Kwamamaza

Zimwe mu mpamvu zituma igihugu gihindura amafaranga cyakoreshaga

Yanditswe kuya 5-10-2016 saa 17:32' na Jean Pierre Tuyisenge


Hirya no hino ku Isi usanga ibihugu bitandukanye bifata igihe bigahindura ubwoko bw’amafaranga bikoresha;ibi ntabwo bipfa kurotwa na Banki Nkuru zabyo ahubwo bituruka ku mpamvu zitandukanye zirimo n’umutekano wayo.

Dufashe urugero ku Rwanda, amateka agaragaza ko Ifaranga ryatangiye gukoreshwa mu Rwanda mu hagati y’umwaka wa 1914 ubwo Ababiligi batangizaga ifaranga rigasimbura urupiya(Deutsch-Ostafrikanische Rupie) ryakoreshwaga ku gihe cy’Abakoloni b’Abadage.

Kuva icyo gihe mu Rwanda hakoreshejwe Ifaranga rya Congo-Mbiligi, kera kabaye risimburwa n’Ifaranga ryari risangiwe n’u Rwanda n’u Burundi.

Nyuma y’ubwigenge bw’ibihugu byombi nibwo hatangiye gukoreshwa ifaranga ry’u Rwanda nyirizina, gusa zaba inoti cyanwa ibiceri, byagiye bihindurwa uko iminsi yagiye ishira kugeza na n’ubu.

Soma uko amafaranga yagiye ahindurwa mu myaka 20 ishize
Mu kiganiro Banki Nkuru y’u Rwanda yahaye abanyamakuru kuwa mu 2014 ubuyobozi bwayo bwavuze ko ifaranga ry’u Rwanda ridahinduka cyane, ko no mu myaka 20 ishize habaye impinduka zikomeye inshuro ebyiri gusa, mu gihe ngo mu bindi bihugu bimwe na bimwe bo bahindura kenshi amafaranga bakoresha.

Umusesenguzi mu by’ubukungu, Teddy Kaberuka, agaragaza zimwe mu mpamvu zituma ibihugu bihindura ubwoko bw’amafaranga byakoreshaga, amashyashya bikayakwirakwiza mu bantu buhoro buhoro, bityo ayari asanzwe agasubizwa muri banki gake gake.

Umutekano w’amafaranga

Iterambere ry’ikoranabuhanga mu byiciro bitandukanye rirakomeza kwiyongera ku Isi ari nako ba rusahurira mu nduru baryifashisha mu manyanga akomeye arimo no kwiba igihugu cyangwa kwinjira mu mabanga yacyo.

Kaberuka avuga ko igihugu gishobora kubona abanyoni bageze ku ikoranabuhanga ryifashishwa mu gukora amafaranga yacyo, kigahitamo kuyahindura kikongeramo ibimenyetso bigaragarira amaso cyangwa bitagaragara kugira ngo abayigana bibagore.

Agira ati “ Uko ikoranabuhanga rigenda rirushaho gutera imbere, abigana amafaranga nabo barushaho kwiyongera, bigatuma Banki Nkuru ifata icyemezo cyo kugira utundi tuntu yongeramo kugira ngo uyigana bitazamworohera.”

Gusaza kw’amafaranga

Burya ngo nta kidasaza, amafaranga na yo ibyo akorwamo birasaza nk’uko imyenda cyangwa ibindi bikoresho bisaza.

Mu minsi mike Banki Nkuru y’Igihugu iherutse gutangaza ko buri mwaka u Rwanda rutanga miliyari ebyiri rukoresha mu mahanga amafaranga akoreshwa mu gihugu. Ahanini atangwa mu gusimbuza ashaje.

Hari igihe Banki Nkuru y’Igihugu ijya gukoresha amafaranga yashaje igasanga ibyo akorwamo byarahindutse cyangwa bitakiboneka bitewe no gutera imbere kw’ikoranabuhanga, bikaba ngombwa ko bahitamo gukoreshwa ibihari bigezweho, amafaranga akaba ahindutse atyo.

Amabwiriza y’ibigo mpuzamahanga

Kaberuka avuga ko hari igihe ibigo mpuzamahanga by’ubukungu nka Banki y’Isi n’ikigega mpuzamahanga cy’Ubukungu FMI, bishyiraho amabwiriza agena ingano mu burebure n’ubugari bw’inoti cyangwa umuzenguruko w’ibiceri.

Ibi bituma ibihugu bitegekwa ko amafaranga bikoresha ahinduka akagira indi miterere, akaba yakongerwamo ikintu runaka bigatuma imimerere y’inoti cyangwa igiceri ihinduka.

Impamvu za politiki

Hari igihe igihugu kinjira mu bihe by’intambara ndetse bigatuma abanyagihugu bahunga, aba bashobora guhungana amafaranga menshi ndetse bakajya aho iyo banki iba itakibasha kugenzura ayo mafaranga.

Ku bw’ibi, Banki ifata icyemezo cyo guhindura amafaranga bigatuma abayahunganye bayagarura kugira ngo atabapfira ubusa.

Urugero rwa vuba ni ibyabaye mu Burundi ubwo hatangiraga kuba imvururu za politiki zatumye abarenga ibihumbi 300 bahungira mu bihugu bitandukanye batwara n’amafaranga y’u Burundi, ibi byatumye Banki Nkuru y’u Burundi iyahindura ndetse ishyiraho n’igihe ntarengwa cyo kuba abayafite bayagaruye ngo baguranirwe.

Inoti ya 5000 yasohotse 2004
Inoti ya 5000 yo mu 1998
Inoti ya 500 ya 2013
Inoti ya 500 yo muri 2004

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved