U Rwanda rwongeye kugaragaza ubushake bwo kunyuza ibicuruzwa ku cyambu cya Dar Es Salaam

Yanditswe na Philbert Girinema
Kuya 9 Nzeri 2016 saa 09:08
Yasuwe : XX
0

Minisitiri w’Intebe wa Tanzania Kassim Majaliwa yatangaje ko abacuruzi b’Abanyarwanda n’abo muri Repubulika Iharanira Demokarasi ya Congo, DRC, bemeye kongera gukoresha icyambu cya Dar Es Salaam nk’inzira y’ibicuruzwa byabo bijyanwa mu mahanga cyangwa bitumizwayo.

Tanzania itangaje ibi nyuma y’igihe ibi bihugu bigaragaza impungenge ku ikoreshwa ry’icyambu cya Dar Es Salaam, ndetse byari byanatangiye gutera umugongo icyo cyambu ahanini biturutse ku bujura bw’imizigo bwagiye buhavugwa, ndetse iki cyambu kikaba cyaravugwagaho ruswa.

Kuva muri Nzeli 2012, igenzura ryakozwe ryerekanye ko hibwe kontineri 11 z’amabuye y’agaciro yiganjemo “Coltan”, byakuruye igihombo cya miliyari 12,7 Frw.

Ubwo yari mu Nteko Ishinga Amategeko kuri uyu wa Kane, ikinyamakuru Daily News cyo muri Tanzania cyatangaje Minisitiri w’Intebe Kassim Majaliwa yashimangiye ko ibi bihugu byagaragaje ubushake bwo gufatanya mu bucuruzi n’icyambu cya Dar es Salaam aho kuba nk’icyambu cya Mombasa gusa.

Ati “DRC yaduhaye ibaruwa mu cyumweru gishize yemeza ko ubu bagiye gukoresha icyambu cya Dar Es Salaam nk’icyambu kibazanira ibicuruzwa. U Rwanda narwo rwagaragaje ko rwiteguye gukoresha icyambu cyacu.’’

Majaliwa yavuze ko muri iki gihe ku cyambu cya Dar Es Salaam amakontineri y’imizigo ihanyuzwa yagabanutse cyane nubwo ngo amakuru babonye ari uko ari ikibazo cyugarije Isi yose, ahanini ngo bigaturuka ku biciro byamanutse ku bikomoka kuri peteroli na Gaz.

Nyuma y’ibibazo byagiye bigaragazwa, mu Ukuboza umwaka ushize nibwo Perezida John Pombe Magufuli yirukanye Awadhi Massawe wari Umuyobozi Mukuru w’Icyambu cya Dar es Salaam na Prof. Joseph Msambichaka wayoboraga inama y’ubutegetsi, nyuma y’uko hagaragaye kontineri zambutse kuri icyo cyambu zitishyuriwe imisoro kandi zaragombaga kwishyuzwa.

Perezida Paul Kagame na Magufuli bakomeje gushyira ingufu mu kuzamura ubufatanye bw’ibihugu byombi kandi bugatanga inyungu ku mpande zombi, aho mu ruzinduko Perezida Magufuli yagiriye mu Rwanda muri Mata uyu mwaka yashimangiye ubushake bwa Tanzania mu gukemura ibibazo Abanyarwanda bari bakomeje guhura nabyo i Dar Es Salaam.

Yagize ati “Tanzania nk’uko n’u Rwanda ariko biri, ni ibihugu bihora bishakira abaturage babyo iterambere. Nzi neza mu bihe bishize ibibazo mwajyaga muhurira nabyo ku cyambu cya Dar es salaam, hari utubazo dutandukanye, nk’urugero uburyo bwo korohereza abatugana kuri icyo cyambu ntibwari buboneye, tutirengagije na ruswa yabangamiraga abashaka gukoresha icyambu cya Dar es Salaam.”

Biteganyijwe ko mu Ukwakira Ikigo cy’Igihugu gishinzwe ibyambu muri Tanzania (TPA), kizafungura ishami mu Mujyi wa Kigali, mu rwego rwo koroshya serivisi zihabwa Abanyarwanda.

Ibi bisobanuye ko Abanyarwanda bakura imizigo mu mahanga n’abayijyanayo batazongera gusabwa kujya ku cyambu cya Dar es Salaam gusaba urwandiko rwo kuyinyuza kuri icyo cyambu, ahubwo bazajya barusabira mu Rwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza