Marriott Hotel yegukanye Starwood Hotels & Resorts ica agahigo mu zikunzwe ku Isi

Yanditswe na Ishimwe Israel
Kuya 27 Nzeri 2016 saa 10:56
Yasuwe : XX
0

Ikigo Mpuzamahanga cyo muri Amerika gikora ibiyanye n’amahoteli n’ubukerarugendo (Marriott International, Inc.) cyaguze Starwood Hotels & Resorts Worldwide gihita kiba icya mbere mu bikunzwe kandi bifite abakiriya benshi ku Isi mu bikora iri shoramari ry’amahoteli.

Marriot Hotel yinjiye mu rugamba rw’izindi kompanyi zikomeye aho ifite amashami mu bihugu bitandukanye ku Isi, harimo n’Ishami riri mu Rwanda, ikaba ifite umwihariko mu kugira ibicuruzwa bigezweho byanatumye iza ku isonga mu zikunzwe cyane.

Kuva ku Cyumweru, kuwa 25 Nzeri, iyi hoteli yatangije imikoranire na The Ritz-Carlton na Starwood Preferred Guest (SPG) muri gahunda yo kugenera abakiliya bayo bayigana ibihembo bitandukanye.

Mu mwaka wa 2015, kuya 16 Ugushyingo nibwo, Marriott International yatangaje ko ishaka kugura Starwood Hotels and Resorts Worldwide kuri miliyari 13.6 z’amadorali ya Amerika, igahita ica agahigo ka hoteli nini mu gihe amasezerano yaba amaze gushyirwaho umukono.

Izi kompanyi zafashe icyemezo ndakuka cyo kwihuza ku wa Gatanu w’icyumweru gishize, tariki ya 23 Nzeri 2016, nyuma yo guhabwa uburenganzira n’abayobozi bayo bo mu Bushinwa.

Marriott iteganya gutangiza serivisi zitandukanye zizafasha mu kuzamura imibereho myiza y’abayigana, gutanga serivisi zigezweho zo ku rwego mpuzamahanga ndetse no gutegura inama zikomeye.

Starwood Hotels & Resorts Worldwide, Inc ni hoteli y’Abanyamerika itanga serivisi zitandukanye ikaba iherereye mu Mujyi wa Stamford muri Leta Zunze Ubumwe za Amerika, yashinzwe mu mwaka wa 1969, kuri ubu yamaze kwegukanwa na Marriott.

Kugeza ubu Marriott niyo hoteli itanga serivisi z’amahoteli n’ubukerarugendo nziza ku rwego mpuzamahanga. Yemejwe ko ari yo ikoresha ingengo y’imari nini ku Isi ikaba ndetse ari yo yakira inama zikomeye nyinshi kandi neza.

Perezida wa Marriott ku Isi, Arne Sorenson, akaba ari na we watangije iyi hoteli ibarizwa mu bihugu byinshi yagize ati "Turizera ko kugeza ubu Marriott turi imbere mu mahoteli akomeye ku Isi; ni twe turi ahantu henshi ku Isi kandi tunafite gahunda zisobanutse zituma tuba indashyikirwa mu kwakira abakiriya bacu. Guhuza serivisi n’izina rya Starwood ryacu bizadufasha kugera ku ntego yacu nyamukuru yo kunoza serivisi duha abakiliya bacu ndetse no kubona abandi bashya. Hari amahirwe mashya menshi agiye kuboneka ku bakozi bacu n’abafatanyabikorwa.”

Marriott imaze imyaka 90 itanga serivisi zijyanye n’amahoteli, ikorana n’ibigo 5700, ifite ibyumba miliyoni 1.1 bihereyeye mu bihugu 110. Iyi hoteli ifite ibicuruzwa by’umwihariko 30 bitaboneka mu zindi hoteli.

Marriot iheruka kuzuza ishami ryayo mu Rwanda, irateganya kubaka indi hoteli yitwa Sheraton Hotel Kigali izatahwa ku mugaragaro mu ntangiriro za 2018.

Marriot Hotel Kigali yafunguwe ku mugaragaro muri Nyakanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE