Kwamamaza

Uruzinduko rwa Kagame muri Tanzania rugiye kuzamura ubucuruzi bw’ibihugu byombi

Yanditswe kuya 25-11-2016 saa 14:51' na Cyprien Niyomwungeri


Hashize amezi asaga ane Perezida Kagame asuye Tanzania, uruzinduko rwe rwagize akamaro gakomeye cyane kuko uretse kuzura umubano, rwanatumye hagiye guterwa intambwe y’amateka mashya mu bucuruzi bw’ibihugu byombi.

Abakurikiranira hafi iby’ubucuruzi, bemeza ko kugeza ubu hagati y’u Rwanda na Tanzania ntabwari buhari kubera amananiza yagaragaraga cyane ku ruhande rwa Tanzania.

Minisitiri w’ubucuruzi, inganda n’ibikorwa by’umuryango wa Afurika y’Iburasirazuba, Mineacom, Francois Kanimba, yagaragaje aho umubano w’u Rwanda na Tanzania mu bijyanye n’ubucuruzi uhagaze, by’umwihariko intambwe imaze guterwa mu gukemura amananiza yari aburimo.

Yavuze ko mbere inganda z’u Rwanda zageragezaga kohereza ibicuruzwa muri Tanzania ugasanga inzego za leta zishinzwe ibijyanye n’ubuziranenge zizanamo ibibazo bituma abanyenganda bacika intege. Yongeraho ko ibyo bibazo binyuranyije n’amasezerano y’Umuryango wa Afurika y’Iburasirazuba (EAC).

Kanimba yahishuye ko amananiza yasubizaga inyuma ubucuruzi bw’ibihugu byombi yari ashingiye ku kigo gishinzwe gutsura ubuziranenge cya Tanzania.

Yagize ati “Inzego z’ubuziranenge za EAC zari zaragiranye amasezerano yo koroshya no gukorana ku buryo niba ibicuruzwa byo mu ruganda rw’u Rwanda byabonye icyemezo gitangwa n’ikigo cy’ubuziranenge, ntakindi cyemezo bagomba gusabwa iyo bajyanye ibicuruzwa muri Tanzania cyangwa mu bindi bihugu bya EAC, nkuko natwe ibivuyeyo bifite ibyemezo by’ubuziranenge byaho tubyemera bikinjira.”

Yatangaje ko mu ruzinduko Umukuru w’Igihugu aherutse kugirira muri Tanzania, ibiganiro hagati y’ibihugu byombi byibanze ku gukuraho ayo mananiza ubuhahirane bukagerwaho.

Ati “Abakuru b’ibihugu byombi baje gusaba ko Abaminisitiri b’ubucuruzi bazakora inama yihariye kugirango baganire kuri ibyo bintu ngo ubucuruzi hagati y’u Rwanda na Tanzania butere imbere, nkuko twese tubitegereje dushingiye ku masezerano duhuriyeho muri EAC.”

Minisitiri Kanimba yongeyeho ko bakomeje kuganira na Minisitiri w’ubucuruzi wa Tanzania kandi hari inama bitegura izatuma ariya mananiza avaho abacuruzi b’ibihugu byombi bakabyaza umusaruro uwo mubano.

Ati “Turateganya gukora inama i Dar es Salaam hagati y’inzego za leta z’ibihugu byombi ariko turashaka no kugirango abanyenganda b’Abanyarwanda bashobora kubona isoko muri Tanzania na bo bitegure tuzajyane muri urwo ruzinduko kugira ngo batangire barebe koko niba Tanzania yiteguye kutworohereza uko bahita binjira kuri iryo soko ngo umusaruro uturuka ku nganda zacu wiyongere.”

Ibyo biganiro byitezweho kubyara umusaruro ku bucuruzi bwambukiranya imipaka kuko byigeze kubaho, ubwo RDB RDB yajyanaga abanyenganda muri Uganda bakagirana amasezerano n’abacuruzi ba Uganda. Ibi byatumye ubucuruzi bwiyongera hagati y’ibihugu byombi kuko ubu ibyoherezwayo byazamutse hafi 15%.

Perezida Kagame ubwo yagiriraga uruzinduko muri Tanzania muri Nyakanga uyu mwaka

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved