Yaourt na Fromage zikorerwa mu Rwanda zabuze ku isoko

Yanditswe na IGIHE
Kuya 11 Nzeri 2017 saa 08:59
Yasuwe :
0 0

Kubara Icyemezo cy’ubuziranenge gutangwa na Ikigo cy’igihugu gishinzwe ubuziranenge (RSB) cyatumye zimwe mu nganda zatunganyaga ibikomoka ku mata ziba zibihagaritse, fromage, yaourt n’ibindi bikomoka ku mata bigabanuka ku isoko.

Tariki 20 Mata uyu mwaka nibwo RSB yandikiye amaguriro acuruza ibikomoka ku mata ko atemerewe kwakira ibiyakomokaho bidafite icyemezo cy’ubuziranenge.

Muri Kamena uyu mwaka Minisiteri y’Ubutegetsi bw’igihugu yandikiye abayobozi b’Uturere ibasaba gushyira mu bikorwa umwanzuro wa RSB w’uko hagurishwa gusa ibikomoka ku mata bifitiwe icyemezo cy’ubuziranenge.

Kugeza ubu kubona bimwe mu bikomoka ku mata nka yaourt na Fromage muri Kigali ni ingorabahizi.

Umuyobozi ushinzwe ubuziranenge muri RSB, Philip Nzayire, yabwiye The New Times dukesha iyi nkuru ko bashyizeho amabwiriza y’ubuziranenge kugira ngo barengere ubuzima bw’abagura ibyo bicuruzwa.

Ati “Dukunda amata ariko n’udukoko turayakunda kandi utwo dukoko dushobora gutera abaturage indwara …iyo nta kigaragaza ubuziranenge bw’igicuruzwa, ntabwo wacyizera kandi nta bundi buryo abaturage bakwizera ko inzego zishinzwe ubuziranenge zasuzumye icyo gicuruzwa.”

Umukozi wa Simba Super Market ushinzwe imenyekanishabikorwa, Peter Sebukayire , yavuze ko ubu baretse kurangura ibikomoka ku mata bikorerwa mu Rwanda, barangura ibyakorewe mu mahanga by’umwihariko za fromage kuko ngo nta zikorerwa mu Rwanda zujuje ubuziranenge nk’ubwo RSB isaba.

Sebukayire yavuze ko basigaye barangura Fromage muri Kenya. Bitewe n’ubwoko bwayo, ngo Fromage imwe mu zo barangura mu mahanga igura hagati ya 5000 Frw na 7000 Frw mu gihe izakorewe mu Rwanda zaguraga 3,000 Frw.

Umuyobozi wa Nakumatt mu Rwanda, Adan Ramata yavuze ko ubusanzwe bakundaga kurangura Fromage zo mu Rwanda kuko ari zo zikundwa n’abakiliya, icyakora ngo ubu barabiretse kuko ntazifite icyangombwa cy’ubuziranenge.

Ati “Iyo abakiliya baje tubabwira ko tugitegereje abazitugemurira.Ibi byatugizeho ingaruka kuko abakiliya ntabwo babona icyo bashaka kandi bibagiraho ingaruka nabo kuko batabasha kubona ibyo bamenyereye”.

Umuyobozi w’Ikaragiro rya Ingabo Dairy Ltd riherereye mu Karere ka Nyabihu André Rwayitare, yavuze ko icyemezo cya RSB cyabagizeho ingaruka kuko haba ubwoko icyenda bwa Fromage bakoraga ndetse n’ubwoko butanu bwa yaourt bakoraga nta na bumwe bwujuje ibisabwa na RSB.

Rwayitare yavuze ko bari gukora ibyo basabwe kugirango bakomorerwe birimo kuzana ibikoresho bijyanye n’igihe kandi bifite isuku.

Umuyobozi Mukuru Ushinzwe ubucuruzi n’ishoramari muri Minisiteri y’Ubucuruzi n’Inganda, Dr Robert Opirah, yabwiye New Times ko bagiye gusura inganda zagizweho ingaruka n’umwanzuro wa RSB bakazigira inama ndetse n’izigaragaje kubura ibikoresho bakazikorera ubuvugizi zikabona amafaranga yo kugura ibigezweho.

Amakuru aturuka mu ihuriro ry’amakaragiro mu Rwanda (RNDP) avuga ko amakaragiro 61 yagizweho ingaruka n’icyemezo cya RSB, arindwi niyo yari yujuje ibisabwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza