Kwamamaza

Ibibazo bivugwa mu bucuruzi bw’inyongeramusaruro byaturutse he?

Yanditswe kuya 9-09-2016 saa 09:00' na IGIHE


Hashize iminsi havugwa ibibazo bitandukanye mu bucuruzi bw’inyongeramusaruro byatumye bamwe mu babukora bagezwa imbere y’ubutabera bakurikiranyweho ibyaha bishamikiye ku gucuruza itujuje ubuziranenge.

Uku gutanga inyongeramusaruro itujuje ubuziranenge ni ikibazo Egide Gatari ushinzwe kugenzura ibijyanye n’inyongeramusaruro mu Kigo cy’Igihugu gishinzwe ubuhinzi, RAB, avuga ko leta idashobora kwihanganira kuko
​ari ukuroha abaturage.

Imbarutso ya byose…

Kuva mu 2013, Leta ikorana n’abikorera ku giti cyabo mu kugeza inyongeramusaruro ku bahinzi gusa bishyira muri Gicurasi 2016 nibwo hatangiye kuzamo ibibazo bishingiye ku bunyangamugayo.

Mu minsi ishize umwe muri aba bikorera ufite ikompanyi yitwa ENAS Ltd, Nkubiri Alfred, yatawe muri yombi ndetse arafungwa akurikiranyweho kurenga ku mabwiriza agacuruza inyongeramusaruro itujuje ubuziranenge.

Minisiteri ifite ubuhinzi mu nshingano zayo nyuma yo gusanga ko iyi fumbire itujuje ibipimo by’ubuhehere bisabwa, yamusabye kuyisubiza hanze y’igihugu kuko itemewe ku isoko ry’u Rwanda.

Amakuru agera kuri IGIHE avuga ko ibi atariko byahise bikorwa ahubwo Nkubiri yihutiye kwandikira ikompanyi yari yaguze nayo iyo fumbire, nayo isaba ko hakorwa irindi suzuma ryagaragaza ko iyo nyongeramusaruro ifite ikibazo ikayisubiza aho yaturutse.

Iyi fumbire yari yaturutse muri Kenya

Iyi nyongeramusaruro yateje ibibazo yazanywe mu Rwanda n’Ikompanyi yitwa ETG [Export Trading Group Ltd] iyikuye ku ishami ryayo riri muri Kenya hanyuma iyigurisha ENAS ya Nkubiri.

Santosh Shukla uhagarariye ETG mu Rwanda yabwiye IGIHE ko kuva mu 2008 bakoreraga mu gihugu bakura ifumbire muri Tanzania ariko baza kuhatangiza ishami mu 2012.

Muri iyo myaka yose ngo bakoranaga neza na Minagri ndetse nta kibazo umukiliya wabo yari yakagize kijyanye n’ubuhehere cyangwa ibindi.

Santosh ati “ETG Kenya yacuruje ENAS toni 733 za DAP. Umuzigo iyo ugeze mu Rwanda nyirawo akoresha isuzuma. Bararikoresheje ibipimo bisohoka bigaragaza ko ibintu atari bizima. Urebye igihe bafatiye ifumbire bagiye kuyipima n’igihe ibisubizo byabonekeye ubona ko harimo intera y’iminsi itandatu.”

“ENAS yahise inyandikira imbwira ko ibintu byanjye bipfuye ko ngomba kubisubizayo. Njya muri Minagri barambwira ngo niba ntanyuzwe ninkoreshe irindi suzuma. Icyo ni igitekerezo nahawe n’umudamu wo muri RALIS abashinzwe
​gutanga uruhushya.”

Nyuma yo kugirwa inama yo gukoresha irindi suzuma, Santosh avuga ko ya fumbire yatsinzwe isuzuma rya mbere ​yasubijwe mu Kigo cy’Igihugu gishinzwe Ubuziranenge [RBS] ngo yongere isuzumwe, nyuma y’iminsi itatu igisubizo cyaje kigaragaza ko ari nzima.

Ati “Ya fumbire na none yagejejwe kuri RBS bakora isuzuma riza rigaragaza ko ari nzima. Ibipimo by’ubuhehere byaje ari 0.96 [ kandi iyemewe igomba kuba ifite 1], ibya mbere byafashwe byari 10.9. Njye ibisubizo nabibonye mu minsi itatu.”

Habonetse ibisubizo bitatu bitandukanye

Impapuro IGIHE ifitiye kopi zigaragaza ko bwa mbere iyi nyongeramusaruro yagejejwe kuri RBS gupimwa tariki ya 6 Mata 2016 ibisubizo bikaboneka kuwa 12 uko kwezi bigaragaza ko ibipimo by’ubuhehere ari 10.9.

Bigaragara kandi ko ETG [Santosh] we yakoresheje isuzuma rya kabiri tariki ya 25 Mata 2016, nyuma y’iminsi itatu kuya 27 akabona ibisubizo by’uko igipimo cy’ubuhehere ari 0.96 mu gihe ibyemewe bitagomba kurenga 1.

Irindi suzuma ryakozwe n’Ikigo gishinzwe ​gutanga uruhushya rwo gucuruza inyongeramusaruro gishamikiye kuri Minagri [RALIS] tariki ya 20 Gicurasi 2016 gishyikiriza RBS ifumbire ngo igenzurwe. Ibisubizo byabonetse uwo munsi bigaragaza ko ubuhehere ari 9.6.

​Aho urujijo​ ruturuka​…

Inyandiko IGIHE ifitiye kopi zigaragaza izindi kompanyi zari zifite inyongeramusaruro ifite ubuhehere burenze ubusabwa.

Hari imwe isuzuma ryagaragaje ko mu 2013 yari ifite inyongeramusaruro ifite ubuhehere bungana na 9.6 mu gihe ubusabwa ari 1. Muri uwo mwaka isuzuma rigaragaza indi ifite ibipimo bingana na 8.6 na 9.19 mu 2014.

Ibi byaba bivuze ko izi nyongeramusaruro niba zitarasubijwe ku isoko zacurujwe abaturage kandi zitujuje ubuziranenge cyangwa ibisabwa.

Hari inyongeramusaruro yagaragaye ko nayo itujuje ubuziranenge ariko bivugwa ko itasubijwe hanze. Iyi ibipimo by'ubuhehere byagaragazaga ko ari 9.6 kandi hakenewe 1

Hari ibipimo RAB itemera

Egide Gatari ushinzwe kugenzura ibijyanye n’inyongeramusaruro mu Kigo cy’Igihugu gishinzwe ubuhinzi, RAB, yabwiye IGIHE hari ibipimo bimwe byafashwe mu buryo butazwi.

Ati “Iyo uzanye igicuruzwa uruhushya rwo kugikwirakwiza rutangwa na RALIS. RBS ikora isuzuma iri kumwe na RALIS none ho bakajya gupima bakatwereka ibisubizo. Kuri iki kibazo, ubwa mbere barabikoze na RALIS ihari, ibipimo biza byerekana ko ifite ikibazo, ubwa kabiri ntabwo tuzi uburyo yafashwemo kubera ko RALIS nk’abatanga uruhushya ntabwo bari bahari ari nayo mpamvu hakozwe isuzuma rya gatatu ryagaragaje ibisubizo nk’ibya mbere.”

Kubera inyungu iba mu bucuruzi bw’inyongeramusaruro, Gatari avuga ko ariyo mpamvu ahanini hajya hagaragara amanyanga muri uru rwego gusa ngo leta iri gukora ibishoboka byose ‘mu nyungu z’umuturage’.

Twagerageje kuvugisha ubuyobozi bwa RALIS ngo budusobanurire ku bivugwa ko hari ibigo byaba byaracuruje inyongeramusaruro itujuje ibisabwa ariko ntibisabwe kuyisubiza aho yavuye gusa ntibyadukundira kuko butasubije ubutumwa bwa email ndetse na telefoni.

Gusa Gatari avuga ko n’uwaba yarabikoze wese yaba ari amanyanga yakoze yo guca mu rihumye ubuyobozi ko nawe afashwe yakurikiranwa.

U Rwanda rwashyize imbere gahunda yo gukoresha inyongeramusaruro mu buhinzi hagamijwe kuzamura umusaruro ukomoka ku buhinzi, kuri ubu mu gihembwe cy’ihinga gitaha hazifashishwa toni zirenga ibihumbi 26.

Iyi nyongeramusaruro y'ikompanyi yitwa Top Services ibipimo by'ubuhehere ni 8.6 kandi ibyemewe bitagomba kurenga 1, hakibazwa niba yaba yarasubijwe hanze y'igihugu
Iyi nyongeramusaruro yapimwe mu 2014 nayo ibipimo biza bigaragaza 9.19 kandi kandi ibyemewe ari 1

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved