00:00:00 IGIHE NETWORK KN KINYARWANDA EN ENGLISH FR FRANCAIS

Miliyoni 186 Frw zimaze guhabwa abapfushije ababo bari barizigamiye muri EjoHeza

Yanditswe na Akayezu Jean de Dieu
Kuya 3 Ugushyingo 2021 saa 02:36
Yasuwe :
0 0

Urwego rw’Ubwiteganyirize mu Rwanda, RSSB, rumaze gutanga arenga miliyoni 186 Frw yahawe abahagarariye imiryango y’abantu 149 bari bariteganyirije muri EjoHeza nyuma bakaza kwitaba Imana.

Abiteganyirije muri EjoHeza Leta irabunganira baba bakiriho ikabaha inyongera itarenga 18.000 Frw ku mwaka ariko kandi igihe bitabye Imana ikagoboka imiryango basize ibaha ubwishingizi bw’ubuzima bungana na 1.250.000 Frw ku muryango bunyuzwa muri Sonarwa Life Ltd.

RSSB ku bufatanye na SONARWA Life Ltd bashyikirije ku mugaragaro ubwishingizi bw’ubuzima imwe mu miryango yabuze ababo bizigamiraga muri EjoHeza.

Iki gikorwa cyabereye mu gihugu hose, cyatangiriye mu Ntara y’Amajyaruguru ku wa 26 Ukwakira, gisorezwa mu Mujyi wa Kigali ku wa 2 Ugushyingo 2021.

Umuyobozi ushinzwe Gahunda ya EjoHeza muri RSSB, Gatera Augustin, yavuze ko iyi gahunda iteganyijwe kuzamara imyaka itatu uhereye igihe yatangiriye mu 2018 [ni ukuvuga ko abazuzuza ibisabwa bitarenze 14 Ukuboza 2021, bazafatirwa ubwishingizi bw’ubuzima kugera 14 Ukuboza 2022], gusa hakomeje gutekerezwa ibindi bizafasha abiteganyiriza muri EjoHeza.

Umunyamuryango uri mu cyiciro cya mbere cyangwa icya kabiri cy’Ubudehe amafaranga make ashoboka agomba kwizigamira ni 15.000 Frw ku mwaka kugira ngo agire uburenganzira ku ruhare rwa Leta bungana na 100% by’ubwizigame bwe.

Umunyamuryango uri mu cyiciro cya gatatu cy’Ubudehe amafaranga make ashoboka asabwa kwizigamira ni 18.000 Frw ku mwaka kugira ngo agire uburenganzira ku ruhare rwa Leta rungana na 50% y’ubwizigame bwe. Aha uruhare rwa Leta ntirurenga 18.000 Frw.

Umunyamuryango uri mu cyiciro cya kane cy’Ubudehe ashoboka kwizigamira 72.000 Frw ku mwaka. Abari muri iki cyiciro nta ruhare rwa Leta bagenewe.

Abanyamuryango ba EjoHeza mu byiciro byose uko ari bine bemererwa ubwishingizi bw’ubuzima n’ubwo gushyingura buzamara imyaka itatu uhereye igihe iyi gahunda yatangirijweho ku mugaragaro.

Abanyarwanda bujuje cyangwa barengeje imyaka 16 kandi bubahirije ibisabwa hashingiwe ku byiciro by’ubudehe bagenerwa ubwishingizi bw’ubuzima bwa miliyoni 1 Frw n’ibihumbi 250 Frw yo gushyingura mu gihe umunyamuryango yitabye imana.

Gatera yakomeje agira ati “Ikindi umunyamuryango wa EjoHeza witabye Imana, leta iramugoboka ikamuha amafaranga ibihumbi 250 Frw ahita atangwa mu gihe cya vuba ariko nyuma agahabwa indi miliyoni 1 Frw itangwa nyuma.”

Umuyobozi wa gahunda ya Ejo Heza muri RSSB, Gatera Augustin n'Umuyobozi Nshingwabikorwa w'Akarere ka Gasabo, Umwali Pauline bashyikiriza sheki Niyomujeje wabuze uwe akaza gufatwa mu mugongo binyuze muri EjoHeza

Muri rusange abaturage bamaze kwiyandikisha muri EjoHeza ni miliyoni 1.6 mu gihe abiteganyirije muri iyi gahunda ari miliyoni 1.3, bamaze gutanga ubwizigame burenga miliyari 21 Frw.

Uwizigamiye muri EjoHeza no mu byago aragobokwa

Gahunda ya EjoHeza yatangijwe ku wa 14 Ukuboza 2018, nyuma y’isesengura hashingiwe ku mibare n’ubushakashatsi bwagaragaje ko mu myaka 20 iri imbere umubare w’abajya mu zabukuru uzagera hejuru ya 60%.

Ifatwa nka Pansiyo kuri bose, ni umwihariko w’u Rwanda wo kugira ngo abaturarwanda bose bizigamire bizabafashe kugira amasaziro meza cyane cyane abari mu mirimo badasanzwe bateganyirizwa cyangwa ngo bagire pansiyo iteganywa muri RSSB.

Mukabalisa Hasha wo mu Murenge wa Kacyiru, Akarere ka Gasabo, avuga ko muri uyu mwaka aribwo umugabo we yitabye Imana, azize uburwayi.

Mbere y’uko afatwa n’uburwayi akarekeraho kwizigamira muri EjoHeza yari amaze imyaka ibiri yizigamira aho yari agejejemo amafaranga arenga ibihumbi 120 Frw.

Ati “Umugabo wanjye ni umuntu wakundaga kwitabira gahunda za leta, yumvise ejo heza, ahita ayijyamo, abayobozi baje kubitubwira babidushishikariza aravuga ati njyewe nagezemo cyera ku buryo yanagiye abishishikariza n’abandi.”

Yagize ati “Yaje kumbwira ati rero madamu, dore nagiye muri EjoHeza, dore ejo n’ejo bundi urabona ndwaye indwara idakira nshobora kwitahira. Yaje kwitaba Imana.”

Ubwo yavugaga uko yagobotswe na EjoHeza yagize ati “Amafaranga yashyizemo, nta n’icya kabiri cyayo twahawe, Leta yaratwongereye, idufata mu mugongo, uko babivuga ni ko bigenda, ntibakurangarana. Ndashishikariza urubyiruko, rufite amahirwe nirwitabira EjoHeza.”

Yakomeje agira ati “Njya kubikurikirana najyanye n’umumotari, agenda ambaza ati ariko ibi bintu bya EjoHeza ni byo koko? Bampaye amafaranga, uwo mumotari niba anyumva cyangwa abandi bose, nimwitabire gahunda ya EjoHeza ni nziza.”

Umuyobozi w'Umujyi wa Kigali, Rubingisa Pudence n'Umuyobozi Nshingwabikorwa Wungirije wa Nyarugenge, Nshutiraguma Esperance bashyikiriza sheki, Mukabalisa wafashwe mu mugongo binyuze muri EjoHeza

Umuyobozi Mukuru w’Agateganyo wa Sonarwa Life Ltd, Kamanzi Eric, yavuze ko nk’ikigo gifite inararibonye mu gutanga serivisi z’ubwishingizi ariyo mpamvu leta yahisemo gukorana na cyo mu gutanga ubwishingizi ku banyamuryango ba EjoHeza.

Avuga ko “Aya mafaranga agabanyijemo ibyiciro bibiri, icya mbere tubaha ibihumbi 250 Frw, ngo amufashe gushyingura uwitabye Imana ariko hakaba n’iyo miliyoni 1 Frw iba isigaye ngo ifashe umuryango wasigaye cyangwa abazungura kugira ngo ibafashe mu buzima baba basigayemo.”

Yakomeje avuga ko abagera kuri 200 bari muri gahunda ya EjoHeza bamaze guhabwa ubwishingizi bw’ubuzima.

Ati "Abo bose tubaha serivisi nziza, uruhare rwacu turarukora kandi tuzakomeza kurukora neza.”

Hakenewe imbaraga muri Kigali

N’ubwo ubwitabire bw’iyi gahunda bukomeje kwiyongera umunsi ku munsi ari nako abaturage bamenya ku bwinshi amakuru y’ukuri kuri EjoHeza, mu Mujyi wa Kigali ho haracyari imbogamizi.

RSSB igaragaza ko mu bijyanye n’ubwitabire, uturere dutatu two mu Mujyi wa Kigali aritwo tuza mu myanya itatu ya nyuma [ni ukuvuga kuva ku mwanya wa 27 kugeza kuri 30].

Ubuyobozi bw’Umujyi wa Kigali, bugaragaza ko muri Kigali mu myaka ibiri ishize habayeho ikibazo cyo kugirwaho n’ingaruka zikomeye z’icyorezo cya Covid-19, cyane ko abenshi mu batuye Kigali ari abinjiza ari uko bakoze.

Umuyobozi w’Umujyi wa Kigali, Rubingisa Pudence, yavuze ko muri Kigali nibura abaturage bangana na 60% usanga ari ababarizwa mu cyiciro cya mbere n’icya kabiri by’ubudehe kandi imirimo bakoraga ikaba ari imwe yahagaze mu bihe bya Covid-19.

Ati “Umujyi wa Kigali, ni ho hari abantu benshi babaho kubera ibyo bakoreye ku munsi, aho rero zimwe mu ngamba nshya tubona zazamura ubwitabire bwa EjoHeza, ni ho tuzashyira imbaraga dufatanyije n’ababakoresha, inzego zitandukanye ariko no kugira ngo tubigire ibyacu, twebwe nk’abayobozi ndetse n’abaturage ubwabo.”

Yakomeje agira ati “Turasabwa twe nk’abayobozi gukomeza ubukangurambaga tubunyujije muri ibyo byiciro by’abaturage batuye Umujyi wa Kigali, tureba cyane ese ba bandi dushaka ko bajyamo ni bo bari kujyamo?”

Meya Rubingisa yavuze ko bihaye intego ko uyu mwaka uzarangira abarenga 6000 bizigamiye muri EjoHeza ndetse byitezweho ko bazazigama arenga miliyari 1 Frw.

Ati “Iyi gahunda ni nziza kuko ari Pansiyo kuri bose ndetse idaheza kandi inashingiye kuri kwa kwigira kw’Abanyarwanda. Umuturage ni we wizigamira ariko noneho na Leta ikamwunganira muri bya bihe nk’ibi by’ibyago.”

Ubuyobozi bwa RSSB, butangaza ko hari intego y’uko muri uyu mwaka w’ingengo y’imari kimwe cya gatatu cy’Abanyarwanda, ni ukuvuga miliyoni 4.5 bazaba baramaze kwizigamira arenga miliyari 100 Frw binyuze muri iyi gahunda ya EjoHeza.

Umuyobozi Mukuru wa Sonarwa Life Ltd, Kamanzi Eric n'Umuyobozi Nshingwabikorwa w'Akarere ka Kicukiro, Umutesi Solange bashyikiriza sheki Mukarubega wafashwe mu mugongo binyuze muri EjoHeza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .