi abashakashatsi umuhate bashyizemo. Mboneraho gusaba ko iki gikorwa cyakorwa inshuro nyinshi zishoboka.”

Umuyobozi wa ILPD, Dr Kayihura Muganga Didas, yashimye abashakatsi ku musanzu batanze ndetse avuga ko gukora ibikorwa nk’ibi bitanga umusaruro kuko bituma haboneka icyuho gihari kigakosorwa.

Yagize ati “Abashakatsi batoranyijwe bakoze akazi gakomeye kuko ibi bituma nk’itegeko ririmo icyuho rigaragara bikagira umusaruro riratanga, iyo umuntu akoze ubu bushakashatsi aba atanze umusanzu uhagije.”

Yakomeje asaba abandi banyamategeko kwitabira gukora ubushakashatsi n’abatabukora bagashishikarira gukoresha ubwasohotse, bukabafasha mu kazi kabo ka buri munsi.

Uwakosoye ubu bushakashatsi (Chief editor), Dr Etienne Ruvebana, yashimye umuhate abashakashatsi bagaragaje mu bikorwa byabo ndetse anashishikariza abandi banyamategeko gukora nk’ibi.

Iyi ni inshuro ya kabiri ‘Rwanda Law Journal’ isohotse bakaba bateganya ko yajya isohoka kabiri mu mwaka, igamije guhuriza hamwe abashakashatsi mu mategeko hagamijwe kuvugurura amategeko no kuyunguranaho ubumenyi.

Abanyamategeko basabwe gushyira imbaraga mu gukora ubushakashatsi
Hagaragajwe icyuho mu guhana uwasambanyije umwana
Uwineza Odette wigisha muri Kaminuza yagize uruhare muri ubu bushakashatsi
Dr. Etienne Ruvebana niwe wakosoye ubu bushakashatsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .