00:00:00 IGIHE NETWORK KN KINYARWANDA EN ENGLISH FR FRANCAIS

Abakurikiranyweho kunyereza umutungo wa COPCOM babwiye urukiko ko ibyaha baregwa byataye agaciro

Yanditswe na Nkundineza Jean Paul
Kuya 28 Nzeri 2021 saa 01:31
Yasuwe :
0 0

Abanyamategeko bunganira bamwe mu banyamuryango ba Koperative y’Abacuruzi b’Ibikoresho by’Ubwubatsi, COPCOM baregwa ibyaha bimunga ubukungu bw’igihugu, babwiye urukiko ko ibyaha abakiliya babo bakurikiranyweho n’Ubushinjacyaha byataye agaciro kuko byashaje.

Ni ibintu aba banyamategeko bagarutseho ku wa Mbere, tariki 27 Nzeri 2021, ubwo uru rubanza rwasubukurwaga.

Kuri uwo munsi ni bwo mu Rukiko Rwisumbuye rwa Gasabo hasubukuwe urubanza mu mizi ruregwamo abanyamuryango 18 muri 321 b’iyi koperative ikorera mu Mujyi wa Kigali mu Karere ka Gasabo mu Murenge wa Gisozi.

Uru rubanza rwaherukaga gusubikwa ku wa 10 Nzeri 2021 kubera bamwe mu banyamuryango batari babonetse bituma iburanisha ryimurirwa ku wa 27 Nzeri 2021.

Saa Tatu zuzuye ni bwo Inteko y’Abacamanza batatu n’umwanditsi w’urukiko yinjiye mu cyumba cy’ iburanisha. Abaregwa bose bari bitabiriye iburanisha bari kumwe n’ababunganira mu mategeko.

Ubushinjacyaha bwari mu cyumba cy’urukiko buhagarariwe n’abashinjacyaha babiri.

Koperative COPCOM muri uru rubanza iregera indishyi za 1.750.000.000 Frw ihagarariwe n’abanyamategeko babiri barimo Me Gakunzi Valérie.

Abaregwa bose uko ari 18, Ubushinjacyaha bubakekaho kunyereza umutungo wa Koperative COPCOM usaga miliyoni 800 Frw. Aya mafaranga yose yanyerejwe mu bihe bitandukanye.

Ubwo umucamanza yatangiraga iburanisha yahise avuga ko iburanisha risubikwa kuko hari umwe mu baregwa witwa Uwicyeza Consolée wamaze kumenyesha urukiko ko atazaza kuburana kuko arwaye.

Umucamanza yakomeje avuga ko ibaruwa ibisaba yamaze gushyirwa mu ikoranabuhanga, ko ariyo mpamvu urubanza rutaba.

Uwicyeza Consolée yahise amanika amaboko avuga ko n’ubwo yavuze ko arwaye ko yihangana akaburana.

Umucamanza yahise abaza abaregwa niba biteguye kuburana ariko bamwe muri bo bagaragaza inzitizi zikomeye aho babwiye umucamanza ko ibyaha Ubushinjacyaha bubakurikiranyeho byashaje ko nta mpamvu urukiko rwakomeza kubiburanisha kandi byarashaje.

Me Nsabimana Jean Baptiste wunganira Uwicyeza Consolée yabwiye urukiko ko hari bimwe mu byaha umukiliya we ashinjwa abona byamaze gusaza nk’uko amategeko abiteganya.

Ibyavuzwe n’uyu munyamategeko byazamuye impaka zikomeye hagati y’Ubushinjacyaha ndetse n’abanyamategeko ba Koperative COPCOM bahise basaba umucamanza ko ibivuzwe n’uruhande ruregwa urukiko rudakwiye kubiha agaciro kuko bishingiye ku magambo gusa aho kuba ingingo z’amategeko.

Ubushinjacyaha bwavuze ko ibyo Me Nsabimana Jean Baptiste yavuze ko hari ibyaha byamaze gusaza mu buryo bw’amategeko byakozwe mu bihe bitandukanye hagati ya 2014 na 2015, hashingiwe ku biteganywa n’amategeko nta busaze burimo.

Ubushinjacyaha buti “ubundi ibyaha bisaza bihagarikwa gukurikiranwa mu myaka 10 byibura kandi abantu dukurikirana uyu munsi nta myaka 10 iragera.”

Ubushinjacyaha bwahise busaba urukiko kudaha agaciro ibyavuzwe n’abaregwa kuko nta ngingo z’amategeko bisunze bavuga impamvu zabo z’uko batakurikiranwa.

Nyuma y’impaka zamaze amasaha, umucamanza yumva impande zose yahise apfundikira iburanisha avuga ko inteko y’abacamanza igiye kwiherera igafata umwanzuro ku inzitizi zatanzwe zose ikanasuzuma ibyavuzwe n’ubushinjacyaha.

Umucamanza yahise avuga ko uru rubanza ku nzitizi ruzasomwa ku wa 8 Ukwakira 2021 Saa Cyenda z’amanywa.

Abakurikiranyweho kunyereza umutungo wa COPCOM babwiye Urukiko Rwisumbuye rwa Gasabo ko ibyaha baregwa byataye agaciro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .