Kwamamaza

U Rwanda rwahigiye gukura Mauritius ku mwanya wa mbere mu koroshya ubucuruzi

Yanditswe kuya 7-11-2016 saa 14:34' na Rabbi Malo Umucunguzi


Umuyobozi w’Ikigo cy’Igihugu cy’Iterambere, RDB, Francis Gatare, yavuze ko ari ibintu bishimishije kuba u Rwanda rwaravuye ku mwanya wa 62 mu 2016 rukaba rugeze kuwa 56 nubwo rwifuza gukomeza kujya mbere.

Mu kiganiro n’abanyamakuru gikurikira isohorwa rya Raporo ya Banki y’Isi ku buryo u ibihugu byoroshya ishoramari, Gatare yavuze ko hari amavugurura u Rwanda rwakoze nko mu kwandikisha imitungo, kunoza ubucuruzi bwambukiranya imipaka n’ibindi, ariko runatakaza amanota mu bijyanye n’Ibyangombwa byo kubaka no kubona amashanyarazi.

Ati “Turakomeza kuba aba kabiri muri Afurika nubwo twifuza gufata umwanya wa mbere nibura mu mwaka utaha, tukanaza mu myaka 10 ya mbere ku Isi.’’

Minisitiri w’Ubucuruzi, Inganda n’Ibikorwa by’Umuryango wa Afurika y’Iburasirazuba, François Kanimba, ari na we ushinzwe Doing Business mu Rwanda, yavuze ko u Rwanda ruri gukora byinshi kugira ngo rukomeze kuzamuka, hakibandwa aho ruri guhabwa amanota make kandi n’inzego ziteye imbere umuvuduko ntuhagarare.

Minisitiri Kanimba yavuze ko Mauritius ari yo iri imbere y’u Rwanda muri Afurika kandi ikarurusha amanota make, ndetse ibipimo bikagaragaza ko yo iri gusubira inyuma kuko yavuye kuwa 32 ikagera kuwa 49.

Ati “Iyo urebye muri ibi bipimo ngenderwaho, hari igipimo kijyanye n’uburyo tworoshya ibijyanye no gutanga ibyangombwa byo kubaka. Twari kuwa 37 ubu twageze kuwa 158. Turacyaganira na Banki y’Isi, ariko nizera ko kugaruka ku mwanya wacu, kuko amakosa twakoze numva ko no kuyakosora bishoboka.’’

“Hari nk’ibindi bipimo nko gufasha abashoramari kubona amashanyarazi. Hari ibyo batweretse nko kugira amakuru ahagije ku buryo umuriro ucikagurika no kumenya niba ucitse igihe bimara ngo abashoramari babe bafata izindi ngamba. Twabiganiriye n’ibigo bibishinzwe batwereka ko ibituma tudahagaze neza bizwi kandi bari kubikoraho. Ntabwo duhagaze neza kuko turi ku 117’’.

Kanimba yavuze ko ahandi u Rwanda ruri inyuma ni mu kurengera abashoramari, aho Banki y’Isi yagaragaje ko itegeko ritarengera abashoramari kimwe, ubu rikaba rigiye kuvugururwa.

Ati “Dushobora kwibwira ko duhagaze neza tugasinzira, oya.’’

Rita Ramalho ushinzwe Doing Business muri Banki y’Isi, yavuze ko mu byanarebweho kuri iyi nshuro harimo uko mu kugira ibikorwa bibyara inyungu hatabaho ukwiharira hagati y’abagabo n’abagore, u Rwanda rukaba rwarahawe amanota meza.

Rita yagaragaje ko u Rwanda rwavuguruye ubucuruzi bwambukiranya imipaka, aho rwakuyeho igenzurwa ry’ibicuruza mbere y’uko bizanwa mu gihugu, ryari risanzwe ari itegeko, ndetse mu iyubahirizwa ry’amasezerano, rushyiraho uburyo bwo gukurikirana aho ikirego kigeze hifashishijwe ikoranabuhanga.

Iyi raporo ya 2017 yanagarutse ku bijyanye n’uburinganire, aho ibipimo ku burenganzira bungana mu kwandikisha, kugira ubucuruzi cyangwa uburenganzira babufiteho, basanze byubahirizwa ku bagabo n’abagore, hatirengagijwe ko mu nzego zifata ibyemezo abagore bagenerwamo 30%.

Ibihugu bya Afurika birangajwe imbere na Mauritius ya 49 ku Isi nubwo yasubiye inyuma ho imyanya 17, u Rwanda rukomeza kuba urwa kabiri muri Afurika n’urwa 56 ku Isi, Botswana ni iya gatatu n’iya 72 ku Isi ndetse yazamutseho umwanya umwe, Afurika y’Epfo ni iya kane muri Afurika n’iya 73, Maroc ikaba iya gatanu muri Afurika n’iya 75 ku Isi, aho yasubiye inyuma imyaka irindwi.

Biteganyijwe ko inzego za leta zirebwa n’aya mavugurura mu koroshya ubucuruzi zigomba guhita zihura kugira ngo ziyemeze ibigomba gukorwa mu gihe cya vuba.

Raporo ya 2017 igaragaza ko nibura mu 2003 kwandikisha ubucuruzi byafataga iminsi 52, mu gihe mu 2016 iyi minsi yagabanutse ikagera kuri 21.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved