U Rwanda rwabonye isoko ry’indabo mu Buholandi

Yanditswe na Philbert Girinema
Kuya 3 Nzeri 2016 saa 03:43
Yasuwe :
0 0

U Rwanda rwasinyanye amasezerano n’abacuruzi bo mu Buholandi ku mikoranire yo kuzajya bakira indabo ziruhingwamo bakazicuruza muri icyo gihugu n’ahandi.

Mu kiganiro kigufi IGIHE yagiranye na Ambasaderi w’u Rwanda mu Buholandi, Jean Pierre Karabaranga, yavuze ko aya masezerano yashyizweho umukono kuri uyu wa 2 Nzeli azafasha igihugu kongera umusaruro w’ibyoherezwa mu mahanga.

Ambasaderi Karabaranga yagize ati “ Nibyo koko u Rwanda rwatangiye guhinga indabo z’amaroza i Gishari, ubu twabonye ikompanyi y’Abaholandi izajya icuruza indabo z’u Rwanda haba mu Buholandi n’ahandi ku Isi ku bakorana nayo.”

Iyi kompanyi yasinyanye amasezerano na Bella Flowers yo mu Rwanda yitwa Van De Wiel Flowers” .

Amb. Karabaranga akomeza agira ati “Indabo za mbere zizagera ino [mu Buholandi] bitarenze mu byumweru bitatu kandi ibi birerekana imbuto nziza zatangiye kugaragara nyuma y’uruzinduko Umukuru w’Igihugu Paul Kagame yagiriye hano mu Buholandi mu mwaka umwe gusa.”

U Rwanda rushyize imbaraga mu buhinzi bw’indabo nka rumwe mu rwego rwitezweho kwinjiza amadevize menshi hagamijwe kugabanya icyuho hagati y’ibyoherezwa mu mahanga n’ibitumizwayo. Iyi ni nayo mpamvu hashyizweho umushinga ‘Gishari Flower Park’ uteganya ko hahingwa hegitari 100 z’indabo.

Miliyoni umunani z’amadolari niyo yashowe mu cyiciro cya mbere cy’uyu mushinga. Ni umushinga wari witezweho gutangira neza mu 2012, ariko mu mwaka wa 2015 nibwo ibikorwa byatangiye nyuma yo gutenguhwa n’abashoramari.

Minisiteri y’Ubuhinzi n’Ubworozi ivuga ko nta madevize menshi yinjizwa n’indabo, icyakora mu mwaka wa 2014 ubuhinzi bw’imbuto, imboga n’indabo byinjirije u Rwanda miliyoni 5.2 z’amadolari. Mu 2015, byari byitezwe ko umusaruro wabwo uzagera kuri miliyoni 12.8 z’amadolari naho muri 2018 bikazagera kuri miliyoni 25.4 z’amadolari.


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza