U Rwanda rwahize kwinjiza miliyari zisaga 1200 Frw mu 2024 mu bucukuzi

Yanditswe na Jean Pierre Tuyisenge
Kuya 6 Mata 2018 saa 03:24
Yasuwe :
3 2

Ikigo cy’Igihugu gishinzwe Mine, Gaz na Peteroli cyatangaje ko gifite intego yo kuba mu 2024 u Rwanda ruzaba rwinjiza miliyari 1.5 y’amadolari ya Amerika, arenga miliyari 1200 z’amafaranga y’u Rwanda mu bucukuzi.

Umuyobozi Mukuru w’icyo kigo, Francis Gatare, yagarutse kuri iyo ntego ubwo yagiranaga inama n’inzobere z’Ishami ry’Umuryango w’Abibumbye ryita ku bukungu bwa Afurika binyuze mu Kigo gishinzwe guhuza politiki z’ubucukuzi mu bihugu bya Afurika, yari igamije kungurana ibitekerezo ku mavugurura u Rwanda ruri gukora mu bucukuzi.

Icyo kigo cyatangaje ko hashize amezi agera kuri 12 cyaratangiye amavugurura agamije guhindura urwego rw’ubucukuzi.

Gatare yavuze ko ayo mavugurura azatuma u Rwanda ruba ikusanyirizo ry’aho ibikorwa by’amabuye y’agaciro bishobora gukorerwa, bikazafasha abikorera mu karere kose.

Yagize ati “Mu cyerekezo gishya cya politiki turi kuvugurura harimo ibyiciro bitandukanye, aho tureba uko umusaruro w’ubucukuzi ushobora gutanga umusaruro utubutse, twongera ubumenyi n’ibikoresho bishyirwamo hagakoreshwa ubuhanga n’ubumenyi bw’ababyize.”

Yavuze ko bari gushaka uburyo ibikoresho byifashishwa byazajya biba bigizwe ahanini n’ibituruka mu gihugu kuko ngo kugeza ubu 60% usanga biba byaraguzwe mumahanga.

Hari no gushakwa abandi ba rwiyemezamirimo ku buryo ubucukuzi butanga amafaranga menshi kurushaho.

Ubucukuzi bw’amabuye y’agaciro bugenda bwinjiriza igihugu amafaranga menshi, kuko mu 2016 bwinjije miliyoni 200 $, mu 2017 bwinjiza miliyoni 370 $, ariko harateganywa ko mu 2020 buzinjiza izigera kuri 800 $ naho mu 2024 zizaba zigeze kuri miliyari 1.5 $.

Gatare yasobanuyeko iyo ntego izagerwaho hongerwa umusaruro bishingiye ku gukoresha ubumenyi bugezweho, imashini no gukorana n’ibigo bikomeye bifite ubushobozi, hakazabaho no kongera amabuye aboneka mu Rwanda kuko ngo ubushakashatsi bwakozwe bwagaragaje ko hari andi moko u Rwanda rufite.

Umuyobozi w’agateganyo w’ Ikigo gishinzwe guhuza politiki z’ubucukuzi mu bihugu bya Afurika, Dr Kojo Busia, yashimye intambwe u Rwanda rumaze gutera mu bijyanye n’ubucukuzi bw’amabuye y’agaciro, gusa asaba ko rwarushaho gukoresha ibikoresho by’ikoranabuhanga kugira ngo rutange umusaruro munini.

Yagize ati “U Rwanda rumaze kugera heza ku bijyanye n’ubucukuzi bw’amabuye y’agaciro, muri iyi minsi Abashinwa bafite ibikoresho byakwifashishwa ku bacukuzi babikora ku buso buto kandi ndatekereza ko byakoreshwa na hano, icy’ingenzi ni uko hari amabwiriza n’amategeko abigenga byose byazamura umusaruro.”

U Rwanda ruri kugenda ruva ku gukora ubucukuzi bwifashisha ibikoresho bya gakondo ahubwo hagashyirwaho ikoranabuhanga.

Umuyobozi Mukuru w’Ikigo cy'Igihugu gishinzwe Mine, Gaz na Peteroli, Francis Gatare
Umuyobozi w’agateganyo w’ Ikigo gishinzwe guhuza politiki z’ubucukuzi mu bihugu bya Afurika, Dr Kojo Busia

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza