RSE yashimye imiyoborere y’ibigo bikuriwe n’abagore

Yanditswe na Jean Pierre Tuyisenge
Kuya 13 Werurwe 2018 saa 09:49
Yasuwe :
0 0

Ikigo cy’Imari n’Imigabane mu Rwanda (RSE) cyavuze ko ibigo by’imari biyoborwa n’abagore usanga byunguka cyane ugereranyije n’ibiyoborwa n’abagabo.

Ubwo ku wa 12 Werurwe 2018, Ikigo cy’Imari n’Imigabane mu Rwanda cyifatanyaga n’Isi mu kuvuza inzogera igamije kwibutsa ko mu bikorwa byose by’ubucuruzi hagomba kugaragaramo uburinganire, Umuyobozi wacyo, Pierre Celestin Rwabukumba, yavuze ko abagore bakwiye guhabwa umwanya muri urwo rwego kuko bafite umwihariko mu gucunga neza imari.

Yagize ati “Ibi tubikora kugira ngo aho uvugije inzogera hose ku Isi, abantu bongere bumve ko bagomba kubahiriza uburinganire bw’abagore n’abagabo kuko abagore ntabwo ari impuhwe tuba tubagiriye ahubwo bo ubwabo ni ingufu zikomeye cyane.”

Yakomeje agira ati “ Usanga abagore badahagarariwe cyane mu bucuruzi kandi tuzi ko ari imbaraga zikomeye kuko iyo urebye ibigo 1000 bikomeye ku Isi, usanga ibiyoborwa n’abagore byunguka inshuro eshatu kurusha iby’abagabo.”

Avuga ko abagore usanga ari abacungamutungo b’ibigo beza nk’uko bacunga uw’ingo zabo.

Yagize ati “Bazi gufata neza umutungo, usanga nta faranga ryabo ripfa ubusa. Ntekereza ko biterwa no kuba ari uko usanga bazi gucunga umutungo w’urugo, ukabona ko bibaba mu maraso.”

Rwabukumba yanavuze ko usanga abagore iyo bagiye gufata icyemezo baba bafite ingingo zikomeye zigiherekeje.

Inzobere mu by’ubukungu zigaragaza ko Afurika itakaza miliyari zigera kuri 85 z’amadolari buri mwaka kubera guheza abagore mu bikorwa by’ubucuruzi.

Raporo yakozwe n’Ikigo McKinsey Global Institute yagaragaje ko Isi yazongera miliyari ibihumbi 28 z’amadolari ku musaruro mbumbe mu 2025 angana na 26%, mu gihe abagore baba bahabwa umwanya ungana n’uw’abagabo mu bikorwa by’ubucuruzi.

Kugeza ubu mu Rwanda ibigo biyobowe n’abagore biri ku kigero cya 23%.

RSE yifatanyije n'Isi mu kwibutsa ko mu bikorwa byose by’ubucuruzi hagomba kugaragaramo uburinganire
Umuyobozi wa RSE , Pierre Celestin

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza