Perezida Kagame yagaragaje igihombo Afurika iterwa no kohereza hanze ibihingwa bidaciye mu nganda

Yanditswe na Ferdinand Maniraguha
Kuya 8 Nzeri 2018 saa 09:16
Yasuwe :
0 0

Perezida Paul Kagame, Perezida Nana Akufo-Addo wa Ghana na Visi Perezida William Ruto wa Kenya, bagaragaje ko umugabane wa Afurika udakwiye gukomeza kohereza mu mahanga ibikomoka ku buhinzi bitanyuze mu nganda, kuko biyigarukira biri ku giciro cyo hejuru.

Aba bayobozi babigarutseho kuri uyu wa Gatandatu, ku munsi wa nyuma usoza inama y’Ihuriro Nyafurika rigamije guteza imbere ubuhinzi, AGRF 2018.

Rumwe mu ngero zigaragara ni uko nko muri 2016 agaciro ka Cocoa ikorwamo shokola ku Isi hose kari hejuru ya miliyari $100. Ghana na Côte d’Ivoire byatanze 65 % by’iyo cocoa yose, ariko mu nyungu yayo n’ibiyikomokaho, byabonye 5% gusa.

Muri icyo kiganiro cyanitabiriwe na Minisitiri w’Intebe wa Gabon Emmanuel Issoze-Ngondet, Perezida Kagame yavuze ko bitumvikana uburyo Afurika yohereza hanze ibikomoka ku buhinzi, bikagaruka biyihenze.

Yagize ati “Ni gute twagira uwo turenganyiriza kuba u Rwanda rutumiza ikawa mu Burayi kandi ari twe tuyihinga ariko tukaba tutagira inganda ziyutunganya?”

Yabwiye Tony Blair wari uyoboye ikiganiro ati “U Bwongereza, u Bufaransa […] ntabwo muhinga ikawa, ntimuhinga icyayi, ariko se bishoboka bite ko twohereza ikawa yacu muri ibyo bihugu, mukayiha umugisha mukayitugarurira tukayigura ku giciro kikubye inshuro icumi? Ntabwo byumvikana!”

“Hari ubwo nari mu nama na Visi Perezida wa Côte d’Ivoire, ndavuga nti ‘kuki mutadukorera shokola ziturutse muri Côte d’Ivoire?’ Naranavuze nti ‘kuki tutafatanya tugashaka igishoro? Ikoranabuhanga rihora rishakishwa ariko tukarekera aho kohereza hanze cocoa?”

Visi Perezida wa Kenya, William Ruto, yavuze ko ibihugu bya Afurika bikwiye kwishyira hamwe, bigafata umurongo ku buryo nta gihingwa kitanyujijwe mu ruganda cyoherezwa hanze.

Ati “Ibyo twakabaye tuganira ni ukuvuga ngo turemera imodoka zihinga n’izindi mashini zo mu buhinzi, ariko tuzaboherereza ibikomoka ku buhinzi byanyuze mu ruganda nk’ikawa cyangwa icyayi.”

“Ntabwo bikwiye ko ukomeza utwoherereza ibicuruzwa byanyuze mu ruganda hanyuma utegereze ko ari twe tuzakuzanira ibinyuzwa muri izo nganda kugira ngo be aro wowe wikubira ako kazi n’ iyo nyungu.”

Aba bayobozi bavuze ko amasezerano yoroshya urujya n’uruza n’ubuhahirane muri Afurika aherutse gusinyirwa i Kigali ari ingenzi mu gukemura icyo kibazo.

Perezida Akufo-Addo yavuze ko Afurika ikwiye kwikemurira ibibazo aho kumva ko ibibazo byayo hari undi bireba.

Yagize ati “Kugeza ubwo tuzicara tukareba icyo dukwiye gukora, ntawe dukwiye gutwerera ibibazo byacu.Yego ubukoloni bwari bubi, bwaratuzahaje ariko ibyo byararangiye tugomba kugendana n’ibiriho tugashakira ibisubizo ibibazo byacu.”

Hanagaragajwe ikibazo cy’ubuhahirane hagati y’ibihugu bya Afurika bugoranye ku buryo byoroshye kujya gukura ibiribwa mu Burayi kurusha uko byoroshye kubikura muri Afurika.

Mu nama idasanzwe y’Umuryango wa Afurika Yunze Ubumwe (AU) yabereye i Kigali muri Werurwe 2018, ibihugu 44 byashyize umukono ku masezerano ashyiraho isoko rusange ryabyo, AfCFTA.

Ubu byarenze 50 ndetse biri mu rugendo rwo kuyemeza burundu ngo atangire gushyirwa mu bikorwa.

Azatuma Afurika ihurira ku isoko rya miliyari imwe na miliyoni 200 z’abaturage bayituye, ndetse izamure ubucuruzi bukorwa hagati y’ibihugu bya Afurika busanzwe kuri 16%, igipimo kiri hasi cyane ugereranyije na 60% bikorana n’u Burayi na 50% bikorana Aziya.

Perezida Paul Kagame, Perezida Nana Akufo-Addo wa Ghana, Visi Perezida William Ruto wa Kenya na Minisitiri w’Intebe wa Gabon Emmanuel Issozet Ngondet, bagiranye ikiganiro cyayobowe na Tony Blair wabaye Minisitiri w'Intebe w'u Bwongereza
Visi Perezida wa Kenya, William Ruto yasabye ibihugu bya Afurika kudakomeza kohereza mu mahanga ibihingwa bitanyujijwe mu nganda
Aba bayobozi bahurije ku kongerera agaciro umusaruro w'ubuhinzi bwa Afurika
Perezida Nana Akufo-Addo wa Ghana yitabiriye iki kiganiro
Perezida Kagame yavuze ko ibihugu bya Afurika bitungukira ku musaruro w'ubuhinzi bwayo uko bikwiye
Perezida Kagame akurikiye inama yagarukaga ku iterambere ry'ubuhinzi muri Afurika
Iyi nama yitabiriwe n'abakuru b'ibihugu na za Guverinoma batandukanye
Umwe mu bitabiriye iyi nama yagize umwanya wo kwifotozanya na Perezida Kagame
Perezida Kagame yagejeje ijambo ku bitabiriye iyi nama yasojwe kuri uyu wa Gatandatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza