00:00:00 IGIHE NETWORK KN KINYARWANDA EN ENGLISH FR FRANCAIS

Iburasirazuba: Imiryango ifite ababo bitabye Imana barizigamiye muri EjoHeza yagobotswe

Yanditswe na Hakizimana Jean Paul
Kuya 30 Ukwakira 2021 saa 01:45
Yasuwe :
0 0

Abaturage bo mu Ntara y’Iburasirazuba bafite abo mu miryango yabo bitabye Imana bari barizigamiye muri gahunda ya EjoHeza, bahawe amafaranga yo kubunganira, bavuga ko batunguwe no kugobokwa.

Iki gikorwa cyabaye kuri uyu wa Gatanu tariki ya 29 Ukwakira 2021 mu Karere ka Kayonza.

Habimana Theophile uvuka mu Karere ka Gatsibo mu Murenge wa Remera, yavuze ko yagobotswe nyuma yo gupfusha umugore we.

Ati " EjoHeza nari umunyamuryango wayo n’umugore wanjye, nza kugira ibyago umugore wanjye ararwara ageza igihe yitaba Imana kandi bari baransezeranyije ingoboka; uyu munsi bampaye 1.250.000 Frw yo kuntabara. Nari narasigaye mu bukene ndimo imyenda abantu bayampaye mbasha kwishyura binyubakira icyizere mu bantu duturanye kuko babonye ko ntari umwambuzi ikindi byatumye icyo gihe mbona amafaranga yo kurihirira abana banjye kuko nyuma yo gushyingura byari bungore."

Mukamusoni Liliane utuye mu Murenge wa mu Karere ka Kirehe, yavuze ko yishimye kandi amafaranga yahawe nyuma yo gupfusha umugabo we yamufashije mu kwiteza imbere.

Ati " EjoHeza yangobotse kubera umugabo wanjye witabye Imana muri Gicurasi, yari yarizigamye kandi nanjye ndi umunyamuryango twese rero twari tumaze umwaka twizigama ariko ntitwari tuziko bazadutabara gutya, twumvaga twagobokwa n’ubwishingizi bumwe dusanganwe none EjoHeza yarabikoze ubu turishimye."

Umuyobozi Mukuru wa EjoHeza, Gatera Augustin, yavuze ko batangiriye gahunda yo guha amafaranga abagize ibyago barizigamiraga mu ntara zose.

Ati "Bimwe mu bituma abaturage bitabira EjoHeza ni ibintu bibiri, ubwa mbere ni uruhare rwa Leta, bitewe n’icyiciro urimo cy’ubudehe igira icyo ikongerera. Iyo umunyamuryango wacu uri mu cyiciro cya mbere n’icya kabiri yizigamiye Leta imwongereraho 100% y’ayo yatanze yakomeza kwizigamira ikamwongerera ntirenze 18% mu cyiciro cya gatatu nabwo imuzigamira 30% icya kane abona ubwishingizi bw’ubuzima nubwo nta ruhare rwa Leta rundi abona."

Yakomeje avuga ko bari gutanga amafaranga ku baturage mu rwego rwo kubereka ko ubwishingizi bakoze bufite umumaro, yavuze ko iyo umuturage amaze umwaka yiyandikishije yaratanze amafaranga yose asabwa mu kumufata mu mugongo ahabwa 1.250.000 Frw amufasha mu gushyingura no kwita ku muryango usigaye.

Umunyamabanga Nshingwabikorwa w’Intara y’Iburasirazuba, Dr Nyirahabimana Jeanne, yavuze ko kuba Leta yagobotse abanyamuryango ba EjoHeza bagize ibyago biri butume n’abandi baturage baboneraho bakabona ko nta gushidikanya bakwiriye gutanga umusanzu ari benshi.

Ati "Kuba abaturage bose batarajyamo ni uko batarabyumva, ntabwo rero abantu bose bumvira ibintu icyarimwe, hari ababyumva mbere bakihuta hakaba n’abandi babyumva bakajyamo ntibatange umusanzu n’abandi batarajyamo. Icyo tugiye gukora kandi tumaze igihe dukora ni ugukomeza ubukangurambaga ariko noneho tugaragaza abatangiye kubona ibyiza bya EjoHeza mu buryo bufatika."

Dr Nyirahabimana yavuze ko inzego z’ibanze zikwiriye gushyira imbaraga mu bukangurambaga ku buryo abaturage bajya muri EjoHeza ku bushake ngo kuko ari byo byatuma barushaho gutanga umusanzu bazi n’icyo bawutangira.

Kuva gahunda ya EjoHeza yatangira mu Ukuboza 2018, imaze kwitabirwa n’abanyamuryango barenga miliyoni imwe n’ibihumbi 600, aho bamaze kwizigamira amafaranga asaga miliyali 20 na miliyoni 100.

Kugeza ubu imiryango 149 y’abahoze ari abanyamurango ba EjoHeza bitabye Imana, ni yo imaze guhabwa impozamarira aho buri umwe wahawe miliyoni 1 n’ibihumbi 250 by’amafaranga y’u Rwanda.

Abo mu miryango y'abitabye Imana baratangaga umusanzu muri EjoHeza mu Ntara y'Iburasirazuba bagobotswe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .