Abacungamari basaga 1200 bakoze ikizamini cya iCPAR kibinjiza mu bunyamwuga

Yanditswe na David Eugène Marshall
Kuya 5 Kamena 2018 saa 11:07
Yasuwe :
0 0

Abacungamari batandukanye baturutse hirya no hino mu gihugu bari bamaze igihe bahabwa inyigisho, kuri uyu wa Mbere bakoze ikizamini kibemerera kuba abanyamwuga.

Iki kizamini cyakorewe muri Kaminuza Yigenga ya Kigali (ULK), muri Kaminuza ya Kigali, Ishami rya Musanze, muri Kaminuza y’u Rwanda i Huye ndetse na Ngoma mu yahoze ari INATEK. Cyitabiriwe n’abacungamari 1221 barimo 785 b’igitsina gabo na 436 b’igitsina gore.

Umuyobozi ushinzwe ibijyanye n’Amasomo n’Amahugurwa mu Kigo gishinzwe guteza Imbere Umwuga w’Ibaruramari mu Rwanda (iCPAR), Muhire Jean Marie Vianney, yabwiye IGIHE ko ku Isi hose kwiga gucunga imari n’umutungo bigomba gukurikirwa no guhabwa inyigisho zikugira umunyamwuga.

Yagize ati “Kuba umuntu yarize ibyo gucunga imari n’umutungo ntibihagije, ni amahame Isi yose igenderaho, si umwihariko w’igihugu iki cyangwa kiriya, ahubwo mu Rwanda twatangiye dutinze. Iyo ufite icyangombwa cy’ubunyamwuga mu icungamari n’icungamutungo, aho ugeze hose ku Isi wakirwa mu kazi nta kwirirwa bashidikanya, cyangwa bibaza ku bushobozi bwawe ukundi kuko baba bazi ko watsindiye iki cyangombwa, uri no mu rugaga ruzwi mu ruhando mpuzamahanga nk’uru rwacu.”

Yavuze ko nko mu bihugu bya Kenya, Tanzania na Uganda ubu buryo babumazemo imyaka isaga 30, mu gihe mu Rwanda bwatangiye mu 2008.

iCPAR iri mu biganiro na Minisiteri y’Uburezi, mu rwego rwo gushakisha uko hajyaho uburyo bwo gutwarira hamwe bene aya masomo abantu bakiri ku ntebe y’ishuri ku babyifuza, bityo ntibibagore bayavanga n’akazi cyangwa ubushomeri ku batagafite.

Umwe mu bakoze ikizamini, Edissa Mukabaranga wiga muri Kaminuza ya KIM, yavuze ko yashatse guhinyuza abavuga ko abagore n’abakobwa batinya iby’imibare n’icungamari.

Yagize ati “Natwe abagore n’abakobwa turashoboye, twifitemo icyizere kandi gucunga umutungo neza biri no muri kamere zacu; kubinonosora neza rero mu buryo bw’umwuga biduha icyizere ko uretse no gutanga umusanzu mu kubaka igihugu cyacu, ejo cyangwa ejo bundi twanabasha gutanga umuganda mu bindi bihugu bigize Isi, byaba ibya hafi ndetse na kure.”

Yavuze ko ibyo biga mu mashuri asanzwe bidatuma bajya mu mizi amasomo yabo, mu gihe iCPAR ibafasha gucukumbura, ikanabinjiza mu mahame agenga umwuga n’indangagaciro ziranga umucungamutungo mwiza.

Muhire yatangaje ko abasoza bene aya masomo ku rwego rwa CPA (Certified Public Accountant ), ngo nibo baba bazavamo abayobozi bakomeye mu by’imari mu bigo bitandukanye, abagenzuzi b’imari (auditors) n’abandi; abo mu cyiciro kiringaniye CAT ( Certified Accounting Technicians), aribo baba abacungamari n’abacungamutungo mu bigo bya Leta nk’amavuriro, imirenge, amashuri mato n’ayisumbuye n’ahandi hose bakenewe.

Ibizamini bya ku rwego rwa CAT na CPA bikorwa kabiri mu mwaka, muri Kamena no mu Ukuboza, bigakorerwa ahantu hatandukanye mu gihugu haba hemejwe n’urugaga, bihabwa buri wese ubyifuza n’ababa boherejwe n’ibigo bitandukanye ngo bige ubu bunyamwuga.

Kugeza ubu mu Rwanda hari abacungamari b’abanyamwuga bagera kuri 400 gusa mu gihe mu myaka 15 iri imbere, Guverinoma y’u Rwanda yonyine hatarimo Urwego rw’Abikorera, ifite gahunda yo guha akazi abanyamwuga mu bijyanye n’ibaruramari n’ibijyana naryo bangana na 7 387.

Abacungamari basaga 1200 bakoze ikizamini cya iCPAR kibinjiza mu bunyamwuga
Mukabaranga Edissa yavuze ko abakobwa n'abagore bashoboye mu bijyanye n'imibare n’icungamari
Hitimana Ildephonse ufatanya aya masomo no gukora muri za gasutamo mu Rwanda, avuga ko yasanze ibizamini bidakanganye ku muntu wakurikiye neza
Muhire Jean Marie Vianney yavuze abantu bakurikirana aya masomo bagira amahirwe yo kubona akazi bitabagoye aho bajya hose ku Isi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza