Kwamamaza

U Rwanda n’u Burundi bishobora gusasa inzobe bigakomorera ubuhahirane

Yanditswe kuya 5-11-2016 saa 19:42' na Ntakirutimana Deus


Abayobozi ba Banki Nkuru z’u Rwanda n’u Burundi barifuza ko ikibazo cy’ubuhahirane bwahagaze hagati y’ibihugu byombi cyashakirwa umuti kuko bikomeje kuhahombera.

Aba bayobozi babitangaje ubwo bari bitabiriye inama y’Akarere ka Afurika y’Iburasirazuba(EAC), yaberaga muri Tanzania muri iki cyumweru, nk’uko Radio Ijwi ry’Amerika yabitangaje.

Muri Kanama 2016, nibwo u Burundi bwafashe icyemezo cyo gukumira ibicuruzwa byoherezwa mu Rwanda ndetse n’ibihaturuka byiganjemo ibikomoka ku musaruro w’imbuto.

Kubera igihombo kigaragara ku mpande zombi nk’uko byemezwa n’aba bayobozi bifuza ko iki kibazo cyakemuka ndetse hakitabazwa n’ubushake bwa politiki.

Umuyobozi wa Banki Nkuru y’u Burundi, Cyiza Jean yatangaje ko icyemezo cyafashwe cyagize ingaruka ku batunzwe n’ubucuruzi.

Ati “Igihombo kiri kuri twese, haba ku Rwanda no ku Burundi, kuko mu gihe hari inzitizi zo gusohora ibicuruzwa cyangwa kubyinjiza, abaturage basanzwe batunzwe nabyo ntibamererwa neza, imibare ntayo nabona, ariko hari igihombo."

Umuyobozi wa Banki Nkuru y’u Rwanda, John Rwangombwa we atangaza ko kuba u Burundi bwarafunze imipaka bibangamiye ubukungu muri rusange.

Ati “U Burundi bwahisemo gufunga imipaka yabwo ku mpamvu zabwo bwite, ntabwo twabifata nk’ikimenyetso cy’iterambere ry’isoko rihuje ibihugu byo muri EAC. Bifite ingaruka byagize ku baturage, cyane u Burundi bwagurishaga mu Rwanda, kuko ibyo bagurishaga bimwe ni ibintu n’ubundi twari dukeneye mu Rwanda, ababicuruzaga nibo bagize igihombo ku giti cyabo.”

Rwangombwa yakomeje agaragaza ko ikibazo nk’iki kigira ingaruka ku buhahirane hagati y’ibihugu bihuriye ku isoko rimwe rya EAC.

Ati “ Ntabwo twaba turi mu bintu byo guhuza ibihugu bitandatu nk’isoko rimwe, ngo igihugu kimwe kibyikuremo gifunge urumva bitandukanye n’icyerekezo tuba tuganamo nk’akarere. Numva rero ubwacyo ari igikorwa gifite ingaruka mbi kurusha n’amafaranga wabihuza na byo. […] Ntabwo twavuga gusa guteza imbere EAC nk’isoko rimwe nk’umuryango umwe, ahubwo harimo n’ikintu cy’imiyoborere mu bihugu byacu kuko niryo shingiro rya politiki.”

Ku ruhande rwa Cyiza asanga ngo icyo ari ikibazo kirimo gushakirwa umuti.

Ati “ Nicyo gituma haba ibiganiro abantu bakavugana kugira ngo izo mbogamizi zikurweho, abaturage ntibagwe mu gihombo. Umuryango ni umwe, iyo rero hari ukutumvikana hagati y’ibihugu bibiri birumvikana yuko abaturanyi nabo bagera igihe bakajyamo kugira ngo ibintu byongere kugenda neza.”

Rwangombwa yakomoje ku bushake bwa politiki bukenewe mu kurangiza ibyo bibazo.

Ati “Ibyo tuvuga byose, ubuyobozi butabishyigikiye, budafashe umurongo ngo bukore ibikwiye, ibindi byose byaba ari imfabusa. Ubundi ntibyagombye kuba byaranabayeho mbere ya byose , kuba rero byarabayeho bitari bikwiye, birangiye uyu munsi byaba ari byiza kuri twese.”

U Burundi bwafunze imihahirane n’u Rwanda ngo mu rwego rwo kwirinda kumara umusaruro bakaba bashobora guhura n’inzara yaterwa n’imihindagurikire y’ibihe.

Gusa ariko hari n’abakomeje kubihuza n’impamvu za politiki ndetse n’umubano hagati y’u Burundi n’u Rwanda wajemo agatotsi muri Mata 2015, ubwo Perezida Nkurunziza yatangazaga ko aziyamamaza muri manda ya gatatu, bigakurura imyigaragambyo mu gihugu.

U Burundi bwahise butangira gushinja u Rwanda gutoza abasubira muri iki gihugu guteza umutekano muke, ibirego u Rwanda rutahwemye kwamaganira kure.

Guverineri wa Banki Nkuru y'Igihugu, John Rwangombwa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved