Sanlam yavuguruye icyivugo gihamya ubushobozi buha icyizere abakiriya

Yanditswe na Ntabareshya Jean de Dieu
Kuya 31 Werurwe 2021 saa 02:03
Yasuwe :
0 0

Sosiyete y’ubwishingizi mu Rwanda, Sanlam yahinduye ikivugo (slogan) cyayo yari isanzwe ikoresha ishyiraho n’ingamba nshya zo kugera ku bakiriya bayo hifashishijwe ikoranabuhanga.

Sanlam yahisemo guhindura ikivugo bakoreshaga ari cyo “Wealth Smith “ bivuze mu Kinyarwanda ngo ni abacuzi b’ubukungu kiba “Live with Confidence” ugenekereje bivuga “Baho wifitiye icyizere.”

Mu muhango wo gutangaza izi mpinduka wabaye ku wa 30 Werurwe 2021, Ubuyobozi bwa Sanlam bwavuze ko bwahisemo guhindura iki kivugo cyabo bitewe ahanini n’uko ibikorwa bakora byagutse ndetse banahagurukiye gushyiraho ingamba nshya zirimo n’abantu bose hatitawe ku bushobozi bwabo.

Umuyobozi Mukuru wa Sanlam General, Birasa Fiacre yavuze ko izi mpinduka zibayeho kugira ngo ibikorwa bya Sanlam byose byisangemo.

Yagize ati “Hari bimwe mu bikorwa byacu byumvikanaga nk’aho bitarimo, wasangaga ahanini byumvikana mu bundi buryo. Ariko hamwe n’ikivugo gishya murumva ko byose birimo. Dukeneye kubakira umuntu wese icyizere binyuze mu bushobozi bwe uko bungana.”

“Kandi kubakira umuntu icyizere harimo no kumwigisha kwigira mu bijyanye n’ubukungu akabaho nta mpungenge afite. Urebye imikoranire yacu n’abatugana ihagaze neza ari nayo mpamvu turi aba mbere mu gihugu, gusa turacyakomeje kuko ntiturashyika aho twifuza kugera.”

Umuyobozi Mukuru wa Sanlam Vie(ubwishingizi bw’ubuzima), Hodari Jean Chrysostome asanga guhindura ikivugo bigiye kubabera inzira nziza yo kwagura imikorere no kurushaho kubaka ubudahangarwa mu bayigana.

Ku bijyanye n’ingamba nshya Hodari yemeje ko bagiye kurushaho gukoresha ikoranabuhanga kugira ngo babashe kugera ku bakiliya babo.

Ati “Muri ibi bihe twabonye ko abantu benshi bari kwitabira gukoresha ikoranabuhanga, natwe tugiye kuryifashisha kugira ngo twegerane n’abo dukorera kuko ariyo nzira nziza yo kwagura imikorere yacu.”

Umuyobozi Mukuru wa Sanlam muri Afurika, Paul Hanratty yavuze ko izi mpinduka zigamije gukuraho impungenge abantu bagendana mu buryo bw’ubukungu.

Yagize ati “ Icyorezo cyashyize ahabona uburyo bukabije abakene bagowe n’ubuzima haba mu gihugu no muri Afurika. Umuntu wese akwiye amahirwe angana yo kubaho ubuzima bwiza no kwinjizwa mu bukungu rusange. Mu guhuriza hamwe imari n’umutekano w’amafaranga, hazamo icyizere. Aho niho tuzakomeza kubaka ubushobozi muri Afurika no hanze yayo.”

Hanratty yavuze ko kandi gushyiraho ikivugo gishya “kubaho ufite icyizere” bikwiye kuba mu maraso y’ubucuruzi bwabo kuva ku bagize inama njyanama kugera ku mukiliya.

Yavuze ko hazabaho gushyiramo imbaraga mu ruhererekane rw’ibihe kugira ngo icyizere mu bijyanye n’amafaranga, umutekano ndetse no gutera imbere bibe ihame.

Kugeza ubu mu Rwanda habarurwa abantu basaga ibihumbi 280 bakorana na Sanlam ndetse muri Afurika imaze gushinga imizi mu bihugu 34.

Abitabiriye uyu muhango wo gutangaza izi mpinduka muri Sanlam basobanuriwe impamvu yabyo
Live with confidence nicyo cyivuga gishya cya Sanlam
Intore Masamba yasusurukije abitabiriye umuhango wo gutangaza izi mpinduka
Abitabiriye basabwe kugira uruhare mu kumenyekanisha ubu butumwa

Amafoto: Sanlam


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .