Uruganda ZTE rwakoze ‘Karasharamye’ rwashegeshwe n’ibihano bya Amerika

Yanditswe na Evariste Nsengimana
Kuya 10 Gicurasi 2018 saa 12:36
Yasuwe :
0 0

Ikigo cy’Abashinwa kigurisha telefoni nyinshi muri Leta Zunze Ubumwe za Amerika, ZTE Corporation, cyatangaje ko cyashegeshwe bikomeye n’ibihano giheruka gufatirwa na Amerika ku buryo ibikorwa byinshi byamaze guhagarara.

Uruganda rwa ZTE ruzwi mu Rwanda ko rwazanye telefone ihendutse mu zari ku isoko guhera muri za 2008 yari izwi nka ’Karasharamye’, telefone y’uruti ruto ariko igashimwa na benshi bitewe n’ubwiza bwayo icyo gihe.

Kuri ubu rumerewe nabi muri Amerika mu ntambara y’ubucuruzi ikomeje hagati y’iki gihugu n’u Bushinwa.

ZTE yajyaga ikorana byihariye n’ibigo byo muri Amerika mu kubona bimwe mu bikoresho bigize smartphone, harimo nka microchips ziva mu ruganda Qualcomm n’ibirahuri biva mu kigo Corning Inc. Ibyo bigo nabyo inyungu yabyo byitezwe ko igomba guhungabana.

CNN yatangaje ko bimwe mu bikorwa by’uru ruganda byahagaze ndetse ibikoresho rucuruza birimo telefoni zigezweho n’ibikoresho by’itumanaho, ubu ntibigaragara ku masoko yo kuri internet guhera kuri uyu wa Gatatu.

Mu kwezi gushize nibwo Minisiteri y’Ubucuruzi muri Amerika yabujije ibigo byo muri Amerika gukorana ubucuruzi no guha serivisi izo arizo zose ZTE kugeza mu 2025, inayica amande ya miliyari 1.2$.

Amerika ishinja ZTE kurenga ku bihano byafatiwe Korea ya Ruguru na Iran ndetse ikabeshya abayobozi ba Amerika ko abakozi babigizemo uruhare bahanwe.

ZTE ibihakana yivuye inyuma ndetse bamwe babihuza n’umugambi wa Amerika wo gushyira amananiza mu rugendo rw’u Bushinwa mu kwiyubaka mu ikoranabuhanga.

Mu itangazo urwo ruganda rwashyize ahagaragara muri Mata, rwashimangiye ko “Bibabaje uburyo [Ishami rya Minisiteri y’Ubucuruzi rishinzwe Inganda n’umutekano] ryahisemo gutanga ibihano bikomeye na mbere yo kurangiza iperereza.”

Icyo gihe ZTE yo yavuze ko ifite amafaranga ahagije izakomeza kugenda yifashisha mu bikorwa bitandukanye, ikananashaka umuti w’ikibazo binyuze mu biganiro. Gusa ubu birasa n’ibyananiranye.

Mu kwezi gushize ZTE yeruye ko ibyo bihano bizayigiraho “ingaruka zikomeye”, ndetse inyandiko uruganda rwa ZTE rwandikiye ikigo cy’isoko ry’imari n’imigabane muri Hong Kong, rwashimangiye ko ibikorwa byinshi byahagaze, no ku cyicaro gikuru mu mujyi wa Shenzhen.

Amerika muri Werurwe nibwo yatangaje ko ifatiye ibihano u Bushinwa ibushinja kubiba umutungo mu by’ubwenge, buri gihugu kivuga ko gishobora gushyiriraho ikindi imisoro ishobora kugera muri za miliyari.

Umuvugizi w’ishami rishinzwe inganda n’umutekano muri Amerika, yavuze ko bagiye guha amahirwe ZTE yo kugaragaza ibimenyetso simusiga bigaragaza ko batakoze ibyaha bashinjwa.

Gusa umuyobozi ushinzwe ubushakashatsi mu kigo Counterpoint Research, Jeff Fieldhack, yavuze ko ibi bihano ari ’igihano cy’urupfu’ kuri ZTE mu bijyanye na smartphone.

ZTE ni ikigo gikomeye ku Isi mu gukora no gucuruza telefone zigezweho n’ibikoresho by’itumanaho kuko ari icya kabiri mu Bushinwa, kikaza no ku mwanya wa Kane muri Amerika nyuma ya Apple, Samsung na LG.

Uruganda ZTE rwakomwe mu nkokora ku isoko rya USA
Telefone izwi nka 'Karasharamye'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza