00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rugiye kugabanya amavuta yo gutekesha yatumizwaga mu mahanga

Yanditswe na Muhonzire Sylvine
Kuya 13 Nyakanga 2021 saa 07:25
Yasuwe :
0 0

Guverinoma y’u Rwanda yiteguye kugabanya ingano y’amavuta yo gutekesha atumizwa mu mahanga, binyuze mu korohereza abashoramari bifuza gutangiza inganda zitunganya aya mavuta.

Ni ibintu byitezweho kuzagabanya ingano yatumizwa mu mahanga n’ibiciro bihanitse by’aya mavuta.

Kayonza Distribution Company Ltd ni imwe muri sosiyete zinjiye mu itunganywa ry’aya mavuta aho yashoyemo agera kuri miliyoni 10 z’amadolari nkuko The New Times ibitangaza.

Minisitiri w’Imari n’Igenamigambi, Uzziel Ndagijimana, yavuze ko ishoramari ry’iyi sosiyete mu itunganywa ry’amavuta yo gutekesha rizagabanya amafaranga u Rwanda rutanga mu kuyatumiza kuko urwo ruganda ruzajya rutunganya toni 100.000 z’amavuta ku munsi.

Imyanda yavuze mu itunganywa ry’aya mavuta, Minisitiri Ndagijimana yavuze ko izajya yifashishwa mu gukora amasabune.

Mukarugwiza Laurence ushinzwe ibyoherezwa hanze muri Minisiteri y’Ubucuruzi n’Inganda yavuze ko iri shoramari rije rikenewe.

Ati “Iri shoramari ni ingirakamaro, ndetse rizatuma n’abandi bashishikarira gushora imari yabo mu itunganywa ry’amavuta kuko inganda zisanzwe ziyatunganya mu Rwanda zidahaza isoko ryaho.”

Ubusanzwe u Rwanda rutunganya amavuta yo gutekesha angana na Toni 80.000 buri mwaka, rugatumiza hafi toni 125.000 z’ayo bigatuma amavuta aba amwe mu bicuruzwa icumi bya mbere u Rwanda rutumiza mu mahanga.

Kuba hagiye gutangira uruganda rutunganya aya mavuta umwaka utaha, rufite ubushobozi bwo gutunganya toni 100.000 ku munsi, amavuta arenze ayo u Rwanda rwatunganyaga ku mwaka, bikazagabanya amafaranga rwatakazaga ruyatumiza ndetse bigabanye n’ibiciro byayo.

Mu 2019 u Rwanda rwatumije amavuta yo gutekesha angana na toni 121.981 mu gihe mu 2020 rwatumije toni 126,002 rwatanzeho miliyari 106 z’amafaranga y’u Rwanda.

Abacuruzi bishimiye uru ruganda rugiye gutangira gutunganya aya mavuta, bavuga ko ibi bizareshya ba rwiyemezamirimo batandukanye kuza gushora imari yabo mu gutunganya amavuta yo gutekesha kugira ngo bahatane ku isoko ry’umurirmo bitume ibiciro bigabanuka.

Hakuzimana Patrick ucururiza i Remera yagize ati “Nk’ubu ibiciro by’amavuta yo guteka byari byariyongereye, kuko litiro 20 yanguraga 22.000 Frw ubu ni 35.000 Frw.”

Iri zamuka ry’ibiciro biteganyijwe ko rizaganuka iyi sosiyete ya Kayonza Distribution Company Ltd nitangira gutunganya amavuta cyane ko izamuka ry’ibi biciro byatewe n’icyorezo cya Covid-19 cyatumye ingendo z’ibitumizwa mu mahanga zizamo imbogamizi.

U Rwanda rwiteguye kugabanya ingano y'amavuta atumizwa mu mahanga, ibintu byitezwe ko bizagabanya ibiciro byabo bimaze igihe byariyongereye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .