Inganda z’ibiryo n’ibinyobwa 40 % ni zo zifite icyemezo ko zitakwangiza ubuzima bw’umuntu

Yanditswe na Tombola Felicie
Kuya 3 Mata 2018 saa 08:52
Yasuwe :
3 3

Ikigo gishinzwe Ubushakashatsi no guteza imbere Inganda (NIRDA) cyatangaje ko inganda zibarirwa kuri 40% mu zitunganya ibiribwa n’ibinyobwa mu Rwanda ni zo zifite ikirango cy’uko zitakwangiza abanywa n’abarya ibyo zitunganya.

Icyo cyemezo cy’ubuziranenge kizwi nka ‘HACCP (Hazard Analysis Critical Control Points)’ gitangwa hagamijwe kwemeza ko igicuruzwa runaka mu itunganywa ryacyo kugeza ku isoko gifite ubuziranenge mpuzamahanga, ku buryo kitagira ingaruka ku bagikoresheje ngo babe barwara cyangwa bahure n’ibindi bibazo byangiza ubuzima.

Hagamijwe kureba uko umubare w’izo nganda zakwiyongera ndetse zikabasha guhangana ku rwego mpuzamahanga NIRDA n’Ikigo cy’Igihugu gitsura ubuziranenge byatangije amahugurwa y’iminsi itatu, agenewe abanyenganda 48 kugira ngo bagire ubumenyi kuri icyo kirango no kwihutira kukigira.

Abahugurwa ni abatunganya ibikomoka ku bitoki, ubuki, imyumbati n’ibinyampeke.
Mu igenzura ryakozwe na NIRDA mu kureba amakuru abanyenganda bafite kuri icyo kirango n’ibindi byatuma ibyo bakora birushaho kunoga, basuye inganda 50 zitunganya ingano n’ibigori n’izindi 40 zitunganya ibitoki, basanga umubare munini nta makuru bafiteho.

Umuyobozi ushinzwe Ishami ry’Ubushakashatsi n’Iterambere muri NIRDA, Dr Nyombaire George, yatangaje ko kuba u Rwanda ruherutse gusinya amasezerano ashyiraho isoko rusange bikwiye gutuma abantu bumva ko bakwiye kuzuza ibisabwa n’isoko mpuzamahanga kugira ngo bahahirane n’abandi.

Yagize ati “Inganda zifite ikirango cya HACCP usanga ari nkeya mu gihugu kuko zigera kuri 40%, ni ukuvuga ngo 60 % ntabwo ziragira HACCP kandi nk’uko babitubwiye ,hamaze kujyaho isoko rihuza Afurika, kugira ngo rero inganda zacu zihangane ku isoko mpuzamahanga ni uko ibyo dukora bigomba kuba bifite ubuziranenge kandi bifite HACCP.”

NIRDA ivuga ko kumenya umubare w’inganda zitunganya ibiribwa n’ibinyobwa bidapfa koroha kuko zivuka buri munsi, bityo imibare yabo ikaba igaragaza gusa ko ziri hejuru ya 300.

Ushizwe umushinga wa Zamukanaubuziranenge mu nganda z’ibiribwa n’ibinyobwa muri RSB, Murigo Anicet, yavuze ko abanyendanga bakwiye kumva ko ari ikirango cyo kubamenyekanisha.

Yagize ati “Wumva ukuntu abantu birirwa bavuga ngo Amarura, aho ugeze hose ni Amarura, shokola y’Abasuwisi … n’ibindi ukibaza uti ‘kuki batavuga urwagwa rw’u Rwanda’ rukaba rumeze nk’Amarura?”

Murigo yakomeje avuga ko kubigeraho bisaba kuba uruganda rwaragenzuwe ko ibyo rukora bifite ubuziranenge, bigatuma n’abakiriya barugirira icyizere.

Umuyobozi w’Uruganda rwa Kinazi Cassava rutunganya imyumbati, Nsanzabaganwa Emile, yatangaje ko nk’abantu bari ku isoko mpuzamahanga bagomba kugira iki kirango kandi ari inyungu zabo.

Yagize ati “ Ntabwo waba uri ku isoko mpuzamahanga ngo ube utazi iki kirango, twebwe nka Kinazi Cassava Plant baradusuye, twaranditse dusaba iki kirango kandi bari hafi kukiduha, bizadufasha kwizerwa ku isoko mpuzamahanga, umuguzi yumva ko ubuzima bwe bwatekerejweho.”

Ikirango cya HACCP kigura amafaranga ibihumbi birindwi ariko ugihawe akomeza kugenzurwa ko akomeza gukora ibifite ubuziranenge.

Abanyenganda bakora ibiryo n’ibinyobwa mu mahugurwa ku buziranenge
Umuyobozi ushinzwe Ishami ry’Ubushakashatsi n’Iterambere muri NIRDA, Dr Nyombaire George
Ushizwe umushinga wa Zamukanaubuziranenge mu nganda z’ibiribwa n’ibinyobwa muri RSB, Murigo Anicet
Umuyobozi w’Uruganda rwa Kinazi Cassava rutunganya imyumbati, Nsanzabaganwa Emile

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza