Sanlam irizihiza imyaka 100 ishinzwe

Yanditswe na Mukaneza M.Ange
Kuya 8 Kamena 2018 saa 06:21
Yasuwe :
0 0

Ikigo Sanlam Group kiza mu bya mbere bikomeye muri Afurika mu gutanga serivisi zijyanye n’ishoramari n’ubwishingizi, kirizihiza imyaka 100 ishize gitangiye gukora.

Mu 2014 nibwo iki kigo cyaboneye izuba i Cape Town muri Afurika y’Epfo nu 1918, cyaguze imigabane ingana na 63% muri sosiyete ya mbere y’ubwishingizi mu Rwanda SORAS. Nyuma y’imyaka ine cyaguze indi yose yari isigaye gihita kiyegukana burundu.

Uyu munsi tariki ya 8 Kamena 2018 nibwo Sanlam yizihiza imyaka 100 imaze ishinzwe, aho mu byagezweho yishimira harimo no kuba mu gihe kingana n’ikinyejana yarabashije kugaba amashami hirya no hino muri Afurika ndetse ikagera no mu bihugu biri ku yindi migabane irimo Aziya, u Burayi, Amerika na Oceania.

Kuva iyi sosiyete yashingwa, hari impinduka nyinshi zagiye zibamo kuko yavuye mu kuba ikigo gitanga ubwishingizi bw’ubuzima (traditional life insurance company), ikinjira mu gutanga serivisi zitandukanye z’imari ariko zibanda ku gutanga ubwishingizi bw’igihe gito n’ikirekire, kwizigamira, guteganyiriza izabukuru, ishoramari n’ibindi.

Mu 1998 Sanlam yahinduye imikorere, imigabane yayo itangira gucuruzwa ku Isoko ry’Imari n’Imigabane rya Johannesburg ndetse na Namibia. Yagabanyijwemo ibigo bitandukanye ariko byose bifite umurongo umwe ubihuza.

Sanlam izwiho kuba imbere mu bijyanye n’ikoranabuhanga no guhanga udushya mu mikorere yayo; yagiye yagura ibikorwa haba imbere muri Afurika y’Epfo ndetse n’ahandi ku Isi.

Kuri ubu iyi sosiyete ibarizwa mu bihugu bigera kuri 33 byo muri Afurika harimo n’u Rwanda ndetse ikaba ifite abakozi basaga 11,800. Inakorera kandi mu Buhinde, Malaysia, Philippines, u Bwongereza, Ireland, Leta Zunze Ubumwe za Amerika, u Busuwisi na Australia.

Ubuyobozi bwa Sanlam butangaza ko byafashe igihe kigera ku myaka 100 kugira ngo ibashe kugera ku rwego iriho magingo aya, mu gihe bizihiza iki gihe cyose gishize icyo bashyize imbere akaba ari ukurushaho guhindura imibereho y’abayigana, gushyira imbaraga muri serivisi zishingiye ku ikoranabuhanga no guhanga udushya no gushimangira umutekano w’amafaranga w’abakiliya.

Sanlam ibarizwamo SORAS irizihiza imyaka 100 ishize itangiye gutanga serivisi zirebana n'ubwishingizi
Icyicaro gikuru cya SORAS GROUP i Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza