Izamuka ry’ibiciro by’ibiribwa riteye impungenge abanyarwanda

Yanditswe na Ishimwe Israel
Kuya 27 Ukwakira 2016 saa 08:33
Yasuwe :
0 0

Mu bice bitandukanye by’igihugu, ibiciro by’ibiribwa bikomeje kuzamuka, imihindagurikire y’ibihe igatungwa agatoki, abaharanira uburenganzira bw’abakozi nabo bagasaba Leta ubufasha mu kuvugutira iki kibazo umuti.

Ibiciro twasanze mu masoko atandukanye yo mu Mujyi wa Kigali by’umwihariko mu isoko rya Nyarugenge n’isoko rya Nyabugogo aho bita kwa Mutangana, ikiro cy’ibirayi cyari hagati y’amafaranga 300 na 350, icy’umuceli kigura hagati ya 800 na 1000, icy’igitoki kiri kuri 300, ibishyimbo biri hagati ya 600 na 800, icy’ifu y’imyumbati kiri hagati ya 500 na 800, na ho icy’ibijumba gihagaze kuri 250 y’amanyarwanda.

Si ibi biribwa gusa ibiciro byabyo byazamutse kuko n’imboga ndetse n’imbuto ibiciro byabyo byikubye hafi kabiri muri iki gihe cya vuba.

Izamuka ry’ibiciro, ikibazo cy’ingutu kuri bamwe mu bacuruzi n’abakiliya babo

Mbonigaba Siméon utuye mu Murenge wa Kimihurura mu Karere ka Gasabo, avuga ko afite umugore n’abana bane, ibiciro yita ko bihanitse bikaba bisigaye bituma barya mu byiciro.

Yagize ati “Mba mu nzu nkodesha, nkorera umushahara w’ibihumbi 80, ubu iwanjye twafashe gahunda yo kujya duhana ibihe, abana bakaba ari bo barya kabiri ku munsi, abakuru tukarya nijoro gusa.”

Musabyimana Beatha, umucuruzi w’ibishyimbo mu isoko ryo kwa Mutangana yavuze ko izamuka ry’ibiciro bituma abakiliya bagabanuka.

Yagize ati “Ibiciro bizamuka uko bwije n’uko bukeye, abakiriya nabo ubona ko baragabanutse kubera ko ibishyimbo by’amafaranga 800 ku kiro kimwe si buri wese wabyisukira.”

Abenshi mu bo twaganiriye batunga urutoki imihindagurikire y’ibihe ko ari kimwe mu byatumye ibiciro by’ibiribwa bizamuka cyane.

Urubuga rw’Umurimo n’Ubuvandimwe bw’abakozi CEFOTRAR(Centre de Formation des Travailleurs Rwandais), rurasaba Leta kwita kuri iki kibazo, bakazamura imishahara y’abakozi ikajyana n’ibiciro biri ku isoko.

Umuyobozi wungirije wa CEFOTRAR, Munyuzangabo Modeste, yagize ati “Leta ikwiye gushyiraho umushahara fatizo w’umukozi, ubona ko ibiciro ku isoko byiyongera, umushahara w’abakozi bamwe ukazamurwa, ariko ugasanga hari abandi umushahara wabo utiyongera.”

Raporo ngarukakwezi y’Ikigo cy’Igihugu gishinzwe ibarurishamibare mu Rwanda (NISR), iratangaza ko muri Nyakanga 2016 ibiciro bikomatanyirijwe hamwe mu mijyi no mu byaro byiyongereyeho 7, 8% ugereranyije na Nyakanga 2015.

Raporo ngarukakwezi y’iki kigo ku gipimo cy’ihindagurika ry’ibiciro, yagaragaje ko mu kwezi kwa Nzeri 2016 ibiciro byiyongereyeho 5,8% mu Mijyi na 8.3% mu byaro ugereranyije na Nzeri 2015.

Inkuru bifitanye isano:

Muri Nzeri, ibiciro byiyongereyeho 5,8% mu mijyi na 8,3% mu byaro

Mu mezi 12 ashize ibiciro ku masoko yo mu Rwanda byiyongereyeho 7, 8%

Izamuka ry'ibiciro by'ibiribwa ku isoko rikomeje gutera benshi impungenge

emma@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza