00:00:00 IGIHE NETWORK KN KINYARWANDA EN ENGLISH FR FRANCAIS

Volkswagen yamuritse imodoka ebyiri nshya ku isoko ry’u Rwanda

Yanditswe na Dufitumukiza Salathiel
Kuya 13 Ugushyingo 2021 saa 12:57
Yasuwe :
0 0

Ikigo cy’Abadage gikora imodoka, Volkswagen, kibinyujije mu Ishami ryacyo rya CFAO Motors Rwanda cyamuritse imodoka ebyiri za T-Cross zigejejwe bwa mbere muri Afurika yo Munsi y’Ubutayu bwa Sahara.

Ni mu muhango wabereye aho iryo Shami rikorera i Masoro mu cyanya cyahariwe inganda, kuri uyu wa 12 Ugushyingo 2021.

Imodoka nshya zamuritswe ni T-Cross Comfortline na T-cross Highline ziri mu cyiciro kibarizwamo izitangiza ibidukikije kandi zikoresha neza lisansi.

Umuyobozi ushinzwe Ubucuruzi muri CFAO Motors Rwanda, Mugabo Jean Luc, yavuze ko izo modoka zihendutse ku isoko ry’u Rwanda.

Yagize ati “Kuva twatangira muri 2018, mu nshingano zacu twakomeje gushaka imodoka zifite igiciro kiri hasi kandi zitangiza ibidukikije. Ni muri urwo rwego uyu munsi twashyize ku isoko ry’u Rwanda T-Cross ifite moteri nto ijyamo litiro 1,6, bivuze ko iminywere yayo ari myiza.”

“Icya kabiri ni ibijyanye n’ibidukikije. Iyo ijya mu muhanda iba ifite ukuntu itazana imyotsi. Icya gatatu ni ukwegereza imodoka Abanyarwanda badafite ubushobozi bwo hejuru. Turacyakomeza kugerageza kuvanaho icyo kintu tunamanura ibiciro hasi bishoboka.”

Mugabo yavuze ko T-Cross Comfortable izaba igura muri miliyoni zirenga 20 Frw, naho T-Cross Highline ikagura muri miliyoni zirenga 30 Frw kuko zitanganya ubushobozi.

Ati “Ubu turacyaganira n’uruganda ukuntu tuzagenda tugabanya ibiciro by’imodoka n’izo twatangiriyeho kugira ngo Abanyarwanda babone inyungu yo guhendukirwa n’iziteranyirizwa mu Rwanda.”

Izo modoka kandi zishobora kuboneka ku nguzanyo ku bufatanye bwa banki, aho uyishaka yemererwa kuzayishyura mu myaka itanu.

Ni ubwoko bwa karindwi buteranyirijwe mu Rwanda kuva Volkswagen yahagurira ibikorwa byayo.

Guhitamo u Rwanda nk’igihugu cya mbere zigezwamo muri Afurika yo munsi y’Ubutayu bwa Sahara, ngo byashingiye ku kuba rufite isoko rigenda rizamuka. Byanagizwemo uruhare n’Ishami rya Volkswagen muri Afurika y’Epfo.

Ubundi bwoko bwabanje burimo ubwa Polo, Terramont, Pickup,Tiguan na Passat.
T-Cross zifite umwihariko wo kuba zitekanye bijyanye n’ikoranabuhanga ryazo rizwi nka “Park Distance Control” rifasha mu gihe umushoferi arimo aparika ahantu hafunganye.

Zinafite ikoranabuhanga rya “App connect” rifasha uyirimo kumva amakuru, imiziki, ibitabo by’amajwi cyangwa ukaba washobora kureba ku ikarita.

T-cross ya Comfortline inafite camera inyuma ifasha umushoferi kureba ibiri inyuma ye, ikoranabuhanga riyizanamo ubushyuhe cyangwa ubukonje, ikanagira “cruise control” ifasha kugabanya umunaniro mu gihe umushoferi yamaze umwanya munini atwaye.

Izi modoka ziboneka mu mabara arindwi atandukanye, uyishaka agahitamo iryo akunda.

Iyi ni T-cross Highline imuritswe bwa mbere muri Afurika yo munsi y'Ubutayu bwa Sahara
Umuyobozi Mukuru wa CFAO Motors Rwanda Ltd, Srinivas Cheruvu (ibumoso) ubwo hamurikwakaga T-cross (iyi ni Comfortline)
Izo modoka ziratekanye bitewe n'imiterere yazo kandi ziboneka mu mabara atandukanye umukiliya agahitamo iryo yishimiye
T-Cross Highline yihariye ku ikoranabuhanga rya Park Assist
Ni ubwa mbere izi modoka zigejejwe muri Afurika yo munsi y'Ubutayu bwa Sahara
Umuyobozi Mukuru wa CFAO Motors Rwanda Ltd, Srinivas Cheruvu yavuze ko uko isoko ry'u Rwanda ryifashe kugeza ubu bishimishije
Umuyobozi ushinzwe ubucuruzi muri CFAO Motors Rwanda, Mugabo Jean Luc, yavuze ko izo modoka zinahendutse ku isoko ry’u Rwanda
Ifoto y'Uwibutso y'abakozi ba CFAO Motors Rwanda yafashwe imodoka zimaze kumurikwa
Izi modoka ntabwo zinywa cyane kuko moteri yazo ijyamo litiro 1,6 za lisansi
Ubuyobozi bwa Volkswagen bwavuze ko bwakomeje gushaka imodoka zifite igiciro kiri hasi kandi zitangiza ibidukikije
Izi modoka ngo zishobora kuboneka ku nguzanyo ku bufatanye bwa banki na Volkswagen

Amafoto agaragaza imiterere y’izi modoka mu bice by’imbere

Izi modoka zifite ikoranabuhanga rya GPS

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .