Inguzanyo zitishyurwa zageze kuri 6.9% mu mezi atandatu ya 2018

Yanditswe na Ferdinand Maniraguha
Kuya 30 Kanama 2018 saa 12:40
Yasuwe :
0 0

Banki Nkuru y’Igihugu (BNR) yagaragaje ko inguzanyo zitishyurwa zagabanyutse mu mezi atandatu ya mbere ya 2018, kuko mu gihe mu mwaka ushize zari ku 8.2%, ubu zageze kuri 6.9%.

Iyi mibare BNR yayitangaje kuri uyu wa Kane ubwo yamurikaga uko ubukungu bw’igihugu buhagaze.

Igaragaza ko guhera muri Mutarama kugeza Kamena 2018, inguzanyo nshya zatanzwe n’amabanki ari miliyari 402.7 Frw ugererananyije na miliyari 416.7 Frw zatanzwe mu gihe nk’icyo umwaka ushize.

Bivuze ko ugereranyije Mutarama-Kamena 2017, na Mutarama-Kamena 2018, inguzanyo nshya amabanki yatanze zagabanutseho miliyari 14 z’amafaranga y’u Rwanda.

Kugeza muri Kamena 2018, muri rusange inguzanyo zose zatanzwe n’amabanki zari miliyari 1 630 Frw. Ni ukuvuga ko ziyongereye ku kigero cya 7.8 % ugereranyije n’ukwiyongera kwa 14.4 % kwabonetse mu gihe nk’icyo umwaka ushize.

BNR ivuga ko kugabanuka kw’inguzanyo zatanzwe kwaturutse ku basaba inguzanyo bagabanyutseho 5.5% kuko bavuye kuri 139 131 bagera kuri 131 426 ndetse no kwifata cyane ku mabanki akanga gutanga inguzanyo, bitewe n’izitishyurwa zazamutse umwaka ushize.

Inguzanyo zitishyurwa umwaka ushize zari zihagaze ku 8.2%, ari nabyo byateye impungege amabanki. Uyu mwaka ziri kuri 6.9%.

Isuzuma ryakozwe muri Kamena ryagaragaje ko abatarahawe inguzanyo bageze kuri 20.4% mu mezi atandatu ya mbere ya 2018 bavuye kuri 16.6% mu mezi atandatu ya mbere ya 2017

Guverineri wa BNR, John Rwangombwa yavuze ko icyatumye inguzanyo zitishyurwa zizamuka umwaka ushize ari ubukungu butari bwifashe neza.

Ati “Uko ubukungu bwari bwagenze mu mpera za 2016 n’intangiriro za 2017, byatumye abantu bafite inguzanyo batabasha kwishyura neza hazamo ubukererwe ariko kubera ko mu gice cya kabiri cy’umwaka ushize n’igice cya mbere muri uyu mwaka icyo kibazo gisa n’aho cyakemutse, abantu babashije guhindura imikorere bagaruka kwishyura neza inguzanyo bari bafite.”

Rwangombwa avuga ko ikindi cyatumye inguzanyo zitishyurwa zigabanyuka ari uko hari izasibwe n’amabanki nyuma yo kubona ko kuzishyura bitazapfa gushoboka.

Amabanki yasibye mu bitabo byayo inguzanyo zingana na miliyari 64.8 Frw.

Ubucuruzi, ibikorwa by’inganda n’inguzanyo z’ubwishingizi, nibyo byihariye inguzanyo zatanzwe muri uyu mwaka kuko biri kuri 64.8 %.

Ubuhinzi buza inyuma mu guhabwa inguzanyo kuko buri 1.5 % naho ubucukuzi bw’amabuye y’agaciro bukaba kuri 0.2 %.

Inguzanyo zitishyurwa mu buhinzi zaragabanyutse ziva kuri 18.2% zigera kuri 7.8 %.

Mu nguzanyo zitishyurwa mu rwego rw’inganda zavuye kuri 8.9 % zijya kuri 13.9 %, mu bucuruzi ziva kuri 8.8 % zijya kuri 11 .5 % naho mu mahoteli ziva kuri 9.8 % zijya kuri 11 %.

Nubwo hari inguzanyo zitishyurwa neza, Rwangombwa yashimangiye ko urwego rw’amabanki ruhagaze neza kandi rufite ubushobozi buhagije.

Ati “ Urwego rw’imari rurakora neza ari mu rwunguko, igishoro gihagije kandi bafite amafaranga ahagije mu gutanga inguzanyo ku baza babagana.”

Mu mezi atandatu ya 2018, urwego rw’amabanki rwabonye inyungu ya miliyari 23 Frw, akaba yariyongereye ugereranyije na miliyari 22 Frw zabonetse umwaka ushize.

Abakozi mu nzego zitandukanye baje gukurikirana uko ubukungu bw'u Rwanda buhagaze
Minisitiri w'ubucuruzi n'inganda, Vincent Munyeshyaka atanaga igitekerezo ubwo BNR yamurikaga uko ubukungu buhagaze
Rwangombwa yavuze ko nubwo hakiri inguzanyo zitishyurwa, ngo nta kibazo gikomeye bifite ku mikorere y'urwego rw'imari
Dr Nsanzabaganwa Monique, Guverineri wungirije wa BNR mu bitabiriye
Prof Kigabo Thomas ushinzwe ubukungu muri BNR nawe yitabiriye iki gikorwa cyo kumurika uko ubukungu buhagaze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza