Uwase yashinze iduka rizajya rinigishirizwamo ababyeyi kwita ku mwana

Yanditswe na Mugabo Jean d’Amour
Kuya 6 Nzeri 2017 saa 06:01
Yasuwe :
0 0

Nyuma yo guhabwa amasomo ku buryo bitegura kubyara no kwita ku mwana ndetse akanaganira n’ababyeyi bagenzi be batandukanye agasanga hari byinshi yabungura mu bijyanye no kwitegura kubyara no kurera abana, Uwase Patricie, yafunguye rizwi nka Perla’s Baby and Mother Care”, rifite ibyo umwana akenera byose kuva akivuka kugeza ku myaka itanu, by’umwihariko hakajya hanatangirwamo amahugurwa ku kwita ku mwana.

Uyu mubyeyi avuga ko yagize amahirwe yo guhabwa amasomo ategurira umugore kubyara (birth classes) ubwo yari muri Amerika, akaba amufasha kwita ku mwana w’amezi 11.

Uretse umwana we, Uwase yiyemeje gukora ubucuruzi ariko akanafasha abandi babyeyi kugira ubumenyi ku kwita ku mwana. Kuri ubu avuga ko ari mu biganiro n’umuryango mpuzamahanga utanga amasomo ku kwitegura kubyara no kurera witwa ‘Lamaze International”.

Uwase yagize ati “Nasanze ababyeyi bakeneye amasomo yerekeye kubyara no kurera kuko nanjye yamfashije cyane. Ndateganya gutangiza ayo masomo mu mezi atatu ari imbere…Mu ntangiriro tuzakorana n’abaganga b’inzobere bazajya bigisha ababyeyi, turateganya kujya tubigisha ku Cyumweru hano kuri Perla’s, bakiga uko babaho iyo batwite, uko bitegura kubyara ndetse na tekiniki zikoreshwa kugira ngo umubyeyi abyare neza, uko barera abana n’ibindi bireba ababyeyi.”

Nubwo Uwase ataragena icyo bizajya bisaba umubyeyi kugira ngo akurikire ayo mahugurwa, avuga ko ayo masomo azatangira vuba kandi ku buryo buzorohera buri wese, ayo masomo akajya atangirwa mu cyumba cyabugenewe cya Perla’s Baby and Mother Care”.

Hagati aho, Uwase nawe agenda ahugura ku giti cye ababyeyi.

Uwera Denyse, umubyeyi ufite uruhinja rw’amezi 2.5, wari mu ifungurwa rya Perla’s Baby and Mother Care, yabwiye IGIHE ko Uwase yamufashije agakira ububabare yaterwaga no konsa, amugiriye inama y’umuti yafata.

Yagize ati “Nari mfite ikibazo cyo kubabara ngitangira konsa, maze ampa umuti nsigaho ndakira. Ubundi abenshi hano mu Rwanda ntitwari tuzi ko hari icyadufasha kurwanya kubabara igihe umubyeyi yonsa. Abantu bose barambwiraga ngo ni ko bimera ku bagore benshi bakibyara, ngo ngomba kubabara nyamara hari uburyo byakwirindwa tutari tuzi. Ni umuti mwiza utagira ingaruka ku mwana kandi umubyeyi akabasha gukira ubwo bubabare.”

Umwihariko wa Perla’s Baby and Mother Care

Ni iduka rimaze ukwezi rikorera mu nyubako ya CHIC mu Mujyi wa Kigali rikaba ryarafunguye ku mugaragaro mu ku wa Gatanu ushize. Iri duka rifite ubwoko icyenda bw’ibyo umwana akenera harimo imyambaro y’abana, ibyo mu mu cyumba, ibyo umwana arya n’ibikoresho byo kumugaburiramo, ibikoresho by’isuku, ibikinisho, utugare n’ibindi.

Uwase yagize ati “Umubyeyi ushaka kugurira umwana ava hano abonye ibyo akeneye byose byiza kandi ku giciro kiboneye. Ibyinshi mu byo ducuruza hano tubikura mu Bwongereza ariko dufite n’ibyo twakuye i Bruxelles mu Bubiligi. Ikindi ni uko tuzana ibintu biramba ku buryo umuntu abigura ntazagaruke inshuro nyinshi, ibintu bidacuyuka, bidacika ubusa.”

Uwase yakuye igitekerezo cyo gutangiza iri duka mu byo yanyuzemo ubwo yashakiraga umwana we bimwe mu bikoresho akagorwa no kubibona i Kigali.

Yagize ati “Umwana nari naramuguriye ibintu azakoresha kugera ku myaka ibiri ariko mbona umwana akuze vuba atangiye kubisiga, ibyo nari naraguze byanga kumukwira, ntangira gushakisha ibindi muri Kigali. Aho ngeze hose nkasanga ibikoresho biri mu biciro bihanitse kandi bitanafite quality (ubwiza) nk’ibyo nari naraguriye hanze y’igihugu mbere.”

Akomeza agira ati “Ikindi naganiraga n’abandi babyeyi ngasanga bafite ibibazo bitandukanye barimo abatabasha konsa abana kubera kubabara cyane. Njyewe nsanga ibyo ntarahuye na byo kuko nari narasobanukiwe ko hari umuti ukoreshwa, bamwe nabahaye ku muti nakoresheje mpita mbona ko hari demand (isoko).”

Uwase avuga ko hari ubwo amata yahaga umwana yashize akazeguruka Kigali yose ashaka andi akayabura, akibaza ati “Ese bibaho ko amata yuzuye i Burayi yabura muri Kigali yose! Ndavuga nti ‘nkwiriye kugira icyo nkora kugira ngo ntabare abandi babyeyi bagenzi banjye’.”

Umubyeyi w’abana babiri witwa Mutesi Eugenie, yavuze ko yasanze iri duka rifite ibikoresho byinshi byiza umubyeyi yakenera.

Yagize ati “Nakunze amakanzu y’abana, amata, biri ku giciro cyiza, nk’aya mata ari ku bihumbi 28,000 mu gihe ahandi ari 35,000.”

Iri duka ‘Perla’s Baby and Mother Care’ rikorera muri CHIC Basement 2 mu muryango wa B60 ryihaye gahunda yo kujya rikora iminsi yose.

Uwase Patricie wafunguye Perla's Baby & Mother Care, iduka rifite ibikoresho n'ibiryo by'abana
Iri duka ririmo amoko atandukanye y'ibyo abana bakenera kuva bakivuka kugeza ku myaka itanu, rizajya rianatangirwamo amasomo afasha ababyeyi kwita ku mwana
Bamwe mu bakiriya baje kugura imyenda y'abana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza