Rubavu: Abamotari bishimiye moto zikorerwa mu Rwanda

Yanditswe na Manzi Rema Jules, Mukwaya Olivier
Kuya 28 Kamena 2018 saa 04:17
Yasuwe :
0 0

Abamotari bo mu Karere ka Rubavu batangiye gukoresha moto z’Uruganda Nyarwanda ruteranya Moto (RMC), bagaragaje ko bishimiye uko ziberanye n’imiterere y’aho bakorera, zikaba zitanywa lisansi nyinshi ndetse n’ibikoresho byo gusimbura ibyangiritse bakaba babibona hafi.

Ishyirahamwe Urumuri Motari Gisenyi rihuza abamotari bo mu Karere ka Rubavu ku bufatanye na RMC, ishami rya Rubavu, ryafashije abanyamuryango baryo kubona moto zabo nshya zakorewe mu Rwanda bazajya bishyura buhoro buhoro mu rwego rwo kwirinda ibibazo bahuraga nabyo byo guhora bishyura iz’abandi bakoreshaga.

Batatu bamaze ukwezi bakoresha moto za RMC mu gutwara abantu mu mujyi wa Rubavu, bagaragaje ko zitandukanye cyane n’izo bari basanzwe bakoresha kuko zinywa lisansi nke, zikihuta, zigakomera kandi n’abagenzi bakaba barazishimiye cyane.

Aganira na IGIHE, Umumotari witwa Intungane Faustin yavuze ko bitamusaba amafaranga menshi yo kugura lisansi.

Yagize ati "Njye nkoresha moto ya RMC yitwa Imparage, ngiye kuyimarana ukwezi ; ni moto nziza, ikomeye kandi yihuta mu mihanda ya hano ubona ko bayikoze bazi imihanda dukoreramo. Itandukanye n’iyo narinsanzwe nkoresha kuko yo ntabwo inywa cyane, nshobora gushyiramo essence ya 3000 Frw ngakuramo 12,000 Frw."

Sindikubwabo Theogène we yavuze ko icyamushimishije cyane kuri moto za RMC ni uburyo iyo uyiguze bagufasha kubona ibyangombwa birimo purake, ubwishingizi ku buryo ushobora kuva aho uyifashe, ugahita ujya mu muhanda mu gihe ahandi ubishyura ayabo ibindi ukirwariza.

Uyobora Ishyirahamwe Urumuri Motari Gisenyi ryafashije aba bamotari kubona moto zabo, Hategekimana Eric, yasabye abakora umwuga wo gutwara abantu mu Karere ka Rubavu n’ahandi kugerageza moto za RMC.

Yagize ati "Izi moto ni nziza, abamotari bari kuzikunda kandi n’abagenzi ubona ko bazishimiye. Twasanze kuba abanyamuryango bacu baba bafite moto nk’izi, byazamura umusaruro akaba ariyo mpamvu ubu twatangije uburyo bwo kubafasha kuzibona byoroshye. Moto barazifashe, bazajya bishyura amafaranga make make ku kwezi noneho igihe twumvikanye na RMC nikirangira zizahita ziba izabo."

Manizabayo Jean Marie Vianney uyobora RMC ishami rya Gisenyi yavuze ko abayobozi b’Ishyirahamwe Urumuri aribo babegereye babasaba ko bakorana kugira ngo abanyamuryango babone moto, banarebe imikorere yazo.

Yagize ati "Ishyirahamwe ry’abamotari ryaratwegereye ridusaba niba twakorana tukaryorohereza kugira ngo abanyamuryango baryo babone moto. Kuko rero ari Abanyarwanda dukorera, ntabwo twari kubagora niyo mpamvu twaborohereje kuzifata bakazishyura buhoro buhoro."

Uruganda rwa RMC rumaze umwaka umwe rutangiye guteranyiriza moto mu Rwanda, rufite ubwoko butandukanye burimo izitwa Inziza, Imparage ari nazo zikundwa n’abamotari cyane, Indakangwa, Ingenzi n’izindi; izi zose ziboneka ku cyicaro cy’uruganda ku Kicukiro-Sonatube no ku ishami rya Rubavu.

Moto y'Imparage ngo abagenzi barayishimira cyane
Abamotari batangiye gukoresha moto za RMC b'i Rubavu barazishimiye
Umuntu ushaka kugura moto ku giciro kidahanitse ashobora kuyibona i Rubavu cyangwa i Kigali aho RMC ikorera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza