00:00:00 IGIHE NETWORK KN KINYARWANDA EN ENGLISH FR FRANCAIS

Uruganda rwa Rutsiro Honey Ltd rwamuritse ubuki bw’umwimerere bwabonye isoko mu mahanga

Yanditswe na Claude Bazatsinda
Kuya 4 Nzeri 2021 saa 08:39
Yasuwe :
0 0

Uruganda rutunganya umusaruro w’ubuki, Rutsiro Honey Ltd ku bufatanye n’Ikigo cy’Igihugu cy’Ubushakashatsi n’Iterambere ry’Inganda NIRDA, bamuritse ubuki bw’umwimerere buturuka mu bworozi bukorerwa mu ishyamba rya Gishwati.

Uru ruganda ruhuriweho n’abikorera b’abavumvu, Akarere ka Rutsiro na NIRDA ruherereye mu Karere ka Rutsiro, rutunganya umusaruro w’ubuki bw’amakoperative akorera umwuga w’ubuvumvu mu nkengero z’Ishyamba rya Gishwati riri muri Pariki y’Igihugu ya Gishwati-Mukura, bugacuruzwa ku isoko ryo mu Rwanda no mu mahanga kuko basanze bwujuje ubuziranenge mpuzamahanga.

Bamwe mu bavumvu bakorana n’uru ruganda, bavuga ko bamaze gutera imbere babikesha Uruganda Rutsiro Honey Ltd kuko bavuye ku buvumvu bwa gakondo bakabukora kinyamwuga ku buryo bifuza no kwegukana imigabane y’uru ruganda yari ifitwe na Leta.

Umuyobozi w’ihuriro ry’amakoperative y’abo bavumvu, Hakizimana Jean Damascène ni umwe muri bo.

Yagize ati "Mbere twasaruraga ubuki tukabubika mu bibindi, tukirirwa tubuzererana ndetse hari n’ubwadupfiraga ubusa ariko twabonye uruganda rwakira umusaruro wacu wose, bituma abavumvu biteza imbere, twabonye imizinga ya kijyambere itanga umusaruro mwinshi bidufasha kwiteza imbere."

"Ubu abavumvu tubayeho neza nta wabura mituweli, amafaranga y’ishuri no kwikemurira ibindi bibazo, kuri ubu turifuza ko imigabane ya Leta yari muri uru ruganda twayigura tukayegurirwa natwe tukarushaho gutera imbere."

Umuyobozi w’Uruganda Rutsiro Honey Ltd rutunganya umusaruro w’ubuki Marie Chantal Nyirakamineza, avuga ko kuri ubu ubuki bwabo bucuruzwa ku masoko menshi yo mu gihugu kandi ko bwamaze no kugeza ku masoko mpuzamahanga nk’Iburayi kuko basanze bwujuje ubuziranenge mpuzamahanga.

Yagize ati "Ubuki bwacu bucuruzwa henshi mu Rwanda kandi bumaze kumenyekana kuko burakunzwe kubera ubuziranenge, abenshi babugura basanga ari bwiza. Ubuki bwa Rutsiro Honey Ltd bwamaze kwemerwa ku masoko y’i Burayi, mu Budage barabutwaye barapima basanga bwujuje ubuziranenge kuko nta kindi kintu twongeramo uretse kubusukura no kubuyungurura byonyine."

Umuyobozi w’Akarere ka Rutsiro, Ayinkamiye Emerance, avuga ko kuri ubu umwuga w’ubuvumvu wateye imbere kandi ugira uruhare runini mu iterambere ry’ako karere.

Yagize ati "Umwuga w’ubuvumvu umaze gutera imbere hano ndetse ntukiri wa wundi ukorwa n’abasaza nka mbere, abaturage ubwabo bakora uyu mwuga babibonamo amafaranga, uruganda na rwo rutanga imisoro n’akazi ibyo byose bigira uruhare runini mu iterambere ry’akarere."

Umuyobozi wa NIRDA, Dr. Christian Sekomo Birame, avuga ko bishimira ibikorwa bya Rutsiro Honey Ltd cyane cyane uburyo uru ruganda rucunzwemo akizeza ko mu gihe cya vuba bazarufasha no gushyira ku isoko ibindi bicuruzwa nk’uko biri mu ntego bari bihaye mu ntangiriro mu 2017.

Yagize ati " Iyo urebye imikorere y’uru ruganda usanga ari myiza ndetse n’uburyo rucunzwemo burashimishije, turi gukorana na bo ku buryo mu gihe cya vuba tuzabafasha kumurika ubwoko bune bw’inzoga (Vin), nk’uko biri mu ntego bari bihaye rujya gutangira. Abavumvu na bo bagaragaje icyifuzo ko mu gihe twatanga imigabane ya Leta irenga 50% iri muri uru ruganda ari bo bayigura. Tuzakomeza gufatanya kandi natwe twumva koko bitaba byiza ko iyi migabane yahabwa abandi kandi bano baragaragaje ubushake n’ubushobozi."

Uruganda Rutsiro Honey Ltd rufite ubushobozi bwo gutunganya umusaruro w’ubuki bungana na toni 160 ku mwaka mu gihe kuri ubu rukora ku kigera cya 17% mu gihe rutarongera ubushobozi ngo rutangire gutunganya inzoga z’ubuki, iz’ubuki buvanze na tangawizi, iz’ubuki buvanze n’inanasi n’iz’ubuki buvanze na marakuja nk’uko biteganyijwe mu mpera z’uyu mwaka.

Abavumvu bishimira ko kuri ubu bamaze kugeza ku musaruro uri hagati ya toni 12 na 15 ariko bagasaba Leta ko yafata ingamba ku kibazo cy’imiti ikoreshwa mu buhinzi yica udukoko harimo n’inzuki, kongera ibiti bitanga inda kugira ngo inzuki zibone aho zihova n’ibindi byatuma umusaruro w’ubuki uba muke.

Ubuki butunganyirizwa muri Rutsiro Honey Ltd bwabonye isoko mu mahanga
Ubuki bumaze kuyungururwa bushyirwa hamwe mbere y'uko bupakirwa mu macupa
Ubuki bubanza kuyungururwa mbere y'uko bushyirwa mu macupa
Nyirakamineza Marie Chantal, Umuyobozi w'uruganda Rutsiro Honey Ltd rutunganya ubuki buva muri Gishwati
Umuyobozi w'Akarere ka Rutsiro, Ayinkamiye Emerance, avuga ko kuri ubu umwuga w'ubuvumvu wateye imbere kandi ugira uruhare runini mu iterambere ry'ako karere.
Umuyobozi wa NIRDA Dr Sekomo Birame Christian yavuze ko bazafasha uru ruganda gushyira ku isoko ibindi bicuruzwa nk’uko biri mu ntego bari bihaye mu ntangiriro mu 2017
Abayobozi mu nzego zitandukanye bitabiriye igikorwa cyo kumurika ubuki bw'Uruganda Rutsiro Honey Ltd

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .