Kwamamaza

Ni iki u Rwanda rwiteze mu masezerano y’ubucuruzi n’ibihugu by’u Burayi?

Yanditswe kuya 3-09-2016 saa 14:23' na Cyprien Niyomwungeri


Kuwa Gatatu w’iki Cyumweru Guverinoma y’u Rwanda n’iya Kenya zashyize umukono ku masezerano y’ubufatanye mu bukungu n’Umuryango w’Ubumwe bw’u Burayi, EU, azwi nka ‘Economic Partnership Agreement, EPA’.

Aya masezerano hagati ya EU n’ibihugu bigize Umuryango wa Afurika y’Iburasirazuba, EAC, yitezweho kongera ubufatanye mu bucuruzi n’iterambere, aho nko ku ruhande rw’u Rwanda ibicuruzwa byarwo bizemererwa kugurishwa ku masoko y’ibihugu byo mu muryango w’ubumwe bw’u Burayi.

Ikindi ni uko muri ayo masezerano harimo no gukuraho amahoro ku bicuruzwa bikorerwa mu bihugu bigize iriya miryango yombi.

Amasoko ya EU afatiye runini ubucuruzi bw’u Rwanda kuko umwaka ushize Minisiteri y’Ubucuruzi n’Inganda yatangaje ko 28% by’ibyo rwohereza mu mahanga ariho bijya. Ibyo birimo amabuye y’agaciro, ikawa, icyayi, imboga n’imbuto.

Mu kiganiro IGIHE yagiranye n’umusesenguzi mu by’ubukungu, Teddy Kaberuka, yagaragaje zimwe mu nyungu u Rwanda rushobora gukura muri ariya masezerano ahanini zishingiye ku koroshya ubuhahirane.

Kaberuka yavuze ko aya masezerano afungura imiryango ku bucuruzi bw’u Rwanda kuko avanaho imbibi zatumaga rutabasha kohereza ibicuruzwa byarwo i Burayi, zirimo amahoro.

Yagize ati “Azarworohereza kohereza ibicuruzwa ku isoko ry’i Burayi no gutumizayo ibintu kuko ntiruzongera gucibwa amahoro.”

Yongeraho ko nubwo Afurika idafite inganda zateye imbere, ifite ibikenewe n’izo nganda zateye imbere ziganje i Burayi bityo ikazabona isoko ibigurishaho nta mananiza ikabona amadevize.

Ati “Dufite kohereza hanze ibicuruzwa kuko nibyo bituma ibihugu byacu bitera imbere, urugero nka Kenya yohereza indabo, imbuto n’ibindi byinjiza amadevize menshi, kuba hafunguwe imipaka bizinjiriza amadevize ibihugu.”

Inyungu ku baturage

Kaberuka asobanura ko kuba ubuhahirane bworohejwe, bizatuma abaturage bo mu bihugu babasha guhaha mu buryo bworoshye.

Yagize ati “Ibicuruzwa by’i Burayi bizaza mu buryo bworoshye abaturage babibone bihendutse kuko amasezerano yavanyeho amahoro.”

Inganda mu ihurizo

Nubwo amasoko yafunguwe, bisa n’ibifite ingaruka kuko bizateza ikibazo inganda z’imbere mu gihugu cyane cyane izikora ibintu bimwe n’ibiva i Burayi, dore ko inyinshi zikiyubaka zitabasha guhangana n’izo zateye imbere.

Dufashe urugero biragoye ko inganda z’imyenda zo mu Rwanda zahangana n’iz’i Burayi kuko ziraziruta mu buryo bukomeye yaba mu ikoranabuhanga n’umusaruro zitanga biratandukanye cyane.

Kaberuka asanga aya masezerano ari andi mahirwe ku ishoramari kuko uretse korohereza abashoramari gukorera mu Rwanda hazaniyongeraho kubabwira ko rufite isoko mu muryango w’Ubumwe bw’u Burayi bakihutira gushora imari.

Yagize ati “Kuba u Rwanda rwasinye ariya masezerano, hakwiye kurebwa uburyo bwakorohereza ishoramari ry’inganda kuko abashoramari nta kibazo cy’isoko bazagira, ibyo bazakora bazabigurisha mu Rwanda cyangwa i Burayi kuko babyemerewe.”

Yongeraho ko azafungura imiryango ku Banyaburayi bafite inganda bazizane mu karere, bitewe ‘ ikiguzi cyo kugira ngo ikintu gikorwe byatwara ubushobozi buke kuruta kubikorera i Burayi.

Ikindi ni uko u Rwanda rwakoresha aya mahirwe rukigira ku bihugu bigize EU uko byateye imbere, rukongera umusaruro mu buhinzi rwibanda ku bihingwa bikenewe kugirango rubashe kohereza byinshi bibuturutsemo.

U Rwanda na Kenya byasinye amasezerano ya EPA

Tanzania n’u Burundi biracyari inzitizi

Nubwo u Rwanda na Kenya byasinye, haracyari imbogamizi ikomeye y’uko ibindi bihugu bigize EAC bitarasinya aya masezerano kandi ari ayo ku rwego rw’Umuryango. Ibihugu nka Tanzania n’u Burundi byanze gusinya mu gihe Uganda yamaze kwisubiraho ikemera kuyasinya.

Muri Nyakanga uyu mwaka, Umunyamabanga uhoraho muri Minisiteri y’Ububanyi n’Amahanga ya Tanzania, Dr. Aziz Mlima, yavuze ko igihugu cye kititeguye gusinya kuri aya masezerano kuko ashobora kuzana ibihombo kuri EAC kurusha inyungu.

Ati “Impuguke zacu zasesenguye neza ko uburyo ayo masezerano yakozwemo, ko EPA itazungura inganda zacu muri Afurika y’u Burasirazuba. Ahubwo azatuma zisenyuka kuko ibihugu byateye imbere biziharira isoko ryacu.”

Umunyamabanga uhoraho muri Minisiteri y’ubucuruzi n’inganda, Emmanuel Hategeka, avuga ko byagorana ko ariya masezerano yubahirizwa mu gihe ibihugu byose bya EAC byaba bitarasinya.

Yagize ati “Ndabyemera, bishobora kugorana kuyashyira mu bikorwa mu gihe abandi baba batarayasinya, gusa mu by’ukuri twizeye ko n’ibindi bihugu bizayasinya.”

Ku rundi ruhande hari abasanga EPA ntacyo izazanira EAC ahubwo izaha isoko rigari ibihugu byo muri EU bifite inganda zateye imbere, ibicuruzwa byabo bikiharira amasoko yo mu karere.

Ibihugu byo muri EAC byohereza cyane muri EU, Ikawa, indabo, itabi, icyayi, amafi n’imboga, mu gihe ibihugu byo muri EU byohereza muri EAC ibicuruzwa birimo imashini zo mu nganda n’ibyuma binyuranye, imodoka, imiti n’ibindi.


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 29 Nzeri 2016
Copyright © 2009 -2014 - IGIHE Ltd - All Rights Reserved