RSSB yatanze amezi ane kuba yongeje abahabwaga amafaranga ya pansiyo y’intica ntikize

Yanditswe na Mathias Hitimana
Kuya 16 Werurwe 2017 saa 10:25
Yasuwe :
0 0

Nyuma y’igihe abari mu zabukuru barira, bagaragaza ko bashaririwe n’ubuzima bwo guhabwa amafaranga ya pansiyo y’intica ntikize, Ikigo cy’Igihugu cy’Ubwiteganyirize (RSSB) cyatangaje ko mu gihe cya vuba azaba yamaze kongerwa.

Kugeza ubu pansiyo nkeya yahembwaga ingana n’ ikigeraranyo cy’amafaranga ibihumbi bitanu ku kwezi, bagaragaza ko nta cyo amara iyo bayagejeje ku isoko bitewe n’ibiciro byagiye byikuba ubutitsa uhereye kera ubwo iyo pansiyo yagenwaga, ikaba itarahindutse.

Umuyobozi w’ishyirahamwe ry’abari muri pansiyo mu Rwanda (ARR), Modeste Munyuzangabo, aganira na RBA, yagize ati "Ntabwo tuzi aho bipfira kugeza ubu, twagiye twerekana ikibazo cyacu tuvuga ko turi abashoramari ba mbere, amafaranga twahembwaga yari ahagije ariko kugeza ubu ntabwo bajyana n’ibiciro biri ku masoko."

Didas Niyonzima, umuturage wo mu Mujyi wa Kigali uri mu zabukuru we afata amafaranga ibihumbi bitanu bamwe bahembwa nk’ayo kugura imboga za dodo gusa, akabona ko ishoramari RSSB ikora mu misanzu y’abanyamuryango yakagobotse abo bahebwa intica ntikize.

Yagize ati "Ariya mazu ya RSSB yubaka, imidugudu yubaka hirya no hino, amafaranga avamo ntashobora gufasha bariya basaza bashyizwe mu zabukuru ?"

Kuri iki kibazo cyagaragajwe igihe kirekire, Umuyobozi wa RSSB, Gatera Jonathan, yatangaje ko kizwi kandi muri Nyakanga 2017 hari inyongera y’ayo mafaranga izatangwa. Ariko nawe agashimangira ko bigaragara ko atangwa ubu ari make cyane akurikije ubuzima buhenze muri iki gihe.

Yagi ze ati “Ntabwo ndibuvuge ngo haziyongeraho umubare runaka, ariko icyo nakwizeza ni uko mu byizwe byose mu byagaragajwe byose haziyongeraho amafaranga."

Akomeza avuga ko nubwo RSSB izi neza ko ikiguzi cy’ubuzima cyazamutse cyane cyane ku bantu batuye mu mijyi. Anavuga ko n’iyo umuntu yavuga ngo akubye gatatu ibyo bihumbi bitanu, na bwo ntacyo yahindura cyane. Ariko yemeza ko abafata pansiyo y’amafaranga make bazongerwa menshi, abahembwaga menshi bakongerwa make.

RSSB ikusanya imisanzu y’ubwiteganyire bw’abakozi mu Rwanda, igaragaza ko yinjiza amafaranga hafi miliyari 59 ku mwaka, ikishyuramo amafaranga ya pansiyo miliyari 16, andi agashyirwa mu bikorwa byo guteganyiriza igihe kirekire.

Ishyirahamwe ry’abari muri pansiyo mu Rwanda ryagiye mu bihe bishize rinenga ko ingano y’amafaranga ya pansiyo itongerwa, akavuga ko nko mu bihugu byateye imbere bongeza amafaranga ya pansiyo buri myaka itanu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza